ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠴᠠᠭ ᠠᠭᠠᠷ ᠰᠢᠨᠵᠢᠬᠦ ᠮᠣᠩᠭᠤᠯ ᠠᠷᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2016-12-28
     ᠮᠠᠯᠴᠢᠨ ᠲᠦᠮᠡᠨ ᠡᠪᠦᠭᠡ ᠳᠡᠭᠡᠳᠦᠰ ᠮᠠᠨᠢ ᠪᠠᠶᠢᠭᠠᠯᠢ ᠶᠢᠨ ᠡᠯᠳᠡᠪ ᠶᠠᠭᠤᠮᠠᠰ ᠦᠵᠡᠭᠳᠡᠯ ᠤᠨ ᠬᠤᠯᠪᠣᠭ᠎ᠠ ᠬᠠᠮᠢᠶᠠᠷᠤᠯ ᠢ ᠰᠣᠷᠭᠤᠭ ᠢᠶᠠᠷ ᠠᠵᠢᠭᠯᠠᠨ ᠡᠷᠭᠢᠴᠡᠭᠦᠯᠦᠨ ᠳ᠋ᠦᠩᠨᠡᠵᠦ ᠠᠮᠢᠳᠤᠷᠠᠯ ᠠᠬᠤᠢ ᠳᠠᠭᠠᠨ ᠮᠥᠷᠳᠡᠯᠭᠡ ᠪᠣᠯᠭᠠᠵᠤ ᠢᠷᠡᠭᠰᠡᠨ ᠪᠠᠶᠠᠯᠢᠭ ᠤᠯᠠᠮᠵᠢᠯᠠᠯ ᠲᠠᠢ᠃ ᠲᠡᠭᠦᠨ ᠤ ᠨᠢᠭᠡᠨ ᠵᠢᠱᠢᠶ᠎ᠡ ᠪᠣᠯ ᠨᠠᠷᠠ᠂ ᠰᠠᠷᠠ᠂ ᠣᠳᠣᠳ ᠤᠨ ᠲᠣᠬᠢᠶᠠᠯ᠂ ᠡᠭᠦᠯᠡ᠂ ᠠᠭᠠᠷ ᠰᠠᠯᠬᠢᠨ ᠤ ᠬᠤᠪᠢᠰᠤᠯ ᠬᠥᠳᠡᠯᠭᠡᠭᠡᠨ ᠢᠶᠠᠷ ᠢᠷᠡᠬᠦ ᠴᠠᠭ ᠤᠨ ᠲᠡᠭᠷᠢ ᠶᠢᠨ ᠠᠶᠠᠰ ᠢ ᠤᠷᠢᠳᠴᠢᠯᠠᠨ ᠮᠡᠳᠡᠵᠦ ᠪᠠᠶᠢᠭᠰᠠᠨ ᠶᠠᠪᠤᠳᠠᠯ ᠪᠢᠯᠡ᠃ ᠠᠮᠢᠳᠤᠷᠠᠯ᠂ ᠡᠳ᠋ ᠠᠬᠤᠢ ᠶᠢᠨ ᠵᠦᠢᠯᠡᠰ ᠢᠶᠠᠷ — — ᠪᠡᠶ᠎ᠡ ᠨᠣᠵᠣᠭᠤᠷᠠᠨ ᠵᠠᠯᠬᠠᠭᠤ ᠬᠦᠷᠴᠦ ᠨᠣᠶᠢᠷᠮᠣᠭᠯᠠᠪᠠᠯ ᠵᠤᠨ ᠤ ᠴᠠᠭ ᠲᠤ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠪᠡᠶ᠎ᠡ ᠬᠦᠨᠳᠦᠷᠡᠨ ᠤᠭᠤᠴᠠ ᠪᠠᠷ ᠬᠥᠰᠢᠵᠦ ᠨᠢᠳᠦ ᠪᠦᠷᠦᠯᠵᠡᠨ ᠲᠠᠷᠢᠬᠢ ᠲᠣᠯᠣᠭᠠᠢ ᠮᠠᠨᠠᠷᠠᠬᠤ ᠨᠢ ᠲᠩᠷᠢ ᠡᠪ ᠦᠭᠡᠶᠢᠷᠡᠬᠦ ᠶᠢᠨ ᠲᠡᠮᠳᠡᠭ᠃ — — ᠭᠠᠩᠰᠠᠨ ᠤ ᠪᠣᠬᠢ ᠲᠦᠭᠵᠢᠷᠡᠵᠦ ᠤᠰᠣᠳᠠᠵᠣ ᠢᠷᠡᠬᠦ ᠨᠢ ᠲᠩᠷᠢ ᠮᠠᠭᠤᠳᠠᠵᠤ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠤᠭᠤᠲᠠ ᠰᠠᠪᠠ ᠲᠠᠢ ᠲᠠᠮᠠᠬᠢ ᠳᠠᠪᠤᠰᠤ ᠴᠢᠭᠢᠭᠳᠡᠬᠦ ᠨᠢ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠬᠡᠳᠦᠶᠢᠪᠡᠷ ᠰᠡᠷᠢᠭᠦᠪᠲᠦᠷ ᠬᠦᠢᠲᠡᠨ ᠪᠠᠶᠢᠪᠠᠴᠤ ᠪᠠᠶᠢᠰᠢᠩ ᠤᠨ ᠴᠣᠩᠬᠤ ᠬᠥᠯᠥᠷᠡᠬᠦ ᠨᠢ ᠳᠤᠯᠠᠭᠠᠷᠠᠬᠤ ᠶᠢᠨ ᠰᠢᠨᠵᠢ᠃ — — ᠬᠥᠭᠵᠢᠮ ᠤᠨ ᠤᠲᠠᠰᠤ ᠣᠷᠲᠤᠰᠤᠨ ᠮᠤᠯᠲᠤᠷᠠᠭᠠᠳ ᠪᠠᠶᠢᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ᠂ ᠲᠠᠰᠤᠷᠠᠭᠠᠳ ᠪᠠᠶᠢᠪᠠᠯ ᠠᠭᠠᠷ ᠬᠠᠭᠤᠷᠠᠢ ᠲᠩᠷᠢ ᠰᠠᠶᠢᠬᠠᠨ ᠪᠠᠶᠢᠬᠤ ᠶᠢᠨ ᠲᠡᠮᠳᠡᠭ᠃ — — ᠵᠤᠤᠬ᠎ᠠ᠂ ᠫᠢᠰᠢᠩ ᠳᠤ ᠬᠢᠭᠰᠡᠨ ᠮᠣᠳᠣ ᠶᠢ ᠠᠰᠠᠭᠠᠬᠤ ᠳᠤ ᠳᠦᠷᠡᠯᠵᠡᠨ ᠰᠢᠲᠠᠵᠤ ᠳᠦᠯᠦ ᠨᠢ ᠬᠦᠬᠡᠭᠡ ︵ᠬᠦᠨᠳᠡᠢ︶ ᠣᠷᠣᠭᠤ ᠪᠠᠨ ᠲᠠᠲᠠᠭᠳᠠᠵᠤ ᠪᠠᠶᠢᠪᠠᠯ ᠰᠠᠯᠬᠢ᠂ ᠰᠢᠭᠤᠷᠭ᠎ᠠ ᠪᠣᠯᠬᠤ ᠶᠢᠨ᠂ ᠮᠣᠳᠣ ᠴᠠᠳ ᠫᠠᠳᠬᠢᠨ ᠳᠣᠣᠭᠠᠷᠣᠨ ᠤᠲᠤᠭ᠎ᠠ ᠰᠠᠪᠰᠠᠨ ᠮᠠᠭᠤ ᠰᠢᠲᠠᠵᠤ ᠪᠠᠶᠢᠪᠠᠯ ᠪᠣᠷᠤᠭ᠎ᠠ ᠬᠤᠷ᠎ᠠ ᠣᠷᠣᠬᠤ ᠪᠤᠶᠤ ᠳᠤᠯᠠᠭᠠᠨ ᠲᠣᠭᠲᠠᠭᠤᠨ ᠡᠳᠦᠷ ᠪᠣᠯᠬᠤ ᠶᠢᠨ ᠰᠢᠨᠵᠢ᠃ — — ᠠᠷᠭᠠᠯ ᠲᠦᠯᠡᠰᠢ ᠴᠢᠭᠢᠭᠳᠡᠪᠡᠯ ᠬᠤᠷ᠎ᠠ ᠣᠷᠣᠬᠤ ᠶᠢᠨ ᠲᠡᠮᠳᠡᠭ᠃ — — ᠶᠠᠨᠲᠤᠩ ᠤᠨ ᠤᠲᠤᠭ᠎ᠠ ᠡᠭ᠍ᠴᠡ ᠳᠡᠭᠡᠭᠰᠢ ᠪᠠᠨ ᠬᠥᠭᠡᠷᠴᠦ ᠪᠠᠶᠢᠪᠠᠯ ᠡᠳᠦᠷ ᠲᠡᠭᠡᠨ ᠰᠠᠯᠬᠢ ᠪᠠᠭ᠎ᠠ ᠲᠠᠢ ᠲᠣᠭᠲᠠᠭᠤᠨ ᠪᠠᠶᠢᠬᠤ ᠶᠢᠨ᠂ ᠤᠲᠤᠭ᠎ᠠ ᠬᠦᠭᠡᠷᠬᠦ ᠦᠭᠡᠢ ᠬᠤᠷᠭᠤᠳᠠᠬᠤ ᠪᠤᠶᠤ ᠬᠠᠵᠠᠭᠤ ᠲᠡᠰᠢ ᠪᠠᠨ ᠬᠡᠶᠢᠰᠴᠦ ᠪᠠᠶᠢᠪᠠᠯ ᠰᠠᠯᠬᠢ ᠰᠢᠷᠦᠭᠦᠰᠴᠦ ᠲᠩᠷᠢ ᠪᠦᠷᠬᠦᠵᠦ ᠬᠤᠷ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠲᠣᠭᠤᠭ᠎ᠠ ᠵᠤᠤᠬᠠᠨ ᠤ ᠬᠥ᠋ ᠰᠢᠲᠠᠵᠤ ᠢᠮᠠᠭᠠᠷᠠᠪᠠᠯ ︵ᠴᠤᠪᠤᠷᠠᠨ ᠰᠢᠲᠠᠬᠤ︶ ᠰᠢᠭᠤᠷᠴᠤ ᠰᠠᠯᠬᠢᠯᠠᠬᠤ ᠶᠢᠨ ᠳᠡᠮᠳᠡᠭ᠃ — — ᠵᠤᠤᠬᠠᠨ ᠳᠤ ᠠᠰᠠᠵᠤ ᠪᠤᠢ ᠳᠦᠯᠦ ᠤᠯᠠᠭᠠᠨ ᠥᠩᠭᠡ ᠲᠠᠢ ᠬᠠᠷᠠᠭᠳᠠᠪᠠᠯ ᠬᠦᠢᠲᠡᠷᠡᠨ᠎ᠡ᠂ ᠴᠠᠶᠢᠪᠤᠷ ᠪᠣᠯ ᠳᠤᠯᠠᠭᠠᠷᠠᠨ᠎ᠠ᠃ — — ᠬᠤᠪᠴᠠᠰᠤ᠂ ᠰᠤᠷ᠂ ᠪᠤᠰᠤᠳ ᠮᠠᠲ᠋ᠧᠷᠢᠶᠠᠯ ᠴᠢᠭᠢᠭ ᠳᠠᠭᠠᠭᠠᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠰᠢᠷᠢ ᠰᠠᠪᠬᠢᠨ ᠡᠳ᠋ᠯᠡᠯ ᠵᠦᠭᠡᠯᠡᠷᠡᠪᠡᠯ ᠬᠤᠷ᠎ᠠ ᠪᠣᠷᠤᠭ᠎ᠠ ᠣᠷᠣᠨ᠎ᠠ ᠭᠡᠵᠦ ᠮᠡᠳᠡ᠃ — — ᠢᠰᠡᠭᠡᠢ ᠳᠠᠪᠤᠤ ᠢᠯᠠᠩᠭᠤᠶ᠎ᠠ ᠪᠡᠷᠵᠡᠭᠡᠬᠡᠨ ᠪᠦᠷᠢᠶᠡᠰᠦ ᠭᠡᠷ ᠤᠨ ᠬᠢᠯᠭᠠᠰᠤᠨ ᠬᠤᠰᠢᠯᠠᠩ ᠪᠦᠰᠡ ᠳᠡᠭᠡᠰᠦᠨ ᠴᠤᠯᠪᠤᠭᠤᠷ ᠣᠯᠣᠰᠤ ᠠᠭᠰᠢᠵᠤ ᠴᠢᠩᠭᠠᠷᠠᠪᠠᠯ ᠲᠩᠷᠢ ᠪᠦᠷᠬᠦᠵᠦ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠰᠠᠪᠠᠯᠠᠭᠰᠠᠨ ᠬᠤᠷᠢᠶᠠᠭᠰᠠᠨ ᠨᠣᠣᠰᠣ ᠬᠢᠯᠭᠠᠰᠤ ᠴᠢᠭᠢᠭ ᠳᠠᠭᠠᠭᠠᠬᠤ ᠨᠢ ᠪᠣᠷᠤᠭ᠎ᠠ ᠬᠤᠷ᠎ᠠ ᠣᠷᠣᠬᠤ ᠶᠢᠨ ᠰᠠᠨᠠᠮᠵᠢ ᠭᠡᠵᠦ ᠪᠣᠳᠣ᠃ — — ᠠᠭᠠᠷ ᠤᠨ ᠳᠠᠷᠤᠯᠲᠠ ᠬᠡᠮᠵᠢᠬᠦ ᠪᠠᠭᠠᠵᠢ ᠦᠭᠡᠢ ᠪᠣᠯ ᠠᠷᠢᠬᠢᠨ ᠤ ᠰᠢᠯ ᠳᠤ ᠭᠤᠣᠯ ᠤᠨ ᠤᠰᠤᠨ ᠠᠴᠠ ᠲᠠᠯ᠎ᠠ ᠬᠤᠪᠢ ᠬᠦᠷᠲᠡᠯ᠎ᠡ ᠬᠢᠭᠡᠳ ᠰᠠᠶᠢᠲᠤᠷ ᠪᠥᠭᠯᠡᠵᠦ᠂ ᠠᠪᠳᠠᠷ᠎ᠠ ᠰᠢᠷᠡᠭᠡ ᠴᠣᠩᠬᠤᠨ ᠤ ᠲᠠᠪᠴᠠᠩ ᠳᠡᠭᠡᠷ᠎ᠡ ᠲᠠᠯᠪᠢᠭᠠᠳ ᠠᠰᠢᠭᠯᠠᠵᠤ ᠪᠣᠯᠣᠨ᠎ᠠ᠃ ᠰᠢᠯ ᠲᠠᠢ ᠤᠰᠤᠨ ᠤ ᠳᠡᠭᠡᠳᠦ ᠬᠡᠰᠡᠭ ᠲᠤ ᠰᠢᠯ ᠤᠨ ᠬᠠᠨᠠᠨ ᠳᠤ ᠤᠰᠤᠨ ᠤ ᠳᠤᠰᠤᠯ ᠲᠣᠭᠲᠠᠵᠤ ᠪᠠᠶᠢᠪᠠᠯ ᠲᠩᠷᠢ ᠤᠳᠠᠯ ᠦᠭᠡᠢ ᠮᠠᠭᠤᠳᠠᠬᠤ ᠶᠢᠨ᠂ ᠬᠡᠷᠪᠡ ᠲᠩᠷᠢ ᠡᠪ ᠦᠭᠡᠶᠢᠲᠡᠭᠰᠡᠨ ᠦᠶ᠎ᠡ ᠳᠤ ᠰᠢᠯ ᠤᠨ ᠬᠠᠨᠠᠨ ᠳᠠᠬᠢ ᠤᠰᠤᠨ ᠳᠤᠰᠤᠯ ᠠᠷᠢᠯᠣᠭᠰᠠᠨ ᠪᠣᠯ ᠲᠩᠷᠢ ᠰᠠᠶᠢᠵᠢᠷᠠᠬᠤ ᠶᠢᠨ ᠰᠢᠨᠵᠢ᠃ ᠭᠠᠵᠠᠷ ᠣᠷᠣᠨ ᠤ ᠪᠠᠶᠢᠳᠠᠯ᠂ ᠤᠷᠭᠤᠮᠠᠯ ᠡᠨᠡ ᠨᠢ ᠭᠠᠵᠠᠷ ᠤᠨ ᠭᠠᠷᠴᠠ᠂ ᠮᠣᠳᠣ᠂ ᠡᠪᠡᠰᠦ᠂ ᠤᠷᠭᠤᠮᠠᠯ ᠤᠨ ᠰᠢᠨᠵᠢ᠂ ᠤᠷᠭᠤᠬᠤ᠂ ᠮᠠᠨᠳᠤᠬᠤ᠂ ᠪᠠᠶᠢᠳᠠᠯ ᠲᠡᠭᠦᠨ ᠤ ᠬᠡᠪ ᠤᠨ ᠪᠤᠰᠤ ᠥᠭᠡᠷᠡᠴᠢᠯᠡᠯᠲᠡ ᠪᠠᠷ ᠲᠩᠷᠢ᠂ ᠴᠠᠭ ᠠᠭᠤᠷ ᠤᠨ ᠪᠠᠶᠢᠳᠠᠯ ᠢ ᠲᠥᠰᠥᠭᠡᠯᠡᠨ ᠦᠨᠡᠯᠡᠬᠦ ᠤᠯᠠᠮᠵᠢᠯᠠᠯᠲᠤ ᠠᠷᠭ᠎ᠠ ᠪᠢᠯᠡ᠃ ᠤᠷᠭᠤᠮᠠᠯ ᠰᠤᠳᠤᠯᠤᠭᠠᠴᠢᠳ ᠤᠨ ᠮᠡᠳᠡᠭᠡᠯᠡᠭᠰᠡᠨ ᠢᠶᠠᠷ 400 ᠭᠠᠷᠤᠢ ᠳᠦᠷᠰᠦ ᠶᠢᠨ ᠤᠷᠭᠤᠮᠠᠯ ᠠᠮᠢᠳᠤ ᠪᠠᠷᠣᠮᠧᠲᠷ ︵ᠠᠭᠠᠷ ᠤᠨ ᠳᠠᠷᠤᠯᠲᠠ ᠬᠡᠮᠵᠢᠭᠴᠢ︶ ᠭᠡᠭᠳᠡᠳᠡᠭ ᠠᠵᠢ᠃ — — ᠰᠥᠨᠢ ᠬᠤᠲᠣᠭᠤᠷ ᠬᠥᠨᠳᠡᠢ ᠭᠠᠵᠠᠷ ᠬᠦᠢᠲᠡᠪᠲᠦᠷ᠂ ᠳᠣᠪᠤ ᠲᠣᠯᠣᠭᠠᠳ ᠥᠨᠳᠥᠷ ᠭᠠᠵᠠᠷ ᠢᠶᠠᠷ ᠳᠤᠯᠠᠭᠠᠪᠲᠤᠷ ᠪᠠᠶᠢᠪᠠᠯ ᠮᠠᠷᠭᠠᠰᠢ ᠨᠢ ᠲᠩᠷᠢ ᠲᠣᠭᠲᠠᠭᠤᠨ ᠪᠠᠶᠢᠨ᠎ᠠ᠃ — — ᠬᠠᠪᠤᠷ ᠨᠣᠭᠤᠭ᠎ᠠ ᠭᠠᠷᠬᠤ ᠲᠠᠢ ᠵᠡᠷᠭᠡᠴᠡᠨ ᠮᠣᠳᠣ ᠨᠠᠪᠴᠢᠯᠠᠬᠤ ᠨᠢ ᠵᠤᠨ ᠳᠠᠭᠠᠨ ᠭᠠᠩᠳᠠᠬᠤ ᠶᠢᠨ ᠰᠢᠨᠵᠢ᠃ — — ᠡᠪᠦᠯ ᠮᠣᠳᠣ ᠱᠤᠤᠭᠢᠵᠤ ᠪᠠᠶᠢᠪᠠᠯ ᠳᠤᠯᠠᠭᠠᠷᠠᠬᠤ ᠶᠢᠨ ᠰᠢᠨᠵᠢ᠃ — — ᠠᠭᠤᠯᠠ ᠶᠢᠨ ᠮᠣᠳᠣ ᠳᠣᠣᠷ᠎ᠠ ᠲᠠᠯ᠎ᠠ ᠠᠴᠠ ᠪᠠᠨ ᠡᠬᠢᠯᠡᠨ ᠰᠢᠷᠠᠯᠠᠵᠣ ᠨᠠᠪᠴᠢ ᠰᠢᠯᠮᠦᠣᠰᠣ ᠨᠢ ᠲᠦᠷᠭᠡᠨ ᠤᠨᠠᠪᠠᠯ ᠴᠠᠰᠤ ᠪᠠᠭ᠎ᠠ ᠲᠠᠢ ᠳᠤᠯᠠᠭᠠᠨ ᠡᠪᠦᠯ ᠪᠣᠯᠣᠨ᠎ᠠ᠃ ᠣᠷᠣᠢ ᠪᠠᠷ ᠢᠶᠠᠨ ᠡᠬᠢᠯᠡᠨ ᠰᠢᠷᠠᠯᠠᠵᠣ ᠨᠠᠪᠴᠢ ᠰᠢᠯᠮᠦᠰᠦ ᠨᠢ ᠤᠳᠠᠭᠠᠨ ᠣᠶᠢᠴᠢᠪᠠᠯ ᠵᠣᠳᠷᠠᠬᠤ ᠪᠠᠶᠢᠬᠤ ᠶᠢᠨ ᠰᠢᠨᠵᠢ᠃ — — ᠡᠪᠦᠯ ᠤᠢ ᠳᠤ ᠲᠠᠰ ᠨᠢᠰᠬᠢᠨ ᠲᠠᠴᠢᠬᠢᠨᠠᠬᠤ ᠨᠢ ᠬᠦᠢᠲᠡᠨ ᠡᠳᠦᠷ᠂ ᠨᠠᠮᠤᠷ ᠡᠶᠢᠨ ᠬᠦ ᠳᠤᠤᠭᠠᠷᠬᠤ ᠠᠪᠠᠰᠣ ᠲᠣᠨᠣᠳᠠᠰᠣ ᠦᠭᠡᠢ ᠡᠳᠦᠷ ᠪᠣᠯᠣᠨ᠎ᠠ᠃ — — ᠡᠪᠦᠯ ᠮᠣᠳᠣᠨ ᠤ ᠮᠥᠴᠢᠷ ᠳᠡᠭᠡᠷ᠎ᠡ ᠴᠠᠰᠤ ᠪᠠᠭ᠎ᠠ ᠪᠠᠶᠢᠪᠠᠯ ᠵᠤᠨ ᠨᠢ ᠤᠢ ᠳᠤ ᠮᠥᠭᠦ ᠵᠢᠮᠢᠰ ᠪᠠᠭ᠎ᠠ ᠪᠠᠶᠢᠨ᠎ᠠ᠃ — — ᠭᠠᠴᠣᠷ᠎ᠠ ᠶᠢᠨ ᠬᠠᠭᠤᠷᠠᠢ ᠮᠥᠴᠢᠷ ᠪᠦᠬᠦᠶᠢᠭᠰᠡᠨ ᠪᠠᠶᠢᠪᠠᠯ ᠰᠢᠭᠤᠷᠭ᠎ᠠ ᠪᠣᠯᠬᠤ ᠶᠢᠨ ᠳᠣᠬᠢᠶ᠎ᠠ᠃ — — ᠰᠠᠯᠬᠢᠨ ᠳᠤ ᠮᠣᠳᠣᠨ ᠤ ᠨᠠᠪᠴᠢᠨ ᠤ ᠳᠡᠭᠡᠳᠦ ᠲᠠᠯ᠎ᠠ ᠨᠢ ᠳᠣᠭᠤᠭᠰᠢ ᠬᠠᠷᠠᠬᠤ ᠪᠤᠶᠤ ᠰᠠᠯᠬᠢ ᠦᠭᠡᠢ ᠡᠳᠦᠷ ᠤᠨᠠᠪᠠᠯ ᠪᠣᠷᠤᠭ᠎ᠠ ᠣᠷᠣᠨ᠎ᠠ᠃ — — ᠨᠠᠷᠠᠰᠤ ᠪᠣᠯᠣᠨ ᠭᠠᠴᠣᠷ᠎ᠠ ᠶᠢᠨ ᠮᠥᠴᠢᠷ ᠤᠨᠵᠢᠭᠰᠠᠨ ᠬᠠᠷᠠᠭᠳᠠᠪᠠᠯ ᠬᠤᠷ᠎ᠠ ᠣᠷᠣᠬᠤ ᠶᠢᠨ ᠳᠣᠬᠢᠶ᠎ᠠ᠃ — — ᠬᠤᠰᠤ ᠪᠣᠯᠣᠨ ᠴᠠᠷᠠᠰᠣᠨ ᠤ ᠨᠠᠪᠴᠢ ᠪᠦᠷᠢᠨ ᠭᠦᠪᠢᠭᠳᠡᠭᠡ ᠦᠭᠡᠢ ᠪᠣᠯ ᠬᠦᠢᠲᠡᠨ ᠡᠪᠦᠯ ᠪᠣᠯᠣᠨ᠎ᠠ᠃ — — ᠮᠣᠳᠣᠨ ᠤ ᠨᠠᠪᠴᠢ ᠶᠡᠷᠦᠳᠡ ᠶᠢᠨ ᠬᠢ ᠠᠴᠠ ᠪᠠᠨ ᠡᠷᠲᠡ ᠰᠢᠷᠠᠯᠠᠪᠠᠯ ᠡᠷᠲᠡ ᠨᠠᠮᠣᠷᠰᠢᠨ᠎ᠠ᠃ ᠣᠷᠣᠢ ᠰᠢᠷᠠᠯᠠᠪᠠᠯ ᠬᠠᠪᠤᠷ ᠣᠷᠣᠶᠢᠲᠠᠨ᠎ᠠ᠃ — — ᠬᠤᠰᠤ ᠠᠭᠴᠢ ︵ᠨᠠᠪᠴᠢ ᠵᠤᠯᠭᠠᠷᠠᠬᠤ ᠪᠠᠭᠠᠪᠲᠤᠷ ᠲᠤᠷᠤᠭ ᠮᠤᠳᠤ︶ ᠮᠣᠳᠣᠨ ᠠᠴᠠ ᠡᠷᠲᠡ ᠨᠠᠪᠴᠢᠯᠠᠪᠠᠯ ᠬᠠᠭᠤᠷᠠᠶᠢᠬᠠᠨ᠂ ᠣᠷᠣᠶᠢᠲᠠᠪᠠᠯ ᠪᠣᠷᠣᠭᠠᠷᠬᠠᠭ ᠵᠤᠨ ᠪᠣᠯᠣᠨ᠎ᠠ᠃ — — ᠠᠷᠪᠠᠳᠤᠭᠠᠷ ᠰᠠᠷ᠎ᠠ ᠶᠢᠨ ᠡᠬᠢᠨ ᠳᠤ ᠬᠤᠰᠤᠨ ᠤ ᠨᠠᠪᠴᠢ ᠤᠨᠠᠬᠤ ᠦᠭᠡᠢ ᠪᠣᠯ ᠴᠠᠰᠤ ᠣᠷᠣᠶᠢᠲᠠᠵᠤ ᠣᠷᠣᠨ᠎ᠠ᠃ — — ᠰᠠᠮᠤᠷ ᠶᠡᠭᠡ᠂ ᠮᠥᠭᠦ ᠪᠠᠭ᠎ᠠ ᠣᠷᠭᠤᠪᠠᠯ ᠴᠠᠰᠣᠷᠬᠠᠭ ᠬᠠᠲᠠᠭᠤ ᠡᠪᠦᠯ ᠪᠣᠯᠣᠨ᠎ᠠ᠃ — — ᠵᠤᠨ ᠵᠢᠮᠢᠰ ᠡᠯᠪᠡᠭ ᠣᠷᠭᠤᠪᠠᠯ ᠬᠦᠢᠲᠡᠨ᠂ ᠪᠠᠭ᠎ᠠ ᠣᠷᠭᠤᠪᠠᠯ ᠲᠤᠬᠠᠢ ᠶᠢᠨ ᠨᠤᠲᠤᠭ ᠲᠤ ᠥᠩ ᠲᠠᠢ ᠡᠪᠦᠯ ᠪᠣᠯᠣᠨ᠎ᠠ᠃ ᠬᠡᠪ ᠤᠨ ᠪᠠᠶᠢᠳᠠᠯ ᠲᠠᠢ ᠪᠣᠯ ᠥᠩ ᠲᠠᠢ ᠪᠠᠶᠢᠬᠤ ᠶᠢᠨ ᠰᠢᠨᠵᠢ᠃ — — ᠡᠪᠡᠰᠦ ᠤᠷᠭᠤᠮᠠᠯ ᠡᠰᠢ ᠪᠠᠨ ᠤᠷᠭᠤᠵᠤ ᠭᠦᠢᠴᠡᠭᠡ ᠦᠭᠡᠢ ᠪᠠᠶᠢᠬᠤ ᠳᠤ ᠲᠣᠯᠣᠭᠠᠶᠢᠯᠠᠵᠤ ᠴᠡᠴᠡᠭᠯᠡᠬᠦ  ᠨᠢ ᠭᠠᠩᠳᠠᠭᠤ ᠪᠠᠶᠢᠬᠤ ᠶᠢᠨ ᠰᠢᠨᠵᠢ᠃ — — ᠪᠡᠯᠴᠢᠭᠡᠷ ᠤᠨ ᠤᠷᠭᠤᠮᠠᠯ ᠡᠷᠲᠡ ᠬᠦᠷᠡᠩᠲᠡᠨ ᠲᠣᠯᠣᠭᠠᠶᠢᠯᠠᠪᠠᠯ ᠬᠠᠲᠠᠭᠤᠬᠠᠨ ᠡᠪᠦᠯ ᠪᠣᠯᠣᠨ᠎ᠠ᠃ — — ᠬᠠᠵᠠᠭᠠᠷ ᠡᠪᠡᠰᠦ ᠶᠡᠭᠡ ᠣᠷᠭᠤᠪᠠᠯ ᠡᠪᠦᠯ ᠳᠡᠭᠡᠨ ᠴᠠᠰᠤ ᠶᠡᠭᠡ ᠤᠨᠠᠨ᠎ᠠ᠃ — — ᠬᠢᠯᠭᠠᠨ᠎ᠠ ᠶᠡᠭᠡ ᠰᠢᠪᠡᠭᠡᠯᠡᠪᠡᠯ ᠶᠠᠯᠢᠮ ᠦᠭᠡᠢ ᠴᠠᠰᠤᠲᠠᠢ ᠡᠪᠦᠯ ᠲᠠᠢ ᠣᠴᠠᠷᠠᠬᠤ ᠶᠢᠨ ᠲᠡᠮᠳᠡᠭ᠃ — — ᠭᠤᠣᠯ ᠤᠨ ᠴᠠᠬᠢᠯᠳᠠᠭ ᠡᠷᠲᠡ ᠴᠡᠴᠡᠭᠯᠡᠪᠡᠯ ᠵᠤᠨ ᠳᠠᠭᠠᠨ ᠭᠠᠩᠳᠠᠭᠤ ᠪᠠᠶᠢᠬᠤ ᠶᠢᠨ ᠳᠣᠬᠢᠶ᠎ᠠ᠃ — — ᠴᠠᠭᠠᠨ ᠲᠦᠷᠦᠭᠦᠦ ᠶᠡᠭᠡ ᠤᠨᠠᠪᠠᠯ ᠵᠤᠨ ᠳᠠᠭᠠᠨ ᠭᠠᠩᠳᠠᠭᠤ ᠡᠪᠦᠯ ᠳᠡᠭᠡᠨ ᠵᠣᠳᠠᠷᠠᠭᠤ ᠪᠣᠯᠣᠨ᠎ᠠ᠃ — — ᠠᠯᠲᠠᠨᠬᠤᠨᠳᠠᠭ᠎ᠠ᠂ ᠬᠤᠩᠬᠤᠨ ᠴᠡᠴᠡᠭ᠂ ᠬᠠᠳᠠᠨ ᠤ ᠪᠤᠲᠠ ᠨᠠᠪᠴᠢ ᠪᠠᠨ ᠬᠤᠮᠢᠪᠠᠯ ᠪᠣᠷᠤᠭ᠎ᠠ ᠣᠷᠣᠨ᠎ᠠ᠃ — — ᠤᠷᠭᠤᠮᠠᠯ ᠭᠠᠩᠳᠠᠨ ᠰᠢᠷᠠᠯᠠᠭᠰᠠᠨ ᠤ ᠬᠤᠶᠢᠨ᠎ᠠ ᠡᠩᠭᠡᠷ ᠨᠥᠮᠥᠷᠢ ᠭᠠᠵᠠᠷ ᠢᠶᠠᠷ ᠨᠣᠭᠤᠭ᠎ᠠ ᠬᠡᠨᠵᠡᠯᠡᠨ ᠣᠷᠭᠤᠪᠠᠯ ᠥᠩ ᠲᠠᠢ ᠡᠪᠦᠯ ᠪᠣᠯᠬᠤ ᠶᠢᠨ ᠰᠢᠨᠵᠢ᠃ — — ᠠᠶᠢᠷᠠᠭ ᠤᠨ ᠴᠡᠴᠡᠭ ᠰᠥᠨᠢ ᠳᠡᠭᠡᠨ ᠳᠡᠯᠭᠡᠷᠡᠭᠰᠡᠨ ᠪᠠᠶᠢᠪᠠᠯ ᠪᠣᠷᠤᠭ᠎ᠠ ᠣᠷᠣᠨ᠎ᠠ᠃ — — ᠤᠯᠢᠶᠠᠩᠭᠠᠷ ᠪᠤᠷᠭᠠᠰᠤ᠂ ᠲᠠᠣᠯᠠᠢ ᠶᠢᠨ ᠪᠥᠭᠡᠷ᠎ᠡ ᠠᠭᠴᠢ ᠮᠣᠳᠣᠨ ᠠᠴᠠ ᠰᠢᠭᠦᠰᠦ ᠢᠯᠭᠠᠷᠠᠵᠤ ᠪᠠᠶᠢᠪᠠᠯ ᠤᠳᠠᠬᠤ ᠦᠭᠡᠢ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ ᠳᠣᠬᠢᠶ᠎ᠠ᠃ — — ᠭᠡᠷ ᠤᠨ ᠬᠤᠰᠢᠶᠠᠩᠭᠤᠷ ᠤᠨ ᠡᠰᠢ ᠴᠡᠭᠴᠡᠷᠡᠨ ᠪᠣᠰᠴᠤ᠂ ᠭᠢᠴᠢᠭᠡᠨ᠎ᠡ ᠨᠠᠪᠴᠢ ᠪᠠᠨ ᠳᠡᠯᠭᠡᠬᠦ ᠨᠢ ᠲᠩᠷᠢ ᠪᠦᠷᠬᠦᠵᠦ ᠬᠤᠷᠠᠰᠢᠬᠤ ᠶᠢᠨ ᠰᠢᠨᠵᠢ᠃ — — ᠬᠤᠩᠭᠤᠷᠵᠤᠯᠠ᠂ ᠮᠣᠶᠢᠯ᠂ ᠲᠡᠰ ᠤᠨ ᠴᠡᠴᠡᠭ ᠳᠡᠭᠡᠷ᠎ᠡ ᠵᠥᠭᠡᠢ ᠳᠦᠩᠭᠢᠨᠡᠯᠳᠦᠨ ᠴᠤᠭᠯᠠᠬᠤ ᠨᠢ ᠮᠠᠷᠭᠠᠰᠢ ᠲᠩᠷᠢ ᠰᠠᠶᠢᠬᠠᠨ ᠪᠠᠶᠢᠬᠤ ᠶᠢᠨ ᠰᠢᠨᠵᠢ᠃ — — ᠪᠠᠭᠠᠪᠠᠭᠠᠢ ᠴᠡᠴᠡᠭ ᠶᠡᠭᠡ ᠣᠷᠭᠤᠪᠠᠯ ᠪᠣᠷᠤᠭ᠎ᠠ ᠬᠤᠪᠣᠷ᠂ ᠵᠤᠨᠰᠢᠯᠭ᠎ᠠ ᠮᠠᠭᠤ ᠪᠣᠯᠬᠤ ᠶᠢᠨ ᠰᠢᠨᠵᠢ᠃ — — ᠬᠠᠩᠭᠠᠢ ᠳᠤ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠳᠤ ᠵᠢᠵᠢᠭ ᠴᠠᠭᠠᠨ ᠴᠡᠴᠡᠭ ᠡᠯᠪᠡᠭ ᠣᠷᠭᠤᠪᠠᠯ ᠬᠤᠷ᠎ᠠ ᠲᠠᠢ ᠪᠠᠶᠢᠬᠤ ᠶᠢᠨ ᠰᠢᠨᠵᠢ᠃ — — ᠪᠠᠭᠠᠪᠠᠭᠠᠢ ᠬᠤᠩᠬᠤᠨ ᠴᠡᠴᠡᠭ ᠳᠡᠯᠪᠢ ᠪᠠᠨ ᠳᠡᠯᠭᠡᠭᠰᠡᠨ ᠪᠠᠶᠢᠪᠠᠯ ᠲᠩᠷᠢ ᠰᠠᠶᠢᠬᠠᠨ ᠪᠣᠯᠣᠨ᠎ᠠ᠃ — — ᠯᠣᠣᠯᠢ ᠰᠢᠷᠠᠯᠵᠢ ᠥᠨᠳᠥᠷ ᠣᠷᠭᠤᠪᠠᠯ ᠡᠪᠦᠯ ᠴᠠᠰᠤ ᠶᠡᠭᠡ ᠤᠨᠠᠬᠤ ᠶᠢᠨ ᠰᠢᠨᠵᠢ᠃ — — ᠪᠠᠭᠠᠪᠠᠭᠠᠢ ᠴᠡᠴᠡᠭ ᠡᠷᠲᠡ ᠴᠡᠴᠡᠭᠯᠡᠪᠡᠯ ᠵᠤᠨ ᠪᠣᠭᠤᠨᠢ ᠪᠣᠯᠣᠨ᠎ᠠ᠃ — — ᠣᠢ ᠶᠢᠨ ᠢᠷᠭᠤᠢ ᠬᠡᠭᠡᠷ᠎ᠡ ᠲᠠᠯ᠎ᠠ ᠭᠠᠵᠠᠷ ᠵᠢᠷ ᠤᠨ ᠬᠢ ᠠᠴᠠ ᠥᠨᠳᠥᠷ ᠡᠰᠢ ᠲᠠᠢ ᠤᠷᠭᠤᠬᠤ ᠨᠢ ᠡᠪᠦᠯ ᠠᠭᠤᠯᠠᠨ ᠳᠠᠭᠠᠨ ᠶᠠᠭ ᠦᠭᠡᠢ ᠴᠠᠰᠤ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠡᠪᠡᠰᠦᠨ ᠤ ᠰᠥᠯ ᠡᠷᠲᠡ ᠠᠷᠢᠯᠪᠠᠯ ᠬᠠᠲᠠᠭᠤᠬᠠᠨ ᠡᠪᠦᠯ ᠪᠣᠯᠣᠨ᠎ᠠ᠃ ᠨᠠᠷᠠ᠂ ᠣᠳᠣ᠂ ᠰᠠᠷᠠ — — ᠥᠷᠯᠥᠭᠡᠨ ᠤ ᠨᠠᠷᠠ ᠶᠡᠷᠦᠳᠡ ᠶᠢᠨ ᠬᠢ ᠠᠴᠠ ᠲᠣᠮᠣ ᠶᠤᠮ ᠰᠢᠭ᠋ ᠮᠥᠷᠲᠡᠯ᠎ᠡ ᠪᠠᠨ ᠤᠯᠠᠭᠠᠨ ᠬᠦᠷᠡᠩ ᠥᠩᠭᠡ ᠲᠠᠢ᠂ ᠡᠭ᠍ᠴᠡ ᠳᠡᠭᠡᠭᠰᠢ ᠪᠠᠨ ᠰᠠᠴᠣᠷᠠᠭ ᠲᠠᠢ ᠦᠵᠡᠭᠳᠡᠪᠡᠯ ᠵᠤᠨ ᠪᠣᠯ ᠪᠣᠷᠤᠭ᠎ᠠ᠂ ᠡᠪᠦᠯ ᠪᠣᠯ ᠴᠠᠰᠤ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠨᠠᠷᠠ ᠮᠠᠨᠳᠤᠬᠤ ᠦᠶ᠎ᠡ ᠪᠠᠷ ᠮᠠᠨᠠᠨ ᠲᠠᠢ ᠪᠠᠶᠢᠪᠠᠯ ᠡᠳᠦᠷ ᠲᠡᠭᠡᠨ ᠴᠡᠯᠮᠡᠭ ᠪᠦᠭᠴᠢᠮ ᠪᠣᠯᠣᠨ᠎ᠠ᠃ — — ᠥᠷᠯᠥᠭᠡ ᠲᠩᠷᠢ ᠴᠡᠯᠮᠡᠭ᠂ ᠨᠠᠷᠠ ᠲᠣᠰᠣᠨ ᠴᠠᠭᠠᠨ᠂ ᠰᠠᠴᠤᠷᠠᠭ ᠨᠢ ᠬᠤᠷᠴᠠ ᠪᠠᠶᠢᠪᠠᠯ ᠡᠳᠦᠷ ᠲᠡᠭᠡᠨ ᠲᠩᠷᠢ ᠮᠠᠭᠤᠳᠠᠬᠤ ᠦᠭᠡᠢ᠃ — — ᠣᠷᠣᠢ ᠳᠠᠭᠠᠨ ᠨᠠᠷᠠ ᠶᠠᠭᠠᠪᠲᠤᠷ ᠠᠯᠲᠠᠨ ᠰᠢᠷᠭᠠᠯ ᠥᠩᠭᠡ ᠲᠠᠢ ᠪᠠᠶᠢᠭᠠᠳ ᠨᠣᠭᠤᠭᠠᠪᠲᠤᠷ ᠪᠣᠯᠵᠤ ᠵᠢᠷᠭᠠᠪᠠᠯ ᠮᠠᠷᠭᠠᠰᠢ ᠨᠢ ᠬᠤᠷ᠎ᠠ ᠲᠣᠨᠣᠳᠠᠰᠣ ᠦᠭᠡᠢ᠂ ᠰᠥᠨᠢ ᠳᠡᠭᠡᠨ ᠬᠦᠢᠲᠡᠨ ᠰᠡᠷᠢᠭᠦᠨ ᠪᠠᠶᠢᠬᠤ ᠪᠣᠯᠪᠠᠴᠤ ᠲᠩᠷᠢ ᠠᠶᠠᠲᠠᠶᠢᠬᠠᠨ ᠪᠠᠶᠢᠨ᠎ᠠ᠃ — — ᠨᠠᠷᠠ ᠤᠯᠠᠪᠣᠷ ᠥᠩᠭᠡ ᠲᠠᠢ ᠵᠢᠷᠭᠠᠬᠤ ᠪᠤᠶᠤ ᠰᠢᠩᠭᠡᠬᠦ ᠦᠶ᠎ᠡ ᠳᠤ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ᠎ᠠ ᠨᠢᠭᠡ ᠴᠡᠭ ᠢᠶᠠᠨ ᠲᠠᠯ᠎ᠠ ᠲᠠᠯ᠎ᠠ ᠲᠡᠰᠢ ᠪᠠᠨ ᠰᠠᠴᠤᠷᠠᠭᠰᠠᠨ ᠮᠡᠲᠦ ᠰᠡᠮᠡᠵᠢᠨ ᠡᠭᠦᠯᠡᠲᠡᠢ ᠬᠠᠷᠠᠭᠳᠠᠪᠠᠯ ᠲᠩᠷᠢ ᠮᠠᠭᠤᠳᠠᠬᠤ ᠶᠢᠨ ᠂ ᠨᠠᠷᠠ ᠲᠣᠳᠣ ᠶᠠᠭᠠᠨ ᠥᠩᠭᠡ ᠲᠠᠢ ᠵᠢᠷᠭᠠᠪᠠᠯ ᠬᠦᠴᠦᠲᠡᠢ ᠰᠠᠯᠬᠢ ᠬᠥᠳᠡᠯᠬᠦ ᠶᠢᠨ ᠳᠣᠬᠢᠶ᠎ᠠ᠃ — — ᠨᠠᠷᠠ ᠮᠠᠨᠳᠤᠬᠤ ᠵᠢᠷᠭᠠᠬᠤ ᠦᠶ᠎ᠡ ᠳᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠨᠢ ᠦᠩᠭᠡᠲᠦ ᠪᠠᠭᠠᠨ᠎ᠠ ᠲᠠᠲᠠᠵᠤ ᠦᠵᠡᠭᠳᠡᠪᠡᠯ ᠡᠬᠢᠨ ᠳᠡᠭᠡᠨ ᠬᠦᠢᠲᠡᠷᠡᠨ᠎ᠡ᠃ — — ᠲᠩᠷᠢ ᠪᠦᠷᠬᠦᠭ ᠪᠠᠶᠢᠭᠰᠠᠨ ᠢᠶᠠᠨ ᠨᠠᠷᠠ ᠰᠢᠩᠭᠡᠬᠦ ᠦᠶ᠎ᠡ ᠳᠤ ᠲᠡᠭᠷᠢ ᠶᠢᠨ ᠪᠠᠷᠠᠭᠤᠨ ᠬᠡᠰᠡᠭ ᠡᠭᠦᠯᠡ ᠦᠭᠡᠢ ᠪᠣᠯᠪᠠᠯ ᠴᠠᠭ ᠵᠣᠬᠢᠷᠠᠨ᠎ᠠ᠃ — — ᠨᠠᠷᠠ ᠤᠯᠠᠶᠢᠷᠠᠨ ᠡᠭᠦᠯᠡᠨ ᠤ ᠴᠠᠭᠠᠨ᠎ᠠ ᠣᠷᠣᠵᠤ ᠲᠣᠰᠣᠷᠠᠨ ᠵᠢᠷᠭᠠᠪᠠᠯ ᠵᠤᠨ ᠤ ᠴᠠᠭ ᠲᠤ ᠪᠣᠷᠤᠭ᠎ᠠ ᠣᠷᠣᠵᠤ ᠰᠠᠯᠬᠢᠯᠠᠬᠤ ᠡᠪᠦᠯ ᠴᠠᠰᠤᠨ ᠰᠢᠭᠤᠷᠭ᠎ᠠ ᠲᠠᠯᠪᠢᠨ᠎ᠠ᠃ — — ᠨᠠᠷᠠ ᠵᠢᠷᠭᠠᠬᠤ ᠦᠶ᠎ᠡ ᠠᠴᠠ ᠡᠭᠦᠯᠡᠰ ᠰᠠᠷᠨᠢᠵᠤ ᠬᠡᠯᠪᠡᠷᠢ ᠳᠦᠷᠰᠦ ᠪᠠᠨ ᠠᠯᠳᠠᠪᠠᠯ ᠰᠥᠨᠢ ᠳᠡᠭᠡᠨ ᠪᠣᠷᠤᠭ᠎ᠠ ᠣᠷᠣᠨ᠎ᠠ᠃ — — ᠨᠠᠷᠠ ᠰᠠᠷᠠ ᠬᠦᠷᠢᠶᠡᠯᠡᠬᠦ ᠪᠤᠶᠤ ᠭᠤᠷᠪᠠᠨ ᠨᠠᠷᠠ ᠭᠠᠷᠪᠠᠯ ᠰᠠᠯᠬᠢ ᠰᠢᠷᠦᠭᠦᠰᠴᠦ ᠲᠩᠷᠢ ᠪᠦᠷᠬᠦᠨ ᠬᠤᠷ᠎ᠠ ᠲᠤᠨᠤᠳᠠᠰᠤ ᠤᠨᠠᠵᠣ ᠬᠦᠢᠲᠡᠷᠡᠨ᠎ᠡ᠃ ᠬᠦᠷᠢᠶᠡᠨ ᠤ ᠬᠡᠮᠵᠢᠶ᠎ᠡ ᠵᠢᠵᠢᠭᠷᠡᠪᠡᠯ ᠤᠳᠠᠯ ᠦᠭᠡᠢ ᠬᠤᠷ᠎ᠠ ᠲᠤᠨᠤᠳᠠᠰᠤ ᠣᠷᠣᠨ᠎ᠠ᠃ ᠲᠣᠮᠣᠷᠠᠪᠠᠯ ᠬᠤᠷ᠎ᠠ ᠲᠤᠨᠤᠳᠠᠰᠤ ᠬᠤᠯᠠᠳᠣᠨ᠎ᠠ᠃ — — ᠰᠠᠷᠠ ᠰᠢᠨ᠎ᠡ ᠶᠢᠨ ᠭᠤᠷᠪᠠᠨ ᠤ ᠣᠷᠴᠢᠮ ᠮᠢᠬᠠᠯᠢᠭᠳᠠᠭᠤ ᠥᠩᠭᠡ ᠨᠢ ᠤᠯᠠᠪᠣᠷ ᠴᠠᠭᠠᠨ ᠬᠤᠶᠠᠷ ᠦᠵᠦᠭᠦᠷ ᠨᠢ ᠮᠣᠬᠤᠭᠤ ᠬᠢᠷᠢᠨ ᠢᠶᠠᠨ ᠪᠣᠰᠤᠭ᠎ᠠ ᠦᠵᠡᠭᠳᠡᠪᠡᠯ ᠲᠡᠷᠡ ᠰᠠᠷ᠎ᠠ ᠳᠠᠭᠠᠨ ᠬᠤᠷ᠎ᠠ ᠲᠤᠨᠤᠳᠠᠰᠤ ᠤᠨᠠᠵᠣ ᠰᠠᠯᠬᠢ ᠰᠢᠭᠤᠷᠭ᠎ᠠ ᠪᠣᠯᠬᠤ ᠨᠢ ᠬᠤᠪᠣᠷ᠃ — — ᠰᠠᠷᠠ ᠶᠡᠷᠦᠳᠡ ᠶᠢᠨ ᠬᠢ ᠠᠴᠠ ᠲᠣᠮᠣ ᠶᠤᠮ ᠰᠢᠭ᠋ ᠮᠥᠷᠲᠡᠯ᠎ᠡ ᠪᠠᠨ ᠤᠯᠠᠭᠠᠨ ᠲᠤᠶᠠᠭ᠎ᠠ ᠲᠠᠢ ᠪᠠᠶᠢᠪᠠᠯ ᠬᠤᠷ᠎ᠠ ᠪᠠᠭᠤᠬᠤ ᠶᠢᠨ ᠲᠡᠮᠳᠡᠭ᠃ — — ᠠᠷᠪᠠᠨ ᠲᠠᠪᠤᠨ ᠤ ᠰᠠᠷᠠ ᠲᠣᠳᠣ ᠮᠠᠨᠳᠣᠪᠠᠯ ᠡᠳᠦᠷ ᠰᠠᠶᠢᠬᠠᠨ ᠪᠣᠯᠬᠤ ᠶᠢᠨ ᠰᠢᠨᠵᠢ᠃ ᠰᠠᠷᠠ ᠮᠡᠴᠢᠳ ᠤᠨ ᠳᠣᠬᠢᠶ᠎ᠠ ᠪᠠᠷ ᠶᠡᠭᠡ ᠶᠢ ᠰᠢᠨᠵᠢᠳᠡᠭ᠃ ᠰᠠᠷᠠᠨ ᠤ ᠵᠡᠷᠭᠡᠯᠳᠡᠭᠡ ᠪᠠᠶᠢᠷᠢᠯᠠᠬᠤ ᠮᠡᠴᠢᠳ ︵ᠣᠳᠣ︶ ᠲᠡᠭᠦᠨ ᠤ ᠳᠡᠭᠡᠭᠦᠷ ᠪᠤᠶᠤ ᠳᠣᠣᠭᠤᠷ ᠦᠩᠭᠡᠷᠡᠬᠦ ᠶᠢ ᠡᠶᠢᠨ ᠬᠦ ᠨᠡᠷᠡᠯᠡᠳᠡᠭ᠃ ᠰᠠᠷ᠎ᠠ ᠳᠤ 4 ᠤᠳᠠᠭ᠎ᠠ ᠲᠣᠬᠢᠶᠠᠯᠳᠤᠨ᠎ᠠ᠃ ᠮᠡᠴᠢᠳ ᠳᠣᠬᠢᠶᠠᠯᠠᠭ᠎ᠠ ᠪᠣᠯᠬᠤ ᠠᠴᠠ 2-3 ᠬᠤᠨᠤᠭ ᠤᠨ ᠡᠮᠦᠨ᠎ᠡ ᠰᠠᠷᠠᠨ ᠤ ᠬᠠᠵᠠᠭᠤᠬᠠᠨ ᠳᠤ ᠪᠠᠶᠢᠭ᠎ᠠ ᠨᠢ ᠡᠩ ᠤᠨ ᠨᠢᠳᠦᠨ ᠳᠤ ᠦᠵᠡᠭᠳᠡᠳᠡᠭ᠃ ᠮᠡᠴᠢᠳ ᠰᠠᠷᠠᠨ ᠤ ᠳᠡᠭᠡᠭᠦᠷ ᠣᠶᠢᠷᠠᠬᠠᠨ ᠥᠩᠭᠡᠷᠡᠪᠡᠯ ᠲᠡᠷᠡ ᠰᠠᠷ᠎ᠠ ᠳᠠᠭᠠᠨ ᠬᠤᠷ᠎ᠠ ᠲᠤᠨᠤᠳᠠᠰᠤ᠂ ᠰᠠᠯᠬᠢ ᠰᠢᠭᠤᠷᠭ᠎ᠠ ᠶᠡᠬᠡᠰᠦᠨ᠎ᠡ᠃ ᠡᠭᠦᠨ ᠢ ᠮᠡᠴᠢᠳ ᠰᠠᠷᠠᠨ ᠳᠡᠭᠡᠷ᠎ᠡ ︽ᠰᠢᠭᠡᠭᠡᠯ᠎ᠡ︾ ᠭᠡᠵᠦ ᠨᠡᠷᠡᠯᠡᠬᠦ ᠴᠦ ᠪᠤᠢ᠃ ᠬᠠᠷᠢᠨ ᠣᠳᠣ ᠰᠠᠷᠠᠨ ᠤ ᠳᠣᠣᠭᠤᠷ᠂ ᠬᠤᠯᠠᠭᠤᠷ ᠥᠩᠭᠡᠷᠡᠪᠡᠯ ᠰᠠᠷ᠎ᠠ ᠳᠠᠭᠠᠨ ᠬᠤᠷ᠎ᠠ ᠲᠤᠨᠤᠳᠠᠰᠤ ᠪᠠᠭ᠎ᠠ᠂ ᠰᠠᠯᠬᠢ ᠰᠢᠭᠤᠷᠭ᠎ᠠ ᠪᠣᠯᠬᠤ ᠨᠢ ᠬᠤᠪᠣᠷ᠂ ᠨᠠᠮᠳᠠᠭᠤ ᠪᠠᠶᠢᠨ᠎ᠠ᠃ — — ᠡᠪᠦᠯ ᠤᠨ ᠲᠡᠷᠢᠭᠦᠨ ᠰᠠᠷ᠎ᠠ ᠳᠤ ᠰᠠᠷᠠ᠂ ᠮᠡᠴᠢᠳ ᠤᠨ ᠳᠣᠬᠢᠶᠠᠯᠠᠭ᠎ᠠ ᠶᠢᠨ ᠡᠮᠦᠨ᠎ᠡ ᠲᠩᠷᠢ ᠮᠠᠭᠤᠲᠠᠪᠠᠯ ᠴᠠᠭ ᠬᠠᠲᠠᠭᠤᠷᠠᠨ᠎ᠠ᠃ — — ᠶᠢᠰᠦᠨ ᠶᠢᠰᠦ᠂ ᠳ᠋ᠦᠩ ᠣᠷᠣᠬᠤ᠂ ᠢᠴᠢᠭᠰᠡᠳ ᠬᠥᠳᠡᠯᠬᠦ᠂ ᠬᠠᠩᠰᠢ ᠨᠡᠭᠡᠭᠡᠬᠦ᠂ ᠨᠠᠷᠠ ᠭᠤᠣᠯᠯᠠᠬᠤ᠂ ᠪᠤᠴᠠᠬᠤ ᠦᠶ᠎ᠡ ᠳᠤ ᠲᠩᠷᠢ ᠮᠠᠭᠤᠳᠠᠵᠤ ᠬᠦᠢᠲᠡᠷᠡᠬᠦ ᠪᠤᠶᠤ ᠴᠠᠰᠤ ᠪᠣᠷᠤᠭ᠎ᠠ ᠵᠠᠪᠠᠯ ᠣᠷᠣᠳᠠᠭ ᠭᠡᠯᠴᠡᠨ᠎ᠡ᠃ — — ᠬᠠᠪᠤᠷ ᠨᠠᠮᠤᠷ ᠤᠨ ᠡᠳᠦᠷ ᠰᠦᠨᠢ ᠶᠢᠨ ᠲᠡᠩᠴᠡᠯ ᠤᠨ ᠦᠶ᠎ᠡ ᠳᠤ ᠲᠩᠷᠢ ᠮᠠᠭᠤᠬᠠᠶᠢᠷᠠᠵᠤ ᠴᠠᠰᠤ ᠪᠣᠷᠤᠭ᠎ᠠ ᠣᠷᠣᠵᠤ᠂ ᠰᠠᠯᠬᠢᠯᠠᠬᠤ ᠨᠢ ᠣᠯᠠᠨ ᠲᠠᠢ᠃ — — ᠲᠡᠭᠷᠢ ᠶᠢᠨ ᠵᠠᠭᠠᠳᠠᠰᠤ ᠨᠠᠮᠤᠷ ᠤᠨ ᠠᠳᠠᠭ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠶᠢᠰᠦᠨ ᠳᠤ ᠠᠯᠠᠭ᠎ᠠ ᠪᠣᠯᠵᠤ᠂ 7 ᠬᠤᠨᠤᠭ ᠤᠨ ᠳᠣᠲᠣᠷ᠎ᠠ ᠭᠠᠷᠴᠤ ᠢᠷᠠᠪᠠᠯ ᠦᠩ ᠪᠣᠯᠣᠨ᠎ᠠ᠃ ᠡᠭᠦᠯᠡ — — ᠦᠳᠡᠰᠢ ᠶᠢᠨ ᠡᠭᠦᠯᠡ ᠵᠢᠪᠡᠬᠡᠢ ᠰᠠᠭᠠᠷᠠᠯ ᠥᠩᠭᠡ ᠲᠠᠢ ᠪᠠᠶᠢᠪᠠᠯ ᠢᠷᠡᠬᠦ ᠡᠳᠦᠷ ᠲᠩᠷᠢ ᠮᠠᠭᠤᠳᠠᠨ᠎ᠠ᠃ — — ᠵᠤᠨ ᠤ ᠴᠠᠭ ᠲᠤ ᠵᠢᠷᠭᠠᠬᠤ ᠨᠠᠷᠠᠨ ᠤ ᠵᠦᠭ ᠤᠨ ᠡᠭᠦᠯᠡᠰ ᠬᠤᠶᠢᠲᠤ ᠲᠠᠯ᠎ᠠ ᠪᠠᠷ ᠢᠶᠠᠨ ᠣᠯᠠᠶᠢᠷᠠᠪᠠᠯ ᠬᠢᠷᠠᠭᠤ ᠤᠨᠠᠵᠣ ᠬᠦᠢᠲᠡᠷᠡᠬᠦ ᠶᠢᠨ ᠰᠢᠨᠵᠢ᠃ — — ᠦᠳᠡᠰᠢ ᠶᠢᠨ ᠪᠦᠷᠦᠢ ᠪᠠᠷ ᠡᠭᠦᠯᠡ ᠵᠡᠭᠦᠨ ᠠᠴᠠ ᠬᠤᠶᠢᠰᠢ ᠨᠡᠭᠦᠪᠡᠯ ᠬᠦᠴᠦᠲᠡᠢ ᠰᠠᠯᠬᠢᠯᠠᠨ᠎ᠠ᠃ — — ᠥᠷᠯᠥᠭᠡᠨ ᠤ ᠮᠠᠨᠠᠨ ᠳᠡᠭᠡᠭᠰᠢ ᠬᠦᠭᠡᠷᠦᠯ ᠦᠭᠡᠢ ᠭᠠᠵᠠᠷ ᠳᠡᠭᠡᠷ᠎ᠡ ᠪᠠᠨ ᠵᠠᠮᠬᠠᠷᠠᠪᠠᠯ ᠲᠩᠷᠢ ᠴᠡᠯᠮᠡᠨ᠎ᠡ᠃ ᠳᠡᠭᠡᠭᠰᠢ ᠬᠥᠭᠡᠷᠴᠦ ᠡᠭᠦᠯᠡ ᠪᠣᠯᠪᠠᠯ ᠪᠣᠷᠣᠭᠠᠰᠢᠨ᠎ᠠ᠃ — — ᠡᠭᠦᠯᠡᠨ ᠤ ᠲᠣᠯᠣᠭᠠᠢ ᠬᠤᠶᠢᠰᠢ ᠪᠠᠨ ᠪᠦᠬᠦᠶᠢᠭᠰᠡᠨ ᠶᠠᠩᠵᠤ ᠲᠠᠢ ᠥᠳᠬᠡᠨ ᠬᠠᠷ᠎ᠠ ᠪᠠᠶᠢᠪᠠᠯ ᠬᠤᠷ᠎ᠠ ᠲᠤᠨᠤᠳᠠᠰᠤ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠬᠤᠶᠢᠨ᠎ᠠ ᠠᠴᠠ ᠪᠠᠨ ᠰᠠᠯᠬᠢ ᠲᠠᠢ ᠡᠭᠦᠯᠡ ᠦᠭᠡᠢ ᠪᠣᠯ ᠬᠦᠢᠲᠡᠨ ᠤ ᠡᠷᠴᠢ ᠴᠢᠩᠭᠠᠷᠠᠨ᠎ᠠ᠃ — — ᠡᠭᠦᠯᠡ ᠰᠠᠯᠬᠢᠨ ᠤ ᠡᠰᠡᠷᠭᠦ ᠨᠡᠭᠦᠵᠦ ᠪᠠᠶᠢᠪᠠᠯ ᠬᠤᠷ᠎ᠠ ᠣᠷᠣᠬᠤ ᠶᠢᠨ ᠳᠣᠬᠢᠶ᠎ᠠ᠃ — — ᠡᠭᠦᠯᠡ ᠥᠭᠡᠳᠡ ᠥᠭᠡᠳᠡ ᠠᠴᠠ ᠨᠡᠭᠦᠵᠦ ᠪᠠᠶᠢᠪᠠᠯ ᠲᠩᠷᠢ ᠤᠷᠲᠤ ᠬᠤᠭᠤᠴᠠᠭ᠎ᠠ ᠪᠠᠷ ᠲᠠᠪᠠ ᠦᠭᠡᠶᠢᠲᠡᠨ᠎ᠡ᠃ — — ᠡᠭᠦᠯᠡ ᠵᠤᠷᠪᠤᠰ ᠪᠠᠶᠢᠳᠠᠯ ᠲᠠᠢ ᠪᠠᠶᠢᠪᠠᠯ ᠵᠤᠨ ᠪᠣᠷᠣᠭᠠᠨ ᠲᠠᠢ ᠡᠪᠦᠯ ᠳᠤᠯᠠᠭᠠᠪᠲᠤᠷ ᠡᠳᠦᠷ ᠪᠣᠯᠣᠨ᠎ᠠ᠃ — — ᠥᠷᠯᠥᠭᠡᠭᠦᠷ ᠲᠩᠷᠢ ᠴᠡᠯᠮᠡᠭ ᠪᠠᠶᠢᠭᠰᠠᠨ ᠢᠶᠠᠨ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠡᠨᠡ ᠲᠡᠨᠳᠡ ᠬᠡᠰᠡᠭ ᠪᠥᠭᠡᠨ ᠴᠠᠭᠠᠨ ᠡᠭᠦᠯᠡ ᠭᠠᠷᠤᠭᠰᠠᠨ ᠢᠶᠠᠨ ᠦᠳᠡ ᠠᠴᠠ ᠬᠤᠶᠢᠰᠢ ᠵᠠᠮᠬᠠᠷᠠᠪᠠᠯ ᠣᠶᠢᠷ᠎ᠠ ᠶᠢᠨ ᠨᠢᠭᠡ᠂ ᠬᠤᠶᠠᠷ ᠬᠤᠨᠤᠭ ᠲᠠᠭᠠᠨ ᠲᠩᠷᠢ ᠰᠠᠶᠢᠬᠠᠨ ᠪᠠᠶᠢᠨ᠎ᠠ᠃ — — ᠥᠷᠯᠥᠭᠡ ᠠᠴᠠ ᠡᠬᠢᠯᠡᠨ ᠪᠤᠬ᠎ᠠ ᠮᠠᠨᠳᠠᠯ ᠤᠨ ᠡᠭᠦᠯᠡ ᠭᠠᠷᠴᠤ ᠤᠯᠠᠮ ᠥᠰᠦᠨ ᠨᠢᠭᠲᠠᠷᠠᠵᠤ ᠡᠬᠢᠯᠡᠪᠡᠯ ᠲᠩᠷᠢ ᠡᠪ ᠦᠭᠡᠶᠢᠲᠡᠬᠦ ᠶᠢᠨ ᠰᠢᠨᠵᠢ᠃ — — ᠵᠤᠨ ᠨᠠᠷᠠ ᠮᠠᠨᠳᠣᠭᠰᠠᠨ ᠤ ᠳᠠᠷᠠᠭ᠎ᠠ ᠬᠡᠰᠡᠭ ᠬᠡᠰᠡᠭ ᠪᠥᠭᠡᠨ ᠴᠠᠭᠠᠨ ᠡᠭᠦᠯᠡ ᠭᠠᠷᠴᠤ᠂ ᠤᠯᠠᠮ ᠢᠶᠠᠷ ᠳᠡᠭᠡᠭᠰᠢ ᠣᠭᠰᠢᠭᠰᠠᠭᠠᠷ ᠪᠣᠷᠣᠭᠠᠨ ᠤ ᠪᠥᠭᠡᠨ ᠡᠭᠦᠯᠡᠨ ᠳᠤ ᠰᠢᠯᠵᠢᠵᠦ ᠲᠩᠷᠢ ᠪᠦᠷᠬᠦᠪᠡᠯ ᠠᠭᠠᠳᠠᠷ ᠪᠣᠷᠤᠭ᠎ᠠ᠂ ᠮᠥᠨᠳᠥᠷ ᠣᠷᠣᠬᠤ ᠶᠢᠨ ᠰᠢᠨᠵᠢ᠃ — — ᠡᠳᠦᠷ ᠳᠠᠪᠬᠤᠷᠭᠠᠲᠤ ᠡᠭᠦᠯᠡ ᠭᠠᠷᠴᠤ᠂ ᠠᠭᠠᠵᠢᠮ ᠢᠶᠠᠷ ᠲᠡᠭᠷᠢ ᠶᠢ ᠪᠦᠷᠬᠦᠨ ᠤᠯᠠᠮ ᠢᠶᠠᠷ ᠨᠢᠭᠲᠠᠷᠠᠨ ᠵᠤᠵᠠᠭᠠᠷᠠᠵᠤ᠂ ᠤᠯᠠᠮ ᠢᠶᠠᠷ ᠳᠣᠭᠤᠭᠰᠢᠯᠠᠨ ᠪᠣᠷᠣᠭᠠᠨ ᠤ ᠳᠠᠪᠬᠤᠷᠭᠠᠲᠤ ᠡᠭᠦᠯᠡ ᠪᠣᠯᠪᠠᠯ ᠵᠤᠨ ᠵᠦᠰᠡ ᠪᠣᠷᠤᠭ᠎ᠠ᠂ ᠡᠪᠦᠯ ᠴᠠᠰᠤ ᠣᠷᠣᠬᠤ ᠶᠢᠨ ᠰᠢᠨᠵᠢ ᠮᠥᠨ᠃ — — ᠡᠭᠦᠯᠡ ᠲᠦᠷᠭᠡᠨ ᠨᠡᠬᠦᠵᠦ ᠪᠠᠶᠢᠪᠠᠯ ᠰᠠᠯᠬᠢᠯᠠᠬᠤ ᠶᠢᠨ᠂ ᠵᠤᠨ ᠡᠭᠦᠯᠡ ᠳᠣᠷᠣᠭᠰᠢᠯᠠᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ᠂ ᠡᠪᠦᠯ ᠪᠣᠯ ᠬᠦᠢᠲᠡᠷᠡᠵᠦ ᠴᠠᠰᠤ ᠣᠷᠣᠬᠤ ᠶᠢᠨ᠂ ᠡᠭᠦᠯᠡ ᠥᠨᠳᠥᠷ ᠲᠤ ᠪᠠᠶᠢᠪᠠᠯ ᠲᠩᠷᠢ ᠰᠠᠶᠢᠬᠠᠨ ᠪᠣᠯᠬᠤ ᠶᠢᠨ ᠰᠢᠨᠵᠢ᠃ — — ᠨᠠᠷᠠ ᠵᠢᠷᠭᠠᠬᠤ ᠶᠢᠨ ᠡᠮᠦᠨ᠎ᠡ ᠵᠤᠨ ᠡᠭᠦᠯᠡ ᠣᠯᠠᠶᠢᠪᠠᠯ ᠮᠠᠷᠭᠠᠰᠢ ᠨᠢ ᠪᠣᠷᠤᠭ᠎ᠠ ᠲᠠᠢ ᠶᠢᠨ᠂ ᠬᠡᠷᠪᠡ ᠨᠠᠷᠠ ᠵᠢᠷᠭᠠᠭᠰᠠᠨ ᠤ ᠳᠠᠷᠠᠭ᠎ᠠ ᠡᠭᠦᠯᠡ ᠣᠯᠠᠶᠢᠪᠠᠯ ᠬᠡᠳᠦ ᠬᠤᠨᠣᠭᠠᠳ ᠲᠩᠷᠢ ᠮᠠᠭᠤᠳᠠᠬᠤ ᠶᠢᠨ ᠰᠢᠨᠵᠢ᠃ — — ᠲᠡᠭᠷᠢ ᠳᠤ ᠪᠥᠭᠡᠨ᠂ ᠳᠣᠯᠭᠢᠶᠠᠯᠢᠭ᠂ ᠰᠡᠮᠡᠵᠢᠨ ᠮᠡᠲᠦ ᠣᠯᠠᠨ ᠶᠠᠩᠵᠤ ᠶᠢᠨ ᠡᠭᠦᠯᠡ ᠬᠠᠮᠲᠤ ᠠᠵᠢᠭᠯᠠᠭᠳᠠᠪᠠᠯ ᠴᠠᠭ ᠠᠭᠠᠷ ᠮᠠᠭᠤᠳᠠᠬᠤ ᠶᠢᠨ ᠰᠢᠨᠵᠢ᠃ — — ᠪᠥᠭᠡᠨ ᠡᠭᠦᠯᠡᠨ ᠤ ᠬᠠᠶᠠᠭ᠎ᠠ ᠬᠤᠷᠣᠮᠬᠠᠨ ᠵᠠᠭᠤᠷ᠎ᠠ ᠬᠠᠷᠠᠯᠠᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠶᠢᠨ᠂ ᠬᠡᠷᠪᠡ ᠵᠠᠬ᠎ᠠ ᠠᠴᠠ ᠪᠠᠨ ᠴᠠᠭᠠᠷᠠᠵᠣ ᠠᠶᠠᠳᠠᠪᠠᠯ ᠪᠣᠷᠤᠭ᠎ᠠ ᠣᠷᠣᠬᠤ ᠦᠭᠡᠢ ᠶᠢᠨ ᠳᠣᠬᠢᠶ᠎ᠠ᠃ — — ᠡᠭᠦᠯᠡ ᠬᠤᠶᠢᠯᠠᠷᠠᠨ ᠪᠠᠶᠢᠪᠠᠯ ᠰᠢᠷᠦᠭᠦᠨ ᠪᠣᠷᠤᠭ᠎ᠠ ᠣᠷᠣᠬᠤ ᠪᠤᠶᠤ ᠰᠠᠯᠬᠢᠯᠠᠬᠤ ᠶᠢᠨ ᠲᠡᠮᠳᠡᠭ᠃ — — ᠡᠭᠦᠯᠡ ᠪᠦᠷᠬᠦᠭᠰᠡᠨ ᠲᠡᠭᠷᠢ ᠶᠢᠨ ᠣᠷᠣᠢ ᠡᠭᠦᠯᠡ ᠦᠭᠡᠢ ᠴᠣᠭᠤᠷᠬᠠᠢ ᠪᠠᠶᠢᠪᠠᠯ ᠬᠤᠷᠠᠰᠢᠬᠤ ᠶᠢᠨ ᠲᠡᠮᠳᠡᠭ᠃ ᠡᠶᠢᠮᠦ ᠴᠦ ᠤᠴᠢᠷ ᠠᠴᠠ ︽ᠣᠷᠣᠬᠤ ᠲᠡᠭᠷᠢ ᠶᠢᠨ ᠣᠷᠣᠢ ᠴᠣᠭᠤᠷᠬᠠᠢ᠂ ᠣᠷᠣᠭᠰᠠᠨ ᠪᠤᠤᠷ᠎ᠠ ᠶᠢᠨ ᠰᠢᠯᠢ ᠴᠣᠭᠤᠷᠬᠠᠢ︾ ᠬᠡᠮᠡᠨ ᠶᠠᠷᠢᠯᠴᠠᠳᠠᠭ ᠠᠵᠢ᠃ — — ᠴᠠᠰᠤ ᠪᠣᠷᠤᠭ᠎ᠠ ᠣᠷᠣᠵᠤ ᠪᠠᠶᠢᠬᠤ ᠦᠶ᠎ᠡ ᠳᠤ ᠡᠭᠦᠯᠡ ᠰᠠᠯᠬᠢᠨ ᠤ ᠬᠢ ᠪᠠᠨ ᠵᠦᠭ ᠲᠤ ᠬᠦᠨᠳᠡᠯᠢᠳᠴᠦ ᠢᠷᠠᠪᠠᠯ ᠪᠣᠷᠤᠭ᠎ᠠ ᠠᠷᠢᠯᠬᠤ ᠶᠢᠨ ᠰᠢᠨᠵᠢ᠃ （ᠬᠠᠰᠪᠢᠯᠢᠭ᠌ ）
  
ᠢᠷᠡᠯᠲᠡ᠄ ᠯᠢᠨᠰᠢ ᠰᠢᠶᠠᠨ  ᠤ ᠠᠷᠠᠥᠨ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠲᠦᠮᠦᠰᠦ ᠢᠳᠡᠬᠦ ᠶᠢᠨ ᠠᠴᠢ ᠲᠤᠰᠠ
ᠪᠤᠭ ᠮᠠᠯ ᠤᠨ ᠭᠡᠮ ᠢ ᠤᠷᠢᠳᠴᠢᠯᠡᠨ ᠮᠡᠳᠡᠬᠦ ᠠᠷᠭ᠎ᠠ ᠨᠤᠭᠤᠳ
ᠬᠤᠨᠢᠨ ᠤ ᠢᠲᠡᠭᠡᠨ ᠤᠮᠲᠠᠭᠠᠨ ᠤ ᠵᠠᠰᠠᠯ
ᠡᠯᠢᠬᠡ ᠮᠠᠭᠤᠳᠠᠭᠰᠠᠨ ᠤ ᠠᠷᠪᠠᠨ ᠢᠯᠡᠷᠡᠯ
ᠴᠡᠭᠡ ᠵᠠᠰᠠᠯ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备07002090号