| ᠷᠠᠰᠢᠫᠣᠩᠰᠤᠭ ︵1755 ᠊᠊᠊︖︶ | | ᠷᠠᠰᠢᠫᠣᠩᠰᠤᠭ᠂ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ᠂ ᠪᠣᠷᠵᠢᠭᠢᠳ ᠣᠪᠣᠭᠲᠠᠨ᠂ 1755 ᠣᠨ ᠳᠤ | ᠪᠠᠭᠠᠷᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤᠨ ᠳᠤ ᠲᠥᠷᠥᠵᠡᠢ᠂ ᠡᠴᠢᠭᠡ ᠶᠢᠨ ᠨᠡᠷᠡ ᠨᠢ ᠴᠡᠷᠡᠨᠳᠠᠷᠵᠠ ᠭᠡᠳᠡᠭ᠂ ᠭᠤᠳᠠᠭᠠᠷ | ᠡᠭᠦᠳᠡᠨ ᠤ ᠲᠠᠶᠢᠵᠢ᠃ ᠷᠠᠰᠢᠫᠣᠩᠰᠤᠭ ᠢ ᠪᠠᠭᠠ ᠪᠠᠶᠢᠬᠤ ᠳᠤ ᠡᠪᠦᠭᠡ ᠪᠠᠯᠵᠤᠤᠷ ᠨᠢ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠭᠠᠷᠤᠨ | ᠬᠤᠰᠢᠭᠤᠨ ᠤ ᠲᠤᠰᠠᠯᠠᠭᠴᠢ ᠪᠠᠶᠢᠭᠰᠠᠨ ᠪᠣᠯᠬᠤᠷ ᠷᠠᠰᠢᠫᠣᠩᠰᠤᠭ ᠸᠠᠩ ᠤᠨ ᠬᠤᠷᠢᠶᠠ ᠶᠢᠨ ᠪᠢᠴᠢᠭᠡᠴᠢ ᠶᠢᠨ ᠭᠡᠷ ᠤᠨ | ᠰᠣᠷᠭᠠᠭᠤᠯᠢ ᠳᠤ ᠪᠢᠴᠢᠭ ᠰᠤᠷᠴᠤ ᠪᠠᠶᠢᠵᠠᠢ᠃ ᠲᠡᠷᠡ ᠬᠠᠷᠠᠬᠠᠨ ᠪᠠᠭᠠ ᠠᠴᠠ ᠪᠠᠨ ᠤᠢ ᠪᠢᠯᠢᠭ ᠰᠡᠷᠭᠦᠯᠡᠩ᠂ | ᠰᠤᠷᠬᠤ ᠳᠤ ᠪᠠᠭ᠋ᠠᠲᠠᠢ ᠪᠣᠯᠬᠤᠷ ᠬᠤᠵᠢᠮ ᠨᠢ ᠮᠣᠩᠭᠤᠯ᠂ ᠮᠠᠨᠵᠤ᠂ ᠬᠢᠲᠠᠳ᠂ ᠲᠥᠪᠡᠳ ᠤᠢᠰᠦᠭ ᠪᠢᠴᠢᠭ ᠲᠤ | ᠨᠡᠪᠲᠡᠷᠡᠵᠡᠢ᠃ ᠴᠢᠩ ᠤᠯᠤᠰ ᠤᠨ ᠲᠩᠷᠢ ᠲᠡᠳᠬᠦᠭᠴᠢ ᠶᠢᠨ ᠭᠤᠴᠢᠨ ᠳᠣᠯᠣᠳᠤᠭᠠᠷ ᠣᠨ ︵1772 ᠣᠨ︶ ᠳᠤ | ᠪᠠᠯᠵᠤᠤᠷ ᠲᠤᠰᠠᠯᠠᠭᠴᠢ ᠨᠠᠶᠠ ᠭᠠᠷᠴᠤ᠂ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠬᠤᠰᠢᠭᠤ ᠵᠠᠰᠠᠭ ᠪᠠᠲᠤ ᠳᠤ | ᠲᠤᠰᠢᠶᠠᠯ ᠠᠴᠠ ᠪᠠᠨ ᠪᠠᠭᠤᠬᠤ ᠪᠠᠷ ᠭᠤᠶᠤᠴᠢᠯᠠᠭᠰᠠᠨ ᠪᠥᠭᠡᠳ ᠣᠮᠪᠣᠯᠣ ᠬᠦᠦ ᠷᠠᠰᠢᠫᠣᠩᠰᠤᠭ ᠢᠶᠠᠨ ᠬᠤᠰᠢᠭᠤ | ᠲᠤᠰᠠᠯᠠᠭᠴᠢ ᠵᠠᠯᠭᠠᠮᠵᠢᠯᠠᠨ ᠡᠷᠭᠦᠮᠵᠢᠯᠡᠬᠦ ᠪᠠᠷ ᠲᠠᠨᠢᠯᠴᠠᠭᠤᠯᠵᠠᠢ᠃ ᠪᠠᠲᠤ ᠿᠧᠾᠧ ᠶᠢᠨ ᠵᠤᠰᠠᠭᠠᠯ ᠣᠷᠳᠣᠨ ᠳᠤ | ᠣᠴᠢᠵᠤ ᠬᠠᠭᠠᠨ ᠳᠤ ᠪᠠᠷᠠᠳᠠᠬᠤ ᠦᠶᠡ ᠳᠤ ᠲᠡᠭᠦᠨ ᠢ ᠳᠠᠭᠠᠭᠤᠯᠤᠨ ᠣᠴᠢᠵᠠᠢ᠂ ᠢᠩᠬᠢᠭᠡᠳ ᠲᠩᠷᠢ ᠲᠡᠳᠬᠦᠭᠴᠢ | ᠬᠠᠭᠠᠨ ᠤ ᠰᠣᠶᠣᠷᠬᠠᠯ ᠢ ᠬᠦᠷᠲᠡᠵᠦ ᠬᠤᠰᠢᠭᠤ ᠲᠤᠰᠠᠯᠠᠭᠴᠢ ᠶᠢᠨ ᠲᠤᠰᠢᠶᠠᠯ ᠢ ᠵᠠᠯᠭᠠᠮᠵᠢᠯᠠᠵᠠᠢ᠃ ᠲᠤᠰᠢᠶᠠᠯ ᠳᠤ | ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠪᠡᠭᠡᠵᠢᠩ ᠤᠨ ᠨᠠᠶᠢᠷᠠᠯᠲᠤ ᠨᠠᠶᠢᠷᠠᠮᠳᠠᠭᠤ ᠰᠦᠮᠡ ᠳᠤ ᠬᠦᠷᠴᠦ ᠲᠥᠪᠡᠳ ᠨᠣᠮ | ᠰᠤᠷᠴᠠᠢ᠃ ᠷᠠᠰᠢᠫᠣᠩᠰᠤᠭ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠮᠣᠩᠭᠤᠯ ᠤᠨ ᠲᠡᠦᠬᠡ ᠶᠢ ᠰᠡᠳᠬᠢᠯ ᠰᠢᠭᠤᠳᠤᠨ ᠰᠣᠳᠤᠯᠤᠭᠰᠠᠨ | ᠮᠦᠷᠲᠡᠭᠡᠨ ᠨᠠᠶᠢᠷᠠᠭᠤᠯᠤᠨ ᠡᠮᠬᠢᠳᠬᠡᠵᠡᠢ᠃ ᠲᠩᠷᠢ ᠲᠡᠳᠬᠦᠭᠴᠢ ᠶᠢᠨ ᠳᠥᠴᠢᠨ ᠣᠨ ︵1775 ᠣᠨ︶ ᠳᠤ 20 | ᠨᠠᠰᠤᠲᠠᠶ ᠳᠤ ᠪᠠᠨ ᠮᠣᠩᠭᠤᠯ ᠤᠨ ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠦᠬᠡ ᠶᠢᠨ ᠠᠪᠤᠷᠭᠤ ᠪᠦᠲᠦᠭᠡᠯ ︽ᠪᠣᠯᠣᠷ ᠡᠷᠢᠬᠡ︾ ᠶᠢ | ᠪᠢᠴᠢᠵᠡᠢ᠃ ᠲᠩᠷᠢ ᠲᠡᠳᠬᠦᠭᠴᠢ ᠶᠢᠨ ᠭᠤᠴᠢᠨ ᠳᠣᠯᠣᠳᠤᠭᠠᠷ ᠣᠨ ︵1772 ᠣᠨ︶ ᠠᠴᠠ ᠲᠩᠷᠢ | ᠲᠡᠳᠬᠦᠭᠴᠢ ᠶᠢᠨ ᠳᠥᠴᠢᠨ ᠣᠨ ᠬᠦᠷᠲᠡᠯᠡ ᠪᠠᠰᠠ ︽ᠰᠢᠷᠡᠭᠡᠲᠦ ᠭᠦᠦᠰᠢ ᠴᠣᠷᠵᠢ ᠶᠢᠨ ᠢᠵᠠᠭᠤᠷ ᠤᠨ ᠪᠯᠠᠮᠠ | ᠭᠡᠯᠢᠭᠵᠡᠯᠰᠠᠨ ᠰᠠᠶᠢᠨᠴᠣᠭᠲᠤ ᠭᠡᠭᠡᠨ ᠤ ᠨᠠᠮᠲᠠᠷ ᠰᠦᠰᠦᠭ ᠤᠨ ᠡᠭᠦᠳᠡ ᠶᠢ ᠨᠡᠭᠡᠭᠡᠭᠴᠢ ᠣᠷᠣᠰᠢᠪᠠᠢ︾ ᠬᠡᠮᠡᠬᠦ ᠨᠣᠮ ᠢ | ᠨᠠᠶᠢᠷᠠᠭᠤᠯᠤᠨ ᠪᠢᠴᠢᠵᠡᠢ᠃ ︽ᠪᠣᠯᠣᠷ ᠡᠷᠢᠬᠡ︾ ᠪᠣᠯ ᠷᠠᠰᠢᠫᠣᠩᠰᠤᠭ ᠤᠨ ᠲᠥᠯᠥᠭᠡᠯᠡᠭᠴᠢ ᠪᠦᠲᠦᠭᠡᠯ ᠶᠤᠮ᠃ ᠲᠤᠰ | ᠨᠣᠮ ᠤᠨ ᠬᠠᠭᠤᠳᠠᠰᠤ ᠬᠡᠪᠴᠢᠶᠡ ᠨᠢ ᠠᠤᠭᠠ ᠶᠡᠭᠡ᠂ ᠰᠲ᠋ᠢᠯᠢ ᠬᠡᠯᠪᠡᠷᠢ ᠨᠢ ᠨᠠᠷᠢᠨ ᠨᠢᠭᠲᠠ᠂ ᠠᠭᠤᠯᠭᠠ | ᠤᠳᠬᠠ ᠨᠢ ᠨᠠᠷᠢᠨ ᠪᠣᠳᠠᠲᠠᠢ᠂ ᠦᠭᠡ ᠦᠭᠦᠯᠡᠪᠦᠷᠢ ᠨᠢ ᠠᠪᠰᠠᠷᠬᠠᠨ ᠣᠶᠢᠯᠠᠭᠠᠮᠵᠢᠲᠠᠢ ᠪᠠᠶᠢᠳᠠᠭ᠃ ᠲᠡᠷᠡ ᠡᠨᠡ ᠬᠦ | ᠪᠦᠲᠦᠭᠡᠯ ᠢᠶᠠᠷ ᠢᠶᠠᠨ ᠳᠠᠮᠵᠢᠭᠤᠯᠤᠨ ᠮᠣᠩᠭᠤᠯ ᠤᠨ ᠲᠡᠦᠬᠡ ᠰᠤᠳᠤᠯᠭᠠᠨ ᠤ ᠲᠠᠯᠠ ᠪᠠᠷ ᠮᠠᠰᠢ ᠤᠯᠠᠨ ᠥᠪᠡᠷᠮᠢᠴᠡ | ᠦᠵᠡᠯᠲᠡ ᠪᠠᠨ ᠳᠤᠷᠠᠳᠴᠤ ᠵᠠᠷᠢᠮ ᠢ ᠨᠢ ᠲᠤᠰᠬᠠᠶ ᠥᠭᠦᠯᠡᠯ ᠪᠣᠯᠭᠠᠨ ᠪᠢᠴᠢᠭᠰᠡᠨ ᠪᠠᠶᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠤ | ᠬᠤᠵᠢᠮ ᠤᠨ ᠤᠳᠤᠮ ᠤᠭᠰᠠᠭᠠ ᠬᠤᠶᠢᠴᠢᠰ ᠤᠨ ᠵᠢᠭᠰᠠᠯ ᠢ ᠣᠨᠴᠠ ᠪᠦᠷᠢᠨ ᠪᠦᠲᠦᠨ ᠲᠡᠮᠳᠡᠭᠯᠡᠵᠦ ᠮᠣᠩᠭᠤᠯ ᠤᠨ | ᠣᠨ ᠳᠠᠷᠠᠭᠠᠯᠠᠭᠰᠠᠨ ᠲᠡᠦᠬᠡ ᠶᠢᠨ ᠬᠡᠯᠪᠡᠷᠢ ᠶᠢ ᠲᠡᠭᠦᠯᠳᠡᠷᠵᠢᠭᠦᠯᠵᠡᠢ᠃ ᠡᠨᠡ ᠪᠢᠴᠢᠭ ᠨᠢ ᠤᠳᠤᠷᠢᠳᠬᠠᠯ ᠪᠣᠯᠤᠨ | ᠲᠠᠪᠤᠨ ᠲᠤᠰᠬᠠᠶ ᠪᠦᠯᠦᠭ ᠢᠶᠠᠷ ᠪᠦᠷᠢᠯᠳᠦᠵᠦ᠂ ᠤᠳᠤᠷᠢᠳᠬᠠᠯ ᠳᠤ ᠪᠠᠨ ᠲᠣᠰ ᠨᠣᠮ ᠢ ᠪᠢᠴᠢᠭᠰᠡᠨ ᠵᠣᠷᠢᠯᠭᠠ ᠪᠠ | ᠠᠴᠢ ᠬᠤᠯᠪᠣᠭᠳᠠᠯ ᠢ ᠲᠣᠳᠣᠷᠬᠠᠶᠢᠯᠠᠵᠤ᠂ ᠨᠣᠮ ᠤᠨ ᠨᠡᠷᠡ ᠶᠢ ︽ᠪᠣᠯᠣᠷ ᠡᠷᠢᠬᠡ︾ ᠬᠡᠮᠡᠨ ᠨᠡᠷᠡᠶᠢᠳᠦᠭᠰᠡᠨ ᠲᠤᠬᠠᠶ | ᠲᠠᠶᠢᠯᠪᠤᠷᠢᠯᠠᠵᠠᠢ᠃ ᠨᠢᠭᠡᠳᠦᠭᠡᠷ᠂ ᠬᠤᠶᠠᠳᠤᠭᠠᠷ ᠪᠦᠯᠦᠭ ᠲᠤ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠡᠭᠦᠰᠦᠯ ᠭᠠᠷᠤᠯ ᠢ | ᠲᠡᠮᠳᠡᠭᠯᠡᠵᠦ᠂ ᠮᠣᠩᠭᠤᠯ ᠬᠢᠲᠠᠳ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠳᠣᠲᠣᠷᠠᠬᠢ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠤᠭᠰᠠᠭᠠ | ᠰᠤᠷᠪᠤᠯᠵᠢ ᠶᠢᠨ ᠲᠤᠬᠠᠢ ᠠᠳᠠᠯᠢ ᠪᠤᠰᠤ ᠳᠤᠷᠠᠳᠤᠯᠭᠠ ᠶᠢ ᠰᠣᠩᠭᠤᠨ ᠥᠭᠦᠯᠡᠵᠦ᠂ ᠴᠢᠩᠭᠢᠰ ᠬᠠᠭᠠᠨ ᠤ ᠡᠪᠦᠭᠡ | ᠳᠡᠭᠡᠳᠦᠰ ᠪᠦᠷᠳᠡ ᠴᠢᠨᠤᠸᠠ ᠠᠴᠠ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤᠨ ᠦᠶᠡ ᠬᠦᠷᠲᠡᠯᠡᠬᠢ ᠮᠣᠩᠭᠤᠯ ᠦᠨᠳᠦᠰᠦᠲᠡᠨ ᠤ | ᠲᠡᠦᠬᠡᠨ ᠪᠠᠶᠢᠳᠠᠯ ᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠨᠠ᠃ ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠪᠣᠯ ︽ᠪᠣᠯᠣᠷ ᠡᠷᠢᠬᠡ︾ ᠶᠢᠨ ᠭᠤᠣᠯ | ᠬᠡᠰᠡᠭ ᠪᠣᠯᠣᠨᠠ᠂ ᠴᠢᠩᠭᠢᠰ ᠬᠠᠭᠠᠨ ᠠᠴᠠ ᠰᠡᠭᠦᠯᠡᠷᠬᠢ ᠶᠤᠸᠠᠨ ᠤᠯᠤᠰ ᠤᠨ ᠦᠶᠡ ᠶᠢᠨ ᠡᠯᠡ ᠬᠠᠭᠠᠳ ᠪᠣᠯᠣᠨ | ᠶᠤᠸᠠᠨ ᠤᠯᠤᠰ ᠤᠨ ᠬᠥᠭᠵᠢᠨ ᠮᠠᠨᠳᠤᠵᠤ᠂ ᠬᠦᠴᠦᠷᠬᠡᠭᠵᠢᠨ ᠪᠤᠵᠠᠭᠠᠶᠢᠷᠠᠭᠰᠠᠨ ᠪᠠ ᠤᠷᠤᠭᠤᠳᠠᠵᠤ ᠳᠣᠷᠦ᠋ᠢᠲᠠᠭᠰᠠᠨ | ᠶᠠᠪᠤᠴᠠ ᠬᠢᠭᠡᠳ ᠬᠤᠪᠢᠷᠠᠯᠲᠠ ᠶᠢᠨ ᠪᠠᠶᠢᠳᠠᠯ ᠢ ᠲᠡᠮᠳᠡᠭᠯᠡᠵᠡᠢ᠃ ᠳᠥᠷᠪᠡᠳᠦᠭᠡᠷ ᠲᠠᠪᠤᠳᠤᠭᠠᠷ ᠪᠦᠯᠦᠭ ᠲᠤ | ᠮᠣᠩᠭᠤᠯ ᠤᠨ ᠣᠯᠠᠨ ᠬᠠᠭᠠᠳ ᠠᠶᠢᠮᠠᠭ ᠢᠯᠠᠩᠭᠤᠶᠠ ᠯᠢᠭᠳᠡᠨ ᠬᠠᠭᠠᠨ ᠤ ᠨᠢᠭᠡ ᠨᠠᠰᠤᠨ ᠤ ᠥᠩᠭᠡᠷᠡᠯᠲᠡ᠂ ᠯᠢᠭᠳᠡᠨ | ᠬᠠᠭᠠᠨ ᠤ ᠬᠥᠪᠡᠭᠦᠨ ᠡᠷᠬᠡ ᠬᠤᠩᠭᠤᠷ ᠤᠨ ᠴᠢᠩ ᠤᠯᠤᠰ ᠢ ᠳᠠᠭᠠᠭᠰᠠᠨ ᠥᠩᠭᠡᠷᠡᠯᠲᠡ᠂ ᠴᠢᠩᠭᠢᠰ ᠬᠠᠭᠠᠨ ᠤ | ᠣᠯᠠᠨ ᠳᠡᠭᠦᠦ ᠨᠠᠷ᠂ ᠣᠯᠠᠨ ᠬᠥᠪᠡᠭᠦᠳ ᠬᠤᠶᠢᠴᠢᠰ᠂ ᠮᠣᠩᠭᠤᠯ ᠤᠨ ᠣᠯᠠᠨ ᠠᠶᠢᠮᠠᠭ ᠤᠨ ᠨᠣᠶᠠᠳ ᠤᠨ ᠤᠳᠤᠮ | ᠤᠭᠰᠠᠭᠠ᠂ ᠠᠯᠳᠠᠨ ᠬᠠᠭᠠᠨ ᠵᠢᠴᠢ ᠪᠤᠷᠬᠠᠨ ᠱᠠᠰᠢᠨ ᠮᠣᠩᠭᠤᠯ ᠳᠤ ᠤᠯᠠᠮᠵᠢᠯᠠᠭᠳᠠᠨ ᠣᠷᠣᠵᠤ ᠢᠷᠡᠭᠰᠡᠨ ᠵᠡᠷᠭᠡ | ᠶᠠᠪᠤᠳᠠᠯ ᠤᠳ ᠢ ᠲᠡᠮᠳᠡᠭᠯᠡᠵᠡᠢ᠃ ᠷᠠᠰᠢᠫᠣᠩᠰᠤᠭ ᠤᠨ ᠲᠡᠦᠬᠡ ᠰᠤᠳᠤᠯᠤᠯ ᠤᠨ ᠦᠵᠡᠯᠲᠡ ᠵᠢᠴᠢ ︽ᠪᠣᠯᠣᠷ ᠡᠷᠢᠬᠡ︾ | ᠶᠢᠨ ᠲᠡᠦᠬᠡ ᠰᠤᠳᠤᠯᠤᠯ ᠤᠨ ᠦᠨᠡ ᠦᠷᠳᠡᠭ ᠨᠢ ᠬᠤᠵᠢᠮ ᠤᠨ ᠬᠥᠮᠦᠰ ᠤᠨ ᠠᠩᠬᠠᠷᠤᠯ ᠢ ᠲᠠᠲᠠᠭᠰᠠᠨ ᠪᠠᠶᠢᠳᠠᠭ᠃ | ᠤᠯᠤᠰ ᠤᠨ ᠳᠣᠲᠣᠭᠠᠳᠤ ᠭᠠᠳᠠᠭᠠᠳᠤ ᠶᠢᠨ ᠡᠷᠳᠡᠮᠲᠡᠳ ᠥᠭᠦᠯᠡᠯ ᠰᠢᠭᠦᠮᠵᠢ ᠨᠡᠶᠢᠲᠡᠯᠡᠵᠦ ᠲᠡᠭᠦᠨ ᠢ ᠴᠢᠩ | ᠤᠯᠤᠰ ᠤᠨ ᠦᠶᠡ ᠶᠢᠨ ᠠᠮᠵᠢᠯᠲᠠ ᠪᠦᠲᠦᠭᠡᠯ ᠲᠠᠢ ᠮᠣᠩᠭᠤᠯ ᠲᠡᠦᠬᠡᠴᠢᠨ ᠤ ᠨᠢᠭᠡ ᠮᠥᠨ ᠭᠡᠵᠦ ᠦᠨᠡᠯᠡᠵᠦ ᠪᠠᠶᠢᠵᠠᠢ | ᠃ ︽ᠰᠢᠷᠡᠭᠡᠲᠦ ᠭᠦᠦᠰᠢ ᠴᠣᠷᠵᠢ ᠶᠢᠨ ᠢᠵᠠᠭᠤᠷ ᠤᠨ ᠪᠯᠠᠮᠠ ᠭᠡᠯᠢᠭᠵᠡᠯᠰᠠᠨ ᠰᠠᠶᠢᠨᠴᠣᠭᠲᠤ ᠭᠡᠭᠡᠨ ᠤ ᠨᠠᠮᠲᠠᠷ | ᠰᠦᠰᠦᠭ ᠤᠨ ᠡᠭᠦᠳᠡ ᠶᠢ ᠨᠡᠭᠡᠭᠡᠭᠴᠢ ᠣᠷᠣᠰᠢᠪᠠᠢ︾ ᠬᠡᠮᠡᠬᠦ ᠨᠣᠮ ᠪᠣᠯ ᠷᠠᠰᠢᠫᠣᠩᠰᠤᠭ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠭᠠᠷᠤᠨ | ᠬᠤᠰᠢᠭᠤᠨ ᠤ ᠬᠤᠰᠢᠭᠤ ᠵᠠᠰᠠᠭ ᠪᠠᠲᠤ ᠵᠢᠶᠦ᠋ᠨ ᠸᠠᠩ ᠤᠨ ᠵᠠᠷᠯᠢᠭ ᠢᠶᠠᠷ ᠬᠤᠰᠢᠭᠤᠨ ᠤ ᠵᠡᠭᠦᠨ ᠪᠡᠶᠡ ᠳᠤ ᠪᠠᠶᠢᠭᠠ | ᠰᠣᠶᠣᠯ ᠢ ᠳᠡᠯᠭᠡᠷᠡᠭᠦᠯᠦᠭᠴᠢ ᠰᠦᠮᠡ ︵ᠠᠭᠤᠢ ᠶᠢᠨ ᠰᠦᠮᠡ︶ ᠳᠤ ᠣᠴᠢᠵᠤ᠂ ᠭᠡᠯᠢᠭᠵᠡᠯᠰᠠᠨ ᠰᠠᠶᠢᠨᠴᠣᠭᠲᠤ ᠶᠢ | ᠪᠠᠷᠠᠭᠠᠳᠠᠨ ᠰᠤᠷᠪᠤᠯᠵᠢᠯᠠᠵᠤ᠂ ᠲᠡᠭᠦᠨ ᠢ ᠪᠢᠴᠢᠭᠰᠡᠨ ᠨᠠᠮᠲᠠᠷ ᠪᠣᠯᠣᠨᠠ᠃ ᠰᠠᠶᠢᠨᠴᠣᠭᠲᠤ ᠪᠣᠯ ᠪᠠᠭᠠᠷᠢᠨ ᠬᠥᠮᠦᠨ᠂ | ᠨᠠᠰᠤᠨ ᠲᠤᠷᠰᠢ ᠳᠤ ᠪᠠᠨ ᠪᠤᠷᠬᠠᠨ ᠱᠠᠰᠢᠨ ᠳᠤ ᠰᠢᠮᠳᠠᠨ᠂ ᠴᠥᠬᠦᠷᠡᠰᠢ ᠦᠭᠡᠢ ᠵᠣᠷᠢᠭ ᠲᠠᠢ᠂ ᠬᠦᠴᠢᠷ | ᠪᠡᠷᠬᠡᠰᠢᠶᠡᠯ ᠠᠴᠠ ᠠᠶᠤᠳᠠᠭ ᠦᠭᠡᠢ᠂ ᠤᠷᠢᠳ ᠬᠤᠵᠢᠳ ᠬᠤᠶᠠᠷ ᠤᠳᠠᠭᠠ ᠲᠥᠪᠡᠳ ᠲᠤ ᠣᠷᠣᠵᠤ ᠨᠣᠮ ᠰᠤᠳᠤᠷ | ᠪᠢᠰᠢᠯᠭᠠᠵᠤ᠂ ᠪᠤᠷᠬᠠᠨ ᠱᠠᠰᠢᠨ ᠢ ᠤᠯᠠᠮᠵᠢᠯᠠᠬᠤ ᠶᠢᠨ ᠲᠥᠯᠥᠭᠡ ᠴᠤᠴᠠᠯᠲᠠ ᠦᠭᠡᠶ ᠴᠢᠷᠮᠠᠶᠢᠵᠤ᠂ ᠳᠣᠯᠣᠳᠤᠭᠠᠷ | ᠲᠦᠷᠢ ᠶᠢᠨ ᠲᠡᠯᠡᠢ ᠯᠠᠮᠠ ᠶᠢᠨ ᠰᠠᠶᠢᠰᠢᠶᠠᠯ ᠢ ᠬᠦᠷᠲᠡᠵᠡᠢ᠃ ᠲᠡᠷᠡ ᠨᠣᠮ ᠰᠤᠳᠤᠷ ᠪᠢᠰᠢᠯᠭᠠᠵᠤ ᠪᠤᠷᠬᠠᠨ ᠱᠠᠰᠢᠨ ᠢ | ᠳᠡᠯᠭᠡᠷᠡᠭᠦᠯᠳᠡᠭ ᠢᠶᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠬᠥᠳᠡᠭᠡ ᠨᠤᠲᠤᠭ ᠢᠶᠠᠷ ᠡᠮᠴᠢᠯᠡᠨ ᠲᠣᠭᠤᠷᠢᠳᠠᠭ᠃ ᠷᠠᠰᠢᠫᠣᠩᠰᠤᠭ | ᠲᠣᠰ ᠨᠣᠮ ᠳᠤ ᠪᠠᠨ ᠰᠠᠶᠢᠨᠴᠣᠭᠲᠤ ᠶᠢᠨ ᠱᠠᠰᠢᠨ ᠰᠤᠷᠲᠠᠬᠤᠨ ᠢᠶᠠᠷ ᠬᠥᠭᠦᠷᠭᠡ ᠪᠣᠯᠭᠠᠵᠤ ᠪᠠᠭᠠᠷᠢᠨ ᠨᠤᠲᠤᠭ ᠪᠣᠯᠣᠨ | ᠴᠠᠰᠤᠲᠤ ᠠᠭᠤᠯᠠ ᠶᠢᠨ ᠠᠷᠢᠭᠤᠨ ᠣᠷᠣᠨ ᠤ ᠶᠠᠪᠤᠯᠴᠠᠭᠠ ᠶᠢ ᠨᠡᠪᠲᠡᠷᠡᠭᠦᠯᠵᠦ᠂ ᠮᠣᠩᠭᠤᠯ ᠲᠥᠪᠡᠳ ᠤᠨ | ᠬᠤᠭᠤᠷᠣᠨᠳᠣᠬᠢ ᠰᠣᠶᠣᠯ ᠤᠨ ᠰᠣᠯᠢᠯᠴᠠᠭᠠ ᠶᠢ ᠠᠬᠢᠭᠤᠯᠤᠨ᠂ ᠲᠥᠪᠡᠳ ᠡᠮ ᠲᠠᠩ ᠮᠣᠩᠭᠤᠯ ᠣᠷᠣᠨ ᠳᠤ | ᠳᠡᠯᠭᠡᠷᠡᠨ ᠬᠥᠭᠵᠢᠬᠦ ᠶᠢ ᠠᠬᠢᠭᠤᠯᠤᠭᠰᠠᠨ ᠢ ᠮᠠᠭᠲᠠᠨ ᠰᠠᠶᠢᠰᠢᠶᠠᠵᠠᠢ᠃ ᠡᠨᠡ ᠬᠦ ᠨᠣᠮ ᠨᠢ ᠣᠳᠣ ᠪᠣᠯᠲᠠᠯᠠ | ᠤᠯᠠᠮᠵᠢᠯᠠᠭᠳᠠᠵᠤ᠂ ᠤᠯᠤᠰ ᠤᠨ ᠳᠣᠲᠣᠭᠠᠳᠤ ᠭᠠᠳᠠᠭᠠᠳᠤ ᠳᠤ ᠮᠠᠰᠢ ᠶᠡᠭᠡ ᠨᠥᠯᠥᠭᠡ ᠦᠵᠡᠭᠦᠯᠵᠦ ᠪᠤᠢ᠃ | |