ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠭᠡ ᠭᠠᠵᠠᠷ ᠤᠨ ᠦᠯᠢᠭᠡᠷ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020-06-15
ᠡᠭᠡ ᠭᠠᠵᠠᠷ ᠤᠨ ᠦᠯᠢᠭᠡᠷ ︵ᠨᠢᠭᠡ︶             ᠤᠷᠠᠩᠭᠤᠸ᠎ᠠ                        — ᠡᠭᠡᠨᠡᠭᠳᠡ ᠪᠢ                      ᠡᠭᠡ ᠭᠠᠵᠠᠷ ᠤᠨ ᠢᠶᠠᠨ ᠦᠯᠢᠭᠡᠷ ᠢ ᠪᠢᠴᠢᠨ᠎ᠠ                      ᠡᠪᠦᠷ ᠲᠤᠨᠢ ᠲᠠᠨ ᠤ ᠦᠯᠢᠭᠡᠷ ᠪᠤᠢ                      ᠦᠪᠡᠷ ᠤᠨ ᠮᠢᠨᠢ ᠰᠡᠳᠬᠢᠯ ᠤᠨ ᠦᠯᠢᠭᠡᠷ ᠴᠦ ᠪᠤᠢ                      ᠲᠡᠮᠳᠡᠭᠯᠡᠯ ᠪᠠᠷᠢᠮᠳᠠ ᠶᠢᠨ ᠢᠷᠡᠯᠳᠠ᠄ ᠭᠡᠭᠡᠷ᠎ᠡ  ᠶᠢᠨ ᠰᠢᠨᠵᠢᠯᠡᠯ ᠢᠶᠠᠷ ᠲᠠᠮᠵᠢᠵᠤ ᠪᠤᠳᠠᠳᠤ ᠦᠵᠡᠭᠳᠡᠯ ᠪᠤᠶᠤ ᠬᠦᠮᠦᠨ ᠠᠴᠠ ᠠᠪᠤᠭᠰᠠᠨ ᠶᠠᠷᠢᠯᠴᠠᠭ᠎ᠠ᠃           ᠲᠡᠮᠳᠡᠭᠯᠡᠯ ᠬᠢᠭᠰᠡᠨ ᠴᠠᠭ᠄ 2013 ᠤᠨ ᠤ 11 ᠳ᠋ᠤᠭᠡᠷ ᠰᠠᠷ᠎ᠠ ᠶᠢᠨ17—22 ᠬᠦᠷᠳᠡᠯ᠎ᠠ᠃           ᠲᠡᠮᠳᠡᠭᠯᠡᠯ ᠬᠢᠭᠰᠡᠨ ᠭᠠᠵᠠᠷ᠄ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠲᠦᠪ ᠢᠨᠳᠡᠷ ᠪᠠ ᠪᠠᠳᠠᠷᠠᠬᠤ ᠰᠤᠮᠤᠨ  ᠤ ᠭᠡᠪᠴᠢᠶᠡᠨ ᠳᠤ᠃           ᠲᠡᠮᠳᠡᠭᠯᠡᠯ ᠬᠢᠭᠰᠡᠨ ᠬᠦᠮᠦᠨ᠄ ᠤᠷᠠᠩᠭᠤᠸ᠎ᠠ᠃          ᠲᠡᠮᠳᠡᠭᠯᠡᠯ ᠬᠢᠬᠦ ᠠᠷᠭ᠎ᠠ᠄ ᠪᠢᠷ ᠲᠡᠮᠳᠡᠭᠯᠡᠯ᠂ ᠲᠠᠭᠤ ᠰᠢᠩᠬᠢᠭᠡᠯᠳᠡ᠂ ᠸᠢᠳᠢᠤ᠋ ᠪᠢᠴᠢᠯᠭᠡ᠂ ᠵᠢᠷᠤᠭ ᠰᠡᠬᠦᠳᠡᠷ᠃ ᠪᠦᠬᠦ ᠲᠡᠮᠳᠡᠭᠯᠡᠯ ᠢ ᠤᠷᠠᠩᠭᠤᠸ᠎ᠠ ᠬᠦᠢᠴᠢᠳᠭᠡᠪᠡ᠃          ᠶᠠᠷᠢᠯᠴᠠᠭ᠎ᠠ ᠦᠭᠬᠦᠭᠰᠡᠨ ᠬᠦᠮᠦᠨ᠄         ᠪᠢᠩ ᠲᠠᠩ᠄ 91 ᠨᠠᠰᠤᠳᠠᠢ᠃ ᠴᠢᠶᠠᠨ ᠤᠪᠤᠭᠳᠠᠨ᠃ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠪᠠᠳᠠᠷᠠᠬᠤ ᠰᠤᠮᠤᠨ ᠤ ᠪᠠᠳᠠᠷᠠᠬᠤ ᠠᠶᠢᠯ ᠳᠤ ᠰᠠᠭᠤᠷᠢᠰᠢᠨ ᠠᠮᠢᠳᠤᠷᠠᠵᠤ ᠪᠤᠢ᠃ ᠤᠯᠠᠨ ᠨᠠᠮ ᠪᠦᠯᠦᠭ᠂ ᠬᠤᠪᠢᠰᠬᠠᠯ ᠢ ᠦᠵᠡᠭᠰᠡᠨ ᠬᠦᠮᠦᠨ ᠃         ᠭᠠᠷᠪᠤ᠄ 50 ᠨᠠᠰᠤᠳᠠᠢ᠃ ᠴᠢᠦ ᠤᠪᠤᠭᠳᠠᠨ᠃ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠪᠠᠳᠠᠷᠠᠬᠤ ᠰᠤᠮᠤᠨ ᠤ ᠲᠡᠳ᠋ ᠰᠤᠮᠤᠨ ᠲᠠᠷᠤᠭ᠎ᠠ᠃           ᠠᠷᠰᠯᠠᠨ᠄ 92 ᠨᠠᠰᠤᠳᠠᠢ᠃ ᠶᠢᠨ ᠤᠪᠤᠭᠳᠠᠨ᠃ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠪᠠᠳᠠᠷᠠᠬᠤ ᠰᠤᠮᠤᠨ ᠤ ᠢᠯᠡᠯᠳᠡ ᠠᠶᠢᠯ ᠤᠨ ᠮᠠᠯᠴᠢᠨ᠃ ᠵᠠᠯᠠᠶᠢᠳ ᠸᠠᠩ ᠪᠠᠳᠮᠠᠷᠠᠪᠳᠠᠨ ᠤ ᠦᠶ᠎ᠡ ᠳᠤ᠂ ᠶᠠᠫᠤᠨ ᠤ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠢ ᠬᠦᠷᠳᠡᠵᠤ ᠶᠠᠪᠤᠭᠰᠠᠨ ᠬᠦᠮᠦᠨ᠃         ᠬᠠᠨ ᠷᠡᠨᠴᠢᠨ᠄ 75 ᠨᠠᠰᠤᠳᠠᠢ᠃ ᠬᠠᠨ ᠤᠪᠤᠭᠳᠠᠨ᠃ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠪᠠᠳᠠᠷᠠᠬᠤ ᠰᠤᠮᠤᠨ ᠤ ᠲᠦᠪ ᠲᠤ ᠰᠠᠭᠤᠷᠢᠰᠢᠨ ᠠᠮᠢᠳᠤᠷᠠᠵᠤ ᠪᠤᠢ᠃ ᠤᠤᠯ ᠨᠢ ᠪᠠᠳᠠᠷᠠᠬᠤ ᠰᠤᠮᠤᠨ ᠤᠨ ᠴᠢᠨᠳᠠᠮᠤᠨᠢ ᠰᠦᠮ᠎ᠠ ᠳᠤ ᠨᠢᠭᠳᠠᠯᠠᠨ ᠪᠤᠳᠤᠭᠴᠢ ᠪᠠᠷ ᠠᠵᠢᠯᠯᠠᠵᠤ ᠪᠠᠶᠢᠪᠠ᠃         ᠤᠦ ᠴᠦᠨ ᠬᠤᠸᠠ᠄ 67 ᠨᠠᠰᠤᠳᠠᠢ᠃ ᠤᠤ ᠤᠪᠤᠭᠳᠠᠨ᠃ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠲᠦᠪ ᠪᠤᠯᠬᠤ ᠢᠨᠳᠡᠷ ᠲᠤ ᠠᠮᠢᠳᠤᠷᠠᠵᠤ ᠪᠤᠢ ᠃ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠭᠰᠠᠨ ᠪᠠᠭᠰᠢ᠃          ᠪᠤᠤ ᠵᠢᠦ ᠮᠢᠩ᠄ 70 ᠨᠠᠰᠤᠳᠠᠢ᠃ ᠰᠠᠯᠴᠢᠭᠤᠳ ᠠᠶᠢᠮᠠᠭ  ᠤᠨ ᠪᠤᠤ ᠤᠪᠤᠭᠳᠠᠨ᠃ ᠨᠠᠰᠤᠨ ᠲᠤᠷᠰᠢ ᠪᠠᠳᠠᠷᠠᠬᠤ ᠶᠢᠨ ᠭᠡᠪᠴᠢᠶᠡᠨ ᠳᠤ ᠰᠤᠷᠭᠠᠨ ᠬᠦᠮᠦᠵᠢᠯ ᠳᠤ ᠵᠢᠳᠬᠦᠵᠤ ᠶᠠᠪᠤᠭᠰᠠᠨ ᠠᠬᠠᠮᠠᠳ ᠪᠠᠭᠰᠢ᠃            ᠶᠠᠷᠢᠯᠴᠠᠭᠠᠨ ᠤ ᠠᠭᠤᠯᠭ᠎ᠠ᠄         ᠰᠠᠶᠢᠨ ᠡᠷ᠎ᠡ ᠶᠢᠨ ᠦᠬᠦᠵᠤ ᠠᠮᠢᠳᠤᠷᠠᠬᠤ ᠭᠡᠪ ᠨᠠᠮᠪᠠ᠃ ᠬᠦᠮᠦᠨ ᠤ ᠶᠠᠰᠤ ᠴᠢᠰᠦᠨ ᠳᠤ ᠪᠠᠶᠢᠳᠠᠭ ᠦᠪᠡᠷ ᠤᠨ ᠬᠢᠨ ᠭᠡᠰᠡᠨ ᠵᠠᠩ ᠵᠢᠷᠤᠮ ᠢ ᠪᠠᠷᠢᠮᠳᠠᠯᠠᠬᠤ ᠤᠪᠤᠷ᠃ ᠵᠦᠪ ᠶᠤᠰᠤᠨ ᠤ ᠲᠦᠯᠦᠭᠡ ᠤᠷᠤᠰᠢᠬᠤ᠃ ᠪᠠᠳᠠᠷᠠᠬᠤ ᠨᠤᠳᠤᠭ ᠤᠨ ᠠᠭᠤᠯᠠ ᠤᠰᠤ᠂ ᠤᠷᠭᠤᠮᠠᠯ ᠠᠮᠢᠳᠠᠨ ᠤ ᠦᠯᠢᠭᠡᠷ᠃ ᠰᠦ ᠶᠢᠨ ᠰᠤᠶᠤᠯ ᠠᠴᠠ ᠠᠨᠵᠢᠰᠤᠨ ᠤ ᠰᠤᠶᠤᠯ ᠳᠤ ᠲᠡᠪᠰᠢᠵᠤ ᠢᠷᠡᠭᠰᠡᠨ ᠲᠡᠦᠭᠡ ᠵᠡᠷᠭᠡ᠃          ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ ᠨᠢ᠄ ᠤᠷᠠᠩᠭᠤᠸ᠎ᠠ                               ᠨᠢᠭᠡ᠂ ᠪᠠᠳᠠᠷᠠᠬᠤ ᠳᠤ ᠢᠷᠡᠭᠰᠡᠨ ᠮᠢᠨᠢ ᠤᠴᠢᠷᠳᠠᠢ                2013 ᠤᠨ ᠤ11 ᠰᠠᠷ᠎ᠠ ᠶᠢᠨ16 ᠤ ᠦᠳᠡ ᠶᠢᠨ ᠡᠮᠦᠨ᠎ᠠ ᠶᠢᠨ 9 ᠴᠠᠭ 40 ᠮᠢᠨᠤᠲ ᠲᠤ᠂ ᠪᠢ ᠤᠯᠠᠭᠠᠬᠤᠳᠠ ᠶᠢᠨ ᠨᠢᠰᠭᠡᠯ ᠤᠨ ᠲᠡᠯᠡᠪᠡᠢ ᠳᠤ ᠪᠠᠭᠤᠪᠠ᠃ ︽ᠰᠤᠶᠤᠯ ᠤᠭᠰᠠᠭᠠᠳᠠᠨ ᠵᠦᠢ ᠶᠢᠨ ᠭᠡᠭᠡᠷ᠎ᠡ ᠶᠢᠨ ᠰᠢᠨᠵᠢᠯᠡᠯ︾ ᠢ ᠠᠷᠪᠠᠭᠠᠳ ᠵᠢᠯ ᠬᠢᠭᠰᠡᠨ ᠴᠦ᠂ ᠪᠦᠷ ᠤᠷᠳᠤᠰ ᠨᠤᠳᠤᠭ ᠤᠨ ᠭᠡᠪᠴᠢᠶᠡᠨ ᠳᠤ ᠯᠠ ᠪᠠᠶᠢᠭᠰᠠᠨ ᠪᠢᠯᠠ᠃ ᠪᠢ ᠦᠭᠡᠷ᠎ᠠ ᠮᠤᠩᠭᠤᠯ ᠤᠷᠤᠨ ᠢ ᠰᠠᠨᠠᠭᠰᠠᠨ ᠦᠭᠡᠢ ᠪᠢᠰᠢ᠂ ᠲᠠᠩᠴᠢ ᠰᠠᠨᠠᠭᠰᠠᠨ ᠳ᠋ᠠ᠃ ᠭᠡᠬᠦ ᠳᠤ ︽ᠬᠦᠨᠵᠢᠯᠡ ᠶᠢᠨ ᠢᠶᠠᠨ ᠬᠢᠷᠢ ᠪᠠᠷ ᠬᠦᠯ ᠢᠶᠠᠨ ᠵᠢᠭᠡ︕︾ ᠭᠡᠰᠡᠨ ᠨᠢᠭᠡ ᠰᠤᠷᠭᠠᠯ ᠦᠭᠡ ᠪᠠᠷ᠂ ᠬᠤᠯᠠ ᠭᠠᠵᠠᠷ ᠢ ᠪᠤᠳᠤᠵᠤ ᠴᠢᠳᠠᠭᠰᠠᠨ ᠠᠴᠠ ᠯᠠ ᠪᠢᠰᠢ᠂ ᠬᠦᠯ  ᠢᠶᠠᠨ ᠵᠢᠭᠡᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠨᠢ ᠮᠢᠨᠤ ᠵᠦᠢᠯ ᠵᠦᠢᠯ ᠤᠨ ᠬᠦᠴᠦ ᠴᠢᠳᠠᠯ ᠮᠡᠬᠦᠰᠳᠡᠭᠰᠡᠨ ᠤ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠃ ᠡᠨᠡ ᠤᠳᠠᠭ᠎ᠠ᠂ ᠠᠶᠤᠮᠰᠢᠭ ᠦᠭᠡᠢ ᠪᠠᠷ ᠬᠦᠨᠵᠢᠯᠠ ᠶᠢᠨ ᠢᠶᠠᠨ ᠭᠠᠳᠠᠨ᠎ᠠ ᠬᠦᠯ ᠢᠶᠠᠨ ᠵᠢᠭᠡᠵᠤ᠂ ᠴᠤᠬᠤᠮ ᠴᠦ ᠬᠤᠯᠠ ᠲᠡᠭᠷᠢ ᠤᠨ ᠲᠤᠤᠷᠠᠬᠢ ᠨᠤᠳᠤᠭ ᠲᠤ ᠤᠴᠢᠭᠰᠠᠨ ᠶᠤᠮ᠃ ᠶᠡᠭᠡ ᠬᠢᠩᠭᠠᠨ ᠲᠠᠪᠠᠭ᠎ᠠ ᠭᠡᠬᠦ ᠡᠨᠡ ᠭᠠᠵᠠᠷ ᠪᠢ ᠠᠩᠬ᠎ᠠ ᠬᠦᠯ ᠬᠢᠰᠭᠡᠵᠤ ᠪᠠᠶᠢᠨ᠎ᠠ᠃ ᠬᠦᠮᠦᠨ ᠭᠡᠵᠤ ᠬᠦᠯ ᠬᠦᠷᠦᠭᠰᠡᠨ ᠭᠠᠵᠠᠷ ᠰᠡᠳᠬᠢᠯ ᠬᠦᠷᠳᠡᠭ ᠴᠦ᠂ ᠰᠡᠳᠬᠢᠯ ᠬᠦᠷᠦᠭᠰᠡᠨ ᠭᠠᠵᠠᠷ ᠬᠦᠯ ᠬᠦᠷᠬᠦ ᠨᠢ ᠴᠦ ᠪᠤᠢ᠃          ᠵᠢᠷᠦᠭᠡᠨ ᠤ ᠬᠠᠭᠤᠴᠢᠨ ᠠᠷᠬᠠᠭ ᠮᠢᠨᠢ ᠬᠦᠳᠡᠯᠦᠭᠰᠡᠨ ᠲᠠᠢ᠂ ᠤᠯᠠᠨ ᠠᠷᠪᠢᠨ ᠶᠠᠪᠤᠳᠠᠯ ᠤᠳ ᠢᠶᠠᠨ ᠵᠦᠭ ᠴᠢᠭ ᠢ ᠨᠢ ᠤᠯᠬᠤ ᠭᠡᠵᠤ ᠶᠠᠭᠠᠷᠡᠵᠤ ᠡᠬᠦᠷᠳᠦᠭᠰᠡᠨ ᠲᠠᠢ᠂ ᠨᠡᠩ ᠴᠦ ᠵᠦᠢᠯ ᠤᠨ ᠲᠡᠮᠡᠦᠯᠦᠯ ᠢ ᠵᠢᠷᠦᠭᠡᠨ ᠳᠡᠭᠡᠨ ᠡᠷᠴᠢᠮᠯᠡᠭᠰᠡᠨ ᠲᠠᠢ ᠁ ᠦᠴᠦᠭᠡᠳᠦᠷ ᠰᠦᠨᠢ ᠲᠡᠮᠡᠢ ᠤᠨᠳᠠᠵᠤ ᠴᠢᠳᠠᠭ᠎ᠠ ᠦᠭᠡᠢ᠃ ᠦᠦᠷ ᠢᠶᠠᠷ ᠪᠤᠰᠴᠦ ᠬᠦᠦ ᠪᠠᠨ ᠦᠨᠦᠰᠴᠦ ᠦᠨᠦᠰᠦᠭᠡᠳ ᠨᠢᠰᠭᠡᠯ  ᠤᠨ ᠲᠠᠯᠡᠪᠡᠢ ᠤᠷᠤᠭᠤ ᠭᠠᠷᠤᠭᠰᠠᠨ ᠶᠤᠮ᠃          ᠦᠨᠦᠳᠦᠷ ᠤᠨ ᠨᠢᠰᠭᠡᠯ ᠶᠠᠭ ᠯᠠ ᠵᠢᠷᠦᠭᠡᠨ ᠤ ᠮᠢᠨᠢ ᠭᠡᠮ ᠠᠷᠬᠠᠭ ᠢ ᠠᠷᠭᠠᠳᠠᠨ ᠲᠠᠶᠢᠪᠤᠰᠢᠷᠠᠭᠤᠯᠬᠤ ᠭᠡᠵᠤ ᠪᠠᠶᠢᠭ᠎ᠠ ᠰᠢᠭ᠋᠂ ᠲᠤᠭᠳᠠᠭᠤᠨ ᠵᠦᠭᠡᠯᠡᠭᠡᠨ ᠢᠶᠠᠷ ᠠᠶᠠᠯᠠᠨ᠎ᠠ᠃ ᠡᠨᠡ ᠵᠢᠯᠤᠭᠤᠴᠢ ᠮᠢᠨᠤ ᠡᠪᠡᠳᠴᠢᠨ ᠢ ᠮᠡᠳᠡᠭᠡᠳ ᠨᠢᠰᠭᠡᠯ ᠢᠶᠠᠨ ᠬᠢᠴᠢᠶᠠᠨ ᠵᠢᠯᠤᠭᠤᠳᠴᠦ ᠪᠠᠶᠢᠬᠤ ᠨᠢ ᠭᠡᠵᠤ ᠪᠢ ᠪᠤᠳᠤᠪᠠ ᠃ ᠴᠤᠩᠬᠤ ᠪᠠᠷ ᠬᠠᠷᠠᠭᠳᠠᠬᠤ ᠵᠤᠵᠠᠭᠠᠨ ᠴᠠᠭᠠᠨ ᠡᠬᠦᠯᠠ᠂ ᠰᠠᠶ᠋ᠢᠬᠠᠨ ᠤ ᠮᠢᠨᠤ ᠦᠨᠦᠰᠴᠦ ᠭᠠᠷᠤᠭᠰᠠᠨ ᠬᠦᠦ ᠶᠢᠨ ᠮᠢᠨᠢ ᠬᠠᠴᠠᠷ ᠠᠴᠠ ᠦᠭᠡᠷ᠎ᠡ ᠦᠭᠡᠢ᠃ ᠬᠠᠶᠢᠷᠠᠳᠤ ᠶᠢᠨ ᠮᠢᠨᠢ ︽ᠨᠢᠯᠪᠤᠰᠤ ᠬᠦᠯᠦᠰᠦ ᠪᠠᠨ ᠠᠷᠴᠢ︕︾ ᠭᠡᠮᠡᠨ ᠬᠦᠷᠭᠡᠵᠤ ᠦᠭᠬᠦᠭᠰᠡᠨ ᠰᠠᠩᠰᠡᠭᠡᠷ ᠴᠠᠭᠠᠨ ᠠᠯᠴᠢᠭᠤᠷ ᠰᠢᠭ᠋ ᠵᠤᠵᠠᠭᠠᠨ ᠡᠬᠦᠯᠠ᠂ ᠮᠢᠨᠤ ᠰᠠᠭᠤᠭ᠎ᠠ ᠨᠢᠰᠭᠡᠯ ᠢ ᠠᠷᠴᠢᠨ ᠵᠦᠯᠬᠦᠵᠤ᠂ ᠮᠢᠨᠤ ᠵᠢᠷᠦᠭᠡᠨ ᠤ ᠡᠮᠵᠢᠭ ᠢ ᠠᠷᠴᠢᠨ ᠠᠷᠢᠭᠤᠳᠬᠠᠵᠤ᠂ ᠨᠠᠮᠠᠢᠢ ᠶᠡᠭᠡ ᠬᠢᠩᠭᠠᠨ ᠤ ᠨᠤᠳᠤᠭ ᠲᠡᠪᠢᠰᠭᠡᠷ ᠲᠡᠭᠡᠷ᠎ᠡ ᠪᠠᠭᠤᠯᠭᠠᠪᠠ᠃               ᠭᠠᠷᠪᠤ ︵ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠪᠠᠳᠠᠷᠠᠬᠤ ᠪᠠᠯᠭᠠᠰᠤᠨ ᠤ ᠲᠡᠳ᠋ ᠰᠤᠮᠤᠨ ᠲᠠᠷᠤᠭ᠎ᠠ᠂ ᠬᠠᠤᠯᠢ ᠴᠠᠭᠠᠵᠠ ᠶᠢ ᠭᠤᠤᠯᠴᠢᠯᠠᠨ ᠬᠠᠮᠢᠶᠠᠷᠴᠦ ᠪᠤᠢ︶ ᠪᠠᠭ᠋ᠠᠨ ᠤᠳᠠᠵᠤ ᠨᠠᠮ᠎ᠠ ᠲᠤᠰᠪᠠ᠃         ᠰᠡᠬᠦᠳᠡᠷᠯᠡᠬᠦ᠂ ᠵᠢᠷᠤᠭᠯᠠᠬᠤ ᠮᠠᠰᠢᠨ᠂ ᠨᠤᠮ ᠰᠤᠳᠤᠷ ᠵᠡᠷᠭᠡ ᠭᠡᠳᠦᠨ ᠪᠤᠭᠴᠦ  ᠪᠠᠨ ᠡᠬᠦᠷᠴᠦ ᠴᠢᠷᠦᠨ ᠭᠠᠷᠴᠦ ᠢᠷᠡᠪᠡᠯ᠂ ᠴᠠᠭᠠᠨ ᠦᠩᠭᠡ ᠶᠢᠨ ᠴᠠᠭᠳᠠᠭᠠᠨ ᠲᠡᠷᠭᠡ ᠮᠢᠨᠤ ᠬᠠᠵᠠᠭᠤ ᠳᠤ ᠢᠷᠡᠪᠡ᠃ ᠪᠢ ᠲᠡᠬᠦᠨ ᠢ ᠭᠠᠷᠪᠤ ᠮᠥᠨ ᠭᠡᠳᠡᠭ ᠢ ᠭᠠᠷᠴᠠᠭ᠎ᠠ ᠦᠭᠡᠢ ᠲᠠᠨᠢᠵᠤ᠂ ᠢᠨᠢᠶᠡᠵᠤ ᠬᠦᠷᠪᠠ᠃         ᠠᠭᠤᠯᠵᠠᠭ᠎ᠠ ᠦᠭᠡᠢ ᠡᠨᠡ ᠠᠬ᠎ᠠ ᠳᠤ ᠪᠢ ᠮᠦᠷᠬᠦᠵᠤ᠂ ᠡᠰᠡᠬᠦᠯ᠎ᠠ ᠭᠠᠷ ᠠᠳᠬᠤᠵᠤ ᠠᠭᠤᠯᠵᠠᠮᠠᠷ ᠪᠠᠶᠢᠭᠰᠠᠨ ᠴᠦ᠂ ᠲᠡᠷᠠ ᠬᠠᠷᠢᠨ ᠨᠠᠮᠠᠢᠢ ᠵᠢᠰᠢᠬᠦᠦ ᠰᠢᠭ ᠬᠠᠷᠠᠰᠬᠢᠨ ᠲᠤᠯᠤᠭᠠᠢ ᠲᠤᠬᠢᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢᠶᠠᠨ ᠪᠤᠭᠴᠦ ᠶᠢ ᠮᠢᠨᠢ ᠲᠤᠰᠴᠦ ᠲᠡᠷᠭᠡᠨ ᠲᠡᠭᠡᠷ᠎ᠡ ᠪᠠᠨ ᠭᠠᠷᠭᠠᠭᠠᠳ᠂ ᠨᠠᠮᠠᠢᠢ ᠡᠮᠦᠨ᠎ᠠ ᠤᠷᠤᠨ ᠲᠡᠭᠡᠷ᠎ᠡ ᠤᠷᠢᠪᠠ᠃          ᠮᠢᠨᠤ ᠠᠳᠡ ᠢᠷᠡᠭᠰᠡᠨ ᠮᠢᠨᠢ ᠡᠨᠡ ᠬᠦᠮᠦᠨ ᠲᠠᠢ ᠬᠤᠯᠪᠤᠭ᠎ᠠ ᠲᠠᠢ ᠶᠤᠮ᠃ ᠲᠡᠷᠡ ᠪᠤᠯ ᠪᠠᠳᠠᠷᠠᠬᠤ ᠨᠤᠳᠤᠭ ᠲᠤ ᠦᠰᠴᠦ ᠲᠦᠷᠦᠭᠰᠡᠨ ᠬᠦᠮᠦᠨ᠃ ᠰᠦᠯᠵᠢᠶ᠎ᠡ ᠪᠠᠷ ᠲᠡᠮᠵᠢᠵᠤ ᠮᠢᠨᠤ ᠬᠤᠯᠪᠤᠭ᠎ᠠ ᠪᠦᠷᠭᠡ ᠪᠠᠷ ᠤᠯᠠᠨ ᠤᠷᠤᠵᠤ ᠭᠠᠷᠳᠠᠭ ᠲᠡᠷᠡ᠂ ᠭᠡᠭᠡᠷ᠎ᠡ ᠶᠢᠨ ᠰᠢᠨᠵᠢᠯᠡᠯ ᠢ ᠮᠢᠨᠢ ᠲᠤᠷᠠᠯᠠᠭᠰᠠᠨ ᠶᠠᠩᠵᠤᠳᠠᠢ᠃ ᠪᠠᠶᠢᠨ ᠪᠠᠶᠢᠨ ᠪᠠᠳᠠᠷᠠᠬᠤ ᠨᠤᠳᠤᠭ ᠤᠨ ᠢᠶᠠᠨ ᠠᠭᠤᠯᠠ ᠬᠠᠳᠠᠨ᠂ ᠤᠰᠤ ᠭᠤᠤᠯ᠂ ᠤᠷᠭᠤᠮᠠᠯ ᠮᠤᠳᠤᠳ ᠤᠨ ᠲᠤᠬᠠᠢ ᠪᠠ ᠬᠦᠮᠦᠨ ᠠᠮᠢᠳᠠᠨ ᠤ ᠲᠤᠬᠠᠢ ᠠᠯᠢ ᠤᠯᠠᠨ ᠦᠯᠢᠭᠡᠷ ᠤᠴᠢᠷ  ᠢ᠂ ᠠᠮᠢᠰᠬᠤᠭ᠎ᠠ ᠠᠪᠤᠯ ᠦᠭᠡᠢ ᠬᠡᠯᠡᠭᠡᠳ ᠪᠠᠶᠢᠬᠤ ᠨᠢ ᠶᠠᠭ ᠯᠠ ᠤᠷᠢᠨ ᠲᠤᠯᠠᠭᠠᠨ ᠬᠠᠪᠤᠷ ᠤᠨ ᠡᠳᠦᠷ᠂ ᠠᠭᠤᠯᠠ  ᠶᠢᠨ ᠡᠩᠭᠡᠷ ᠢᠶᠠᠷ ᠠᠬᠢ ᠨᠢᠳᠤᠯᠡᠵᠤ ᠪᠤᠢ ᠰᠢᠭ᠋ ᠴᠠᠭᠠᠨ᠎ᠠ ᠠᠴᠠ ᠨᠢ ᠦᠨᠳᠡᠯᠵᠡᠵᠤ ᠪᠤᠢ ᠨᠢ ᠮᠠᠳᠡᠭᠳᠡᠨ᠎ᠠ᠃ ︽ᠭᠠᠵᠠᠷ  ᠤᠨ ᠠᠮᠢᠰᠬᠤᠭ᠎ᠠ᠂ ᠤᠰᠤᠨ ᠤ ᠠᠨᠢᠷ ᠢ ᠴᠢᠩᠨᠡᠵᠤ ᠴᠢᠳᠠᠳᠠᠭ ᠲᠠ ᠭᠡᠷᠪᠡ ᠮᠢᠨᠤ ᠡᠨᠡ ᠨᠤᠳᠤᠭ ᠢ ᠨᠢᠭᠡ ᠬᠠᠷᠠᠬᠤ ᠶᠤᠮ ᠪᠤᠯ᠂ ᠭᠡᠷᠪᠡ ᠲᠠᠨ ᠤ ᠲᠡᠷᠡ ᠠᠪᠳᠠᠯ ᠢᠶᠠᠷ ᠮᠢᠨᠤ ᠨᠤᠳᠤᠭ ᠤᠨ ᠪᠤᠭᠳᠠ ᠠᠭᠤᠯᠠ᠂ ᠬᠠᠮᠵᠢᠶ᠎ᠠ ᠬᠠᠳᠠ᠂ ᠴᠤᠤᠯ ᠭᠤᠤᠯ ᠁ ᠢ ᠨᠢᠭᠡ ᠪᠢᠴᠢᠬᠦ ᠶᠤᠮ ᠪᠤᠯ ᠁︾ ᠭᠡᠳᠡᠭ᠃ ᠬᠦᠳᠡᠭᠡ ᠭᠡᠭᠡᠷ᠎ᠠ᠂ ᠠᠶᠢᠯ ᠲᠤᠰᠬᠤᠨ  ᠢᠶᠠᠷ ᠭᠡᠷᠡᠭ ᠰᠢᠢᠳᠪᠦᠷᠢᠯᠡᠨ ᠶᠠᠪᠤᠭ᠎ᠠ ᠲᠡᠷᠡ᠂ ᠠᠭᠤᠯᠠ ᠤᠰᠤᠨ ᠤ ᠪᠠᠨ ᠬᠠᠵᠠᠭᠤ ᠠᠴᠠ ᠨᠠᠳᠠ ᠢᠩᠬᠢᠵᠤ ᠤᠳᠠᠰᠤ ᠢᠷᠡᠬᠦᠯᠬᠦ ᠪᠠᠷ᠂ ᠨᠤᠳᠤᠭ ᠤᠨ ᠬᠢᠨᠢ ᠰᠠᠯᠬᠢ ᠨᠢ ᠴᠦ ᠲᠡᠬᠦᠨ ᠲᠠᠢ ᠪᠤᠯᠢᠶᠠᠯᠳᠤᠨ ︽ᠲᠡ ᠠᠳᠡ ᠨᠢᠭᠡ ᠢᠷᠡᠭᠡᠷᠡᠢ᠂ ᠮᠢᠨᠤ ᠪᠠᠰᠠ ᠬᠡᠯᠡᠬᠦ ᠦᠭᠡ ᠪᠠᠶᠢᠨ᠎ᠠ ᠰᠢᠦ ᠁︾ ᠭᠡᠮᠡᠨ ᠬᠡᠯᠡᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋᠂ ᠭᠠᠷ ᠤᠳᠠᠰᠤᠨ ᠤ ᠬᠢᠨᠢ ᠴᠠᠭᠠᠨ᠎ᠠ ᠠᠴᠠ ᠰᠡᠷ ᠰᠡᠷ ᠰᠡᠷᠴᠢᠬᠢᠨᠡᠵᠤ᠂ ᠭᠠᠷᠪᠤ ᠶᠢᠨ ᠲᠠᠭᠤ ᠶᠢ ᠦᠶ᠎ᠡ ᠦᠶ᠎ᠡ ᠪᠠᠯᠠᠯᠳᠠᠭ᠃ ᠦᠭᠡᠢ᠂ ᠡᠨᠡ ᠬᠤᠯᠠ  ᠶᠢᠨ ᠤᠳᠠᠰᠤ ᠶᠢ ᠴᠤᠬᠤᠮ ᠭᠠᠷᠪᠤ ᠠᠬ᠎ᠠ ᠢᠷᠡᠬᠦᠯᠦᠭᠰᠡᠨ ᠶᠤᠮ ᠤᠤ︖ ᠭᠠᠵᠠᠷ ᠨᠤᠳᠤᠭ ᠨᠢ ᠢᠷᠡᠬᠦᠯᠦᠭᠰᠡᠨ ᠶᠤᠮ ᠤᠤ︖ ᠭᠡᠵᠤ ᠪᠢ ᠬᠠᠶᠠ ᠪᠤᠳᠤᠵᠤ ᠠᠪᠳᠠᠭ᠃ ᠡᠳᠦᠷᠵᠢᠨ ᠠᠭᠤᠯᠠ ᠠᠭᠤᠯᠠ ᠤᠰᠤ ᠤᠰᠤ ᠭᠡᠵᠤ ᠨᠠᠳᠠ ᠬᠠᠰᠬᠢᠷᠤᠭᠰᠠᠭᠠᠷ ᠪᠠᠶᠢᠵᠤ᠂ ᠲᠡᠬᠦᠨ ᠤ ᠵᠢᠷᠦᠭᠡᠨ ᠬᠢᠯᠪᠡᠷᠢ ᠲᠠᠢ ᠠᠭᠤᠯᠠ ᠨᠢ ᠮᠢᠨᠤ ᠵᠢᠷᠦᠭᠡᠨ ᠳᠤ ᠰᠦᠨᠳᠡᠷᠯᠡᠬᠦ ᠪᠤᠯᠵᠤ᠂ ᠲᠡᠬᠦᠨ ᠤ ᠰᠡᠳᠬᠢᠯ ᠲᠤᠳᠤᠷᠠᠬᠢ ᠭᠤᠤᠯ ᠨᠢ ᠮᠢᠨᠤ ᠰᠡᠳᠬᠢᠯ ᠤᠨ ᠲᠤᠳᠤᠭᠤᠷ ᠤᠷᠤᠰᠬᠤ ᠪᠤᠯᠪᠠ᠃ ᠡᠨᠡ ᠭᠤᠤᠯ ᠤᠨ ᠤᠷᠤᠰᠬᠠᠯ ᠢ ᠲᠠᠭᠠᠵᠤ ᠪᠢ ᠬᠢᠩᠭᠠᠨ ᠤ ᠭᠠᠵᠠᠷ ᠲᠡᠭᠡᠷ᠎ᠡ ᠬᠢᠰᠬᠢᠭᠰᠡᠨ ᠶᠤᠮ᠃         ᠲᠡᠷᠭᠡᠨ ᠳᠤ ᠭᠠᠷᠤᠮᠠᠭᠴᠠ ᠪᠢᠳᠠᠨ ᠪᠠᠳᠠᠷᠠᠬᠤ ᠵᠦᠭ ᠶᠠᠪᠤᠪᠠ᠃ ᠲᠡᠷᠭᠡᠨ ᠲᠤᠳᠤᠷ᠎ᠠ ᠠᠴᠠ ᠬᠠᠮᠢᠭ᠎ᠠ ᠴᠦ ᠪᠠᠶᠢᠭ᠎ᠠ ᠦᠭᠡᠢ ᠨᠢᠭᠡᠨ ᠰᠢᠨ᠎ᠠ ᠦᠨᠦᠷ ᠰᠡᠩᠬᠢᠨᠡᠪᠡ᠃ ᠡᠨᠡ ᠰᠢᠨ᠎ᠠ ᠦᠨᠦᠷ ᠢ ᠪᠢ ᠶᠠᠭ ᠨᠠᠷᠡᠯᠡᠵᠤ ᠲᠡᠶᠢᠯᠬᠦ ᠦᠭᠡᠢ ᠪᠠᠶᠢᠪᠠ᠃ ᠪᠠᠳᠠᠷᠠᠬᠤ  ᠳᠤ ᠬᠦᠷᠬᠦ ᠵᠠᠮ ᠳᠠᠭᠠᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠲᠦᠪ ᠪᠤᠯᠬᠤ ᠢᠨᠳᠡᠷ ᠢ ᠦᠩᠭᠡᠷᠡᠳᠡᠭ ᠶᠤᠮ ᠪᠠᠶᠢᠪᠠ᠃ ᠨᠢᠰᠭᠡᠯ ᠲᠡᠭᠡᠷ᠎ᠡ ᠨᠢᠯᠪᠦᠰᠤ ᠶᠢ ᠮᠢᠨᠢ ᠠᠷᠴᠢᠵᠤ ᠪᠠᠶᠢᠭᠰᠠᠨ ᠴᠡᠩᠭᠡᠷ ᠴᠠᠭᠠᠨ ᠡᠬᠦᠯᠠ᠂ ᠨᠠᠮᠠᠢᠢ ᠭᠠᠵᠠᠷ ᠲᠡᠭᠡᠷ᠎ᠡ ᠪᠠᠭᠤᠭᠰᠠᠨ ᠴᠦ᠂ ᠠᠭᠠᠷ ᠲᠦᠬᠦᠷᠡᠩ ᠬᠤᠷᠠᠯᠳᠤᠭᠠᠳ᠂ ᠦᠪᠡᠷ ᠢ ᠮᠢᠨᠢ ᠵᠦᠭᠡᠯᠡᠨ ᠴᠠᠭᠠᠨ ᠦᠩᠭᠡᠨ ᠳᠡᠭᠡᠨ ᠠᠭᠤᠰᠬᠠᠵᠤ ᠠᠪᠬᠤ ᠭᠡᠮᠡᠨ ᠤᠷᠤᠯᠳᠤᠵᠤ ᠪᠤᠢ ᠰᠢᠭ᠋᠃ ︽ᠮᠠᠷᠭᠠᠰᠢ ᠴᠠᠰᠤ ᠤᠨᠠᠬᠤ ᠨᠢ ᠡ ᠁︾ ᠭᠡᠵᠤ ᠭᠠᠷᠪᠤ ᠬᠡᠯᠡᠪᠡ᠃          ᠵᠠᠮ ᠲᠤᠵᠢ ᠦᠨᠳᠦᠷ ᠦᠨᠳᠦᠷ ᠠᠭᠤᠯᠠ ᠬᠠᠶᠢᠷᠬᠠᠨ ᠵᠠᠯᠭᠠᠯᠳᠤᠵᠤ᠂ ᠠᠭᠤᠯᠠᠰ ᠤᠨ ᠨᠦᠮᠦᠷᠢ ᠳᠤᠨᠢ ᠭᠡᠰᠡᠭ ᠭᠡᠰᠡᠭ ᠠᠶᠢᠯ ᠲᠤᠰᠬᠤᠨ ᠪᠦᠭᠡᠮᠨᠡᠷᠡᠨ ᠰᠠᠭᠤᠷᠢᠰᠢᠭᠰᠠᠨ ᠬᠠᠷᠠᠭᠳᠠᠨ᠎ᠠ᠃ ᠮᠠᠨ ᠤ ᠤᠷᠳᠤᠰ ᠲᠤ ᠢᠩᠬᠢᠵᠤ ᠲᠦᠪᠯᠡᠷᠡᠨ ᠰᠠᠭᠤᠭᠰᠠᠨ ᠢ ᠲᠤᠰᠬᠤᠨ ᠭᠡᠳᠡᠭ ᠪᠤᠯ᠂ ᠲᠡᠳᠡ ᠬᠠᠷᠢᠨ ᠲᠡᠬᠦᠨ ᠢᠶᠠᠨ ︽ᠠᠶᠢᠯ︾ ᠭᠡᠳᠡᠭ ᠶᠤᠮ ᠭᠡᠨ᠎ᠠ᠃ ᠲᠡᠭᠡᠪᠡᠯ ᠠᠶᠢᠯ ᠢ ᠨᠢ ᠴᠤᠬᠤᠮ ᠶᠠᠭᠤ ᠭᠡᠵᠤ ᠨᠠᠷᠠᠯᠡᠳᠡᠭ ᠢ ᠪᠢ ᠮᠡᠳᠡᠬᠦ ᠦᠭᠡᠢ᠃ ᠪᠢ ᠬᠠᠰᠢ ᠯᠠ ᠨᠢᠭᠡ ᠭᠡᠷ ᠪᠦᠯᠢ ᠶᠢ ᠠᠶᠢᠯ ᠭᠡᠵᠤ᠂ ᠤᠯᠠᠨ ᠠᠶᠢᠯ ᠪᠦᠭᠡᠮᠨᠡᠷᠡᠵᠤ ᠰᠠᠭᠤᠷᠢᠰᠢᠭᠰᠠᠨ ᠢ ᠨᠢ ᠲᠤᠰᠬᠤᠨ ᠭᠡᠵᠤ ᠲᠠᠳᠬᠠᠯᠰᠢᠭᠰᠠᠨ ᠢᠶᠠᠷ ᠢᠶᠠᠨ ᠬᠡᠯᠡᠶ᠎ᠡ︕         ᠲᠡᠳᠡᠭᠡᠷ ᠲᠤᠰᠬᠤᠨ ᠤ ᠠᠶᠢᠯ ᠪᠦᠷᠢ ᠵᠢᠨ‌ᠡᠬᠦᠳᠡ ᠪᠠᠷ ᠡᠷᠳᠡᠨᠢ ᠰᠢᠰᠢ ᠤᠪᠤᠭᠠᠯᠡᠵᠤ᠂ ᠭᠠᠳᠠᠭᠤᠷ ᠨᠢ ᠭᠠᠭ᠋ᠠᠢ ᠲᠠᠬᠢᠶ᠎ᠠ ᠬᠦᠶᠦᠯᠳᠦᠵᠤ᠂ ᠮᠠᠨ ᠤ ᠲᠡᠨᠳᠡᠬᠢ ᠶᠢᠨ ᠲᠠᠷᠢᠶᠠᠴᠢᠳ ᠤᠨ ᠲᠤᠰᠬᠤᠨ ᠲᠠᠢ ᠡᠭᠡᠭᠡ ᠠᠳᠠᠯᠢ ᠪᠠᠶᠢᠪᠠ᠃         ᠭᠠᠷᠪᠤ ᠬᠡᠯᠡᠬᠦ ᠳᠡᠭᠡᠨ ᠦᠨᠦ ᠵᠢᠯ ᠬᠤᠷ᠎ᠠ ᠪᠤᠷᠤᠭ᠎ᠠ ᠰᠠᠶᠢᠨ ᠠᠴᠠ ᠠᠶᠢᠯ ᠤᠳ ᠤᠨ ᠲᠠᠷᠢᠶᠠᠨ ᠬᠤᠷᠢᠶᠠᠯᠳᠠ ᠰᠠᠶᠢᠨ ᠶᠤᠮ ᠭᠡᠨ᠎ᠡ᠃ ᠭᠠᠭ᠋ᠠᠢ ᠨᠢ ᠴᠦ ᠭᠠᠶᠢᠭᠤᠷ ᠲᠠᠷᠭᠤᠯᠠᠵᠤ ᠭᠡᠨ᠎ᠠ᠃ ᠠᠳᠡᠬᠢ ᠶᠢᠨ ᠠᠶᠢᠯ ᠤᠳ ᠭᠠᠭ᠋ᠠᠢ ᠠᠯᠠᠬᠤ ᠡᠳᠦᠷ ᠢ ᠡᠯᠪᠡᠭ ᠬᠤᠷᠢᠶᠠᠯᠳᠠ ᠶᠢᠨ ᠡᠳᠦᠷ ᠢᠶᠠᠷ ᠪᠤᠳᠤᠵᠤ ᠬᠠᠮᠤᠭ ᠤᠶᠢᠷ᠎ᠠ ᠲᠤᠳᠤᠨᠤ ᠬᠦᠮᠦᠰ  ᠲᠡᠭᠡᠨ ᠭᠠᠭ᠋ᠠᠢ ᠶᠢᠨ ᠬᠠᠯᠠᠭᠤᠨ ᠮᠢᠬ᠎ᠠ ᠢᠳᠡᠬᠦᠯᠵᠤ᠂ ᠬᠦᠨᠳᠦᠳᠭᠡᠯ ᠢᠶᠠᠨ ᠢᠯᠡᠳᠭᠡᠳᠡᠭ ᠵᠠᠩᠰᠢᠯ ᠲᠠᠢ ᠶᠤᠮ ᠭᠡᠨ᠎ᠡ᠃         ᠢᠨᠳᠡᠷ ᠲᠤ ᠬᠦᠷᠦᠭᠡᠳ ᠪᠢᠳᠠᠨ ᠮᠤᠩᠭᠤᠯ ᠬᠤᠭᠤᠯᠠᠨ ᠭᠡᠷ ᠤᠯᠵᠤ᠂ ᠭᠠᠭ᠋ᠠᠢ ᠶᠢᠨ ᠱᠦᠯᠦ ᠲᠠᠢ ᠭᠤᠯᠢᠷ ᠪᠤᠳᠠᠭ᠎ᠠ ᠢᠳᠡᠪᠡ᠃ ᠪᠢ ᠪᠤᠳᠤᠬᠤ ᠪᠠᠷ᠂ ᠭᠠᠷᠪᠤ ᠠᠬ᠎ᠠ ᠨᠠᠮᠠᠢᠢ ᠬᠠᠮᠤᠭ ᠤᠶᠢᠷ᠎ᠠ ᠲᠤᠳᠤᠨᠤ ᠬᠦᠮᠦᠨ ᠭᠡᠵᠤ ᠬᠦᠨᠳᠦᠯᠡᠬᠦ ᠳᠡᠭᠡᠨ ᠡᠶᠢᠮᠤ ᠬᠤᠭᠤᠯᠠ ᠢᠳᠡᠬᠦᠯᠦᠭᠰᠡᠨ ᠪᠠᠶᠢᠬ᠎ᠠ᠃ ᠪᠢ ᠲᠦᠷᠦᠭᠰᠡᠨ ᠠᠴᠠ ᠠᠪᠤᠭᠠᠳ ᠤᠳᠤ ᠪᠤᠯᠳᠠᠯ᠎ᠠ ᠭᠠᠭ᠋ᠠᠢ ᠶᠢᠨ ᠱᠦᠯᠦ ᠲᠠᠢ ᠭᠤᠯᠢᠷ ᠪᠤᠳᠠᠭ᠎ᠠ ᠢᠳᠡᠭᠡ ᠦᠭᠡᠢ᠃         ᠢᠨᠳᠡᠷ ᠠᠴᠠ ᠭᠠᠷᠴᠦ ᠪᠠᠳᠠᠷᠠᠬᠤ ᠵᠦᠭ ᠶᠠᠪᠤᠬᠤ ᠳᠤ ᠨᠠᠷᠠ ᠰᠢᠩᠬᠢᠬᠦ ᠤᠶᠢᠷᠠᠳᠴᠦ ᠪᠠᠶᠢᠯ᠎ᠠ᠃ ᠭᠠᠷᠪᠤ᠂ ᠤᠯᠠᠩᠭᠡᠢ ᠤᠳᠠᠰᠤ ᠶᠢ ᠪᠦᠷ ᠡᠨᠡᠬᠦ ᠢᠨᠳᠡᠷ ᠠᠴᠠ ᠪᠠᠳᠠᠷᠬᠠᠤ ᠬᠦᠷᠬᠦ ᠵᠠᠮ ᠲᠡᠭᠡᠷ᠎ᠡ ᠲᠡᠷᠭᠡ ᠪᠠᠨ ᠪᠠᠷᠢᠬᠤ ᠲᠠᠭᠠᠤ ᠢᠷᠡᠬᠦᠯᠳᠡᠭ ᠶᠤᠮ ᠤᠴᠢᠷ ᠪᠢ ᠴᠦ ᠡᠨᠡ ᠭᠡᠰᠡᠭ ᠭᠠᠵᠠᠷ ᠢ ᠪᠠᠷᠤᠭ ᠲᠠᠨᠢᠮᠠᠷ ᠪᠤᠯᠵᠡᠢ᠃ ᠦᠨᠦᠳᠦᠷ ᠨᠠᠳᠠ ᠡᠨᠡ ᠵᠠᠮ ᠤᠨ ᠬᠠᠵᠠᠭᠤ ᠪᠠᠷ ᠬᠢ ᠠᠭᠤᠯᠠ ᠤᠰᠤ ᠪᠠᠨ ᠬᠠᠷᠠᠭᠤᠯᠬᠤ ᠶᠤᠮ ᠭᠡᠵᠤ᠂ ᠴᠤᠤᠯ ᠭᠤᠤᠯ ᠤᠨ ᠴᠦᠬᠦᠷᠡᠮ ᠤᠨ ᠬᠠᠵᠠᠭᠤ ᠳᠤ ᠬᠦᠷᠪᠠ᠃               ᠲᠡᠯᠡᠢ ᠭᠡᠮᠡᠷ ᠶᠡᠭᠡ ᠴᠦᠬᠦᠷᠡᠮ ᠤᠨ ᠤᠰᠤᠨ ᠤ ᠴᠠᠭᠠᠳᠠᠢ ᠨᠢ ᠠᠭᠤᠯᠠ᠂ ᠠᠭᠤᠯᠠ ᠶᠢᠨ ᠴᠠᠭᠠᠳᠠᠢ ᠨᠢ ᠨᠠᠷᠠ᠂ ᠴᠡᠭᠡᠨ ᠡᠬᠦᠯᠠ ᠪᠠᠨ ᠨᠠᠪᠳᠡᠯᠦᠨ ᠲᠤᠶᠠᠭᠠᠷᠠᠭᠠᠳ ᠤᠨᠠᠮᠠᠷ ᠪᠠᠶᠢᠪᠠ᠃ ᠠᠭᠤᠯᠠ ᠨᠢ ᠴᠡᠩᠭᠡᠷ ᠲᠡᠭᠡᠨ ᠶᠤᠮ ᠤᠤ᠂ ᠤᠰᠤ ᠨᠢ ᠲᠤᠩᠭᠠᠯᠠᠭ ᠲᠠᠭᠠᠨ ᠶᠤᠮ ᠤᠤ᠂ ᠡᠰᠡᠬᠦᠯ᠎ᠠ ᠡᠬᠦᠯᠠ ᠨᠢ ᠦᠩᠭᠡᠷᠡᠦ ᠴᠠᠭᠠᠨ ᠳᠠᠭᠠᠨ ᠶᠤᠮ ᠤᠤ᠂ ᠤᠨᠠᠬᠤ ᠭᠡᠵᠤ ᠪᠠᠶᠢᠭ᠎ᠠ ᠨᠠᠷᠠ ᠨᠢ ᠶᠠᠭᠠᠨ᠂ ᠴᠡᠩᠭᠡᠷ᠂ ᠤᠯᠠᠭᠠᠨ ᠁ ᠭᠡᠳᠦᠨ ᠦᠩᠭᠡ ᠪᠠᠷ ᠰᠤᠯᠤᠩᠭᠠᠷᠠᠭᠠᠳ᠂ ᠲᠡᠭᠷᠢ  ᠶᠢᠨ ᠬᠠᠶᠠᠭᠠᠨ ᠳᠤ ᠲᠤᠰᠤᠨ ᠵᠢᠷᠤᠭ ᠡᠯᠬᠦᠭᠰᠡᠨ ᠶᠤᠮ ᠰᠢᠭ᠃               ᠪᠢ ᠵᠦᠭ ᠠᠳᠡᠬᠦᠷᠡᠭᠰᠡᠨ ᠶᠤᠮ ᠪᠠᠶᠢᠬ᠎ᠠ᠃ ᠲᠠᠷᠠ ᠰᠠᠶᠢᠬᠠᠨ ᠨᠠᠷᠠ ᠰᠢᠩᠬᠢᠬᠦ ᠦᠵᠡᠮᠵᠢ ᠨᠢ ᠵᠡᠬᠦᠨ ᠵᠦᠭ ᠲᠤ ᠬᠠᠷᠠᠭᠳᠠᠵᠤ ᠪᠠᠶᠢᠪᠠ᠃ ︽ᠲᠠᠨ ᠤ ᠠᠳᠡᠬᠢ ᠶᠢᠨ ᠨᠠᠷᠠᠨ ᠵᠠᠬᠦᠨ ᠵᠦᠭ ᠲᠤ ᠰᠢᠩᠬᠢᠳᠡᠭ ᠶᠤᠮ ᠤᠤ︖︾ ᠭᠡᠵᠤ ᠠᠰᠠᠭᠤᠴᠢᠬᠠᠮᠠᠷ ᠰᠠᠨᠠᠭᠳᠠᠭᠰᠠᠨ ᠪᠦᠭᠡᠳ ᠵᠡᠬᠦᠨ ᠵᠦᠭ ᠲᠤ ᠰᠢᠩᠬᠢᠳᠡᠭ ᠨᠠᠷᠠᠨ ᠯᠠ ᠡᠶᠢᠮᠤ ᠭᠤᠶᠤ ᠰᠠᠶᠢᠬᠠᠨ ᠦᠩᠭᠡ ᠪᠠᠷ ᠰᠤᠯᠤᠩᠭᠠᠷᠨ ᠲᠤᠶᠠᠭᠠᠷᠠᠳᠠᠭ ᠶᠤᠮ ᠪᠠᠶᠢᠬ᠎ᠠ ᠭᠡᠵᠤ ᠴᠦ ᠪᠤᠳᠤᠪᠠ᠃ ᠭᠡᠳᠦᠶᠢᠪᠡᠷ ᠵᠤᠵᠠᠭᠠᠨ ᠡᠬᠦᠯᠠ ᠲᠠᠢ ᠪᠦᠷᠬᠦᠭ ᠲᠡᠭᠷᠢ ᠪᠠᠶᠢᠭᠰᠠᠨ ᠴᠦ᠂ ᠲᠡᠷᠡ ᠦᠵᠡᠮᠵᠢ ᠶᠢ ᠪᠢ ᠲᠤᠷᠠᠯᠠᠬᠤ ᠳᠠᠭᠠᠨ ᠲᠠᠩᠴᠢ ᠤᠯᠠᠨ ᠰᠡᠬᠦᠳᠡᠷᠯᠡᠪᠡ᠃         ᠭᠠᠷᠪᠤ ᠲᠡᠮᠡᠢ ᠲᠤᠭᠤᠬᠤ ᠴᠦ ᠦᠭᠡᠢ ᠪᠠᠶᠢᠪᠠ᠃         ᠪᠠᠳᠠᠷᠠᠬᠤ ᠰᠤᠮᠤᠨ ᠳᠤ ᠤᠷᠤᠵᠤ ᠢᠷᠡᠬᠦ ᠳᠤ ᠰᠦᠨᠢ ᠪᠤᠯᠤᠭᠰᠠᠨ ᠠᠴᠠ ᠶᠠᠭᠤ ᠴᠦ ᠤᠯᠵᠤ ᠬᠠᠷᠠᠭ᠎ᠠ ᠦᠭᠡᠢ᠃ ᠭᠠᠷᠪᠤ ᠨᠠᠮᠠᠢᠢ ᠲᠠᠭᠠᠭᠤᠯᠵᠤ ᠨᠢᠭᠡ ᠪᠠᠭᠤᠳᠠᠯ ᠳᠤ ᠬᠦᠷᠭᠡᠪᠡ᠃ ᠤᠷᠤᠪᠠᠯ ᠪᠡᠶ᠎ᠡ ᠡᠷᠬᠢᠬᠦ ᠵᠠᠢ ᠦᠭᠡᠢ ᠵᠢᠵᠢᠭ ᠪᠦᠭᠡᠳ ᠬᠠᠷᠠᠩᠭᠤᠢ ᠦᠷᠦᠭᠡ ᠪᠠᠶᠢᠪᠠ᠃ ᠬᠠᠷᠠᠩᠭᠤᠢ  ᠠᠴᠠ ᠨᠢ ᠠᠶᠤᠬᠤ ᠴᠦ ᠪᠢᠰᠢ᠂ ᠴᠠᠬᠢᠯᠭᠠᠨ ᠲᠠᠢ ᠶᠤᠮ ᠴᠢᠨᠢ᠃ ᠲᠡᠷᠡ ᠦᠷᠦᠭᠡ ᠠᠴᠠ ᠮᠥᠨ ᠯᠠ ᠰᠠᠶ᠋ᠢᠬᠠᠨ ᠤ ᠲᠡᠷᠭᠡᠨ ᠲᠡᠭᠡᠷᠡᠬᠢ ᠦᠨᠦᠷ ᠲᠠᠢ ᠠᠳᠠᠯᠢᠬᠠᠨ ᠦᠨᠦᠷ ᠰᠡᠩᠬᠢᠨᠡᠪᠡ᠃ ᠡᠨᠡ ᠪᠤᠯ ᠡᠳᠡᠨ ᠤ ᠰᠤᠮᠤᠨ ᠳᠠᠬᠢ ᠬᠠᠮᠤᠭ ᠭᠠᠶᠢᠭᠤᠢ ᠪᠠᠭᠤᠳᠠᠯ ᠭᠡᠭᠴᠢ ᠶᠢ ᠪᠢ ᠪᠠᠷᠤᠭᠯᠠᠭᠰᠠᠨ ᠠᠴᠠ ᠲᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠭᠡᠷ ᠡᠬᠦᠳᠡᠨ ᠠᠴᠠ ᠪᠠᠨ ᠭᠠᠷᠤᠭᠰᠠᠨ ᠬᠦᠮᠦᠨ᠂ ᠶᠠᠭᠤ ᠶᠢ ᠨᠢ ᠲᠡᠭᠡᠵᠤ ᠡᠷᠬᠢᠮᠰᠦᠭᠯᠡᠬᠦ ᠪᠤᠢ ᠳ᠋ᠠ᠂ ᠵᠠᠭᠤ ᠭᠠᠷᠤᠢ ᠵᠢᠩ ᠤᠨ ᠬᠦᠨᠳᠦᠴᠠ ᠲᠠᠢ ᠪᠠᠶ᠎ᠡ ᠪᠠᠨ ᠲᠠᠯᠪᠢᠭᠠᠳ ᠤᠨᠳᠠᠴᠢᠬᠤ ᠵᠢᠭᠠᠬᠨ ᠭᠠᠵᠠᠷ ᠯᠠ ᠪᠠᠶᠢᠪᠠᠯ ᠬᠦᠷᠴᠢᠭᠡᠨ᠎ᠠ᠃ ᠡᠳᠡᠭᠡᠷ ᠵᠢᠯ ᠤᠳ ᠲᠤ ᠭᠡᠭᠡᠷ᠎ᠡ  ᠶᠢᠨ ᠰᠢᠨᠵᠢᠯᠡᠯ ᠬᠢᠵᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠠᠶᠢᠯ ᠤᠳ ᠢᠶᠠᠷ ᠲᠤᠰᠤᠳᠠᠭᠰᠠᠨ ᠠᠷᠠᠰᠤᠨ ᠲᠡᠪᠡᠯ ᠰᠢᠭ ᠭᠬᠢᠷᠢ ᠪᠤᠷᠳᠠᠭ ᠲᠠᠢ ᠤᠷᠤ ᠬᠦᠨᠵᠢᠯᠡᠨ ᠳᠤ ᠤᠨᠳᠠᠵᠤ ᠭᠡᠪᠳᠡᠵᠤ ᠶᠠᠪᠤᠬᠤ ᠳᠠᠭᠠᠨ ᠶᠡᠷᠦ ᠵᠢᠭᠰᠢᠭᠡ ᠦᠭᠡᠢ᠃ ᠭᠡᠬᠦ ᠳᠤ᠂ ᠡᠨᠡ ᠪᠤᠯ ᠵᠤᠴᠢᠳ ᠤᠨ ᠪᠠᠭᠤᠳᠠᠯ᠃ ᠮᠢᠨᠤ ᠬᠦᠨᠳᠦᠯᠡᠨ ᠬᠠᠶᠢᠷᠠᠯᠠᠳᠠᠭ ᠲᠡᠳᠡᠭᠡᠷ ᠠᠪᠤ ᠡᠵᠢ ᠶᠢᠨ ᠬᠠᠯᠠᠭᠤᠨ ᠡᠪᠦᠷ  ᠲᠠᠢ ᠬᠠᠨᠵᠤ ᠪᠢᠰᠢ ᠳ᠋ᠠ᠃ ᠭᠡᠪᠡᠴᠦ ︽ᠡᠨᠡ ᠴᠦ ᠭᠠᠷᠪᠤ ᠪᠠᠶᠢᠭᠰᠠᠨ ᠳᠠᠭᠠᠨ᠂ ᠪᠢ ᠡᠨᠡ ᠬᠢᠷᠢ ᠪᠠᠭᠤᠳᠠᠯ ᠳᠤ ᠰᠠᠭᠤᠵᠤ ᠪᠠᠶᠢᠨ᠎ᠠ ᠰᠢᠦ ᠁︾ ᠭᠡᠵᠤ ᠪᠤᠳᠤᠬᠤᠯᠠᠷ᠂ ᠦᠪᠡᠷ ᠢ ᠪᠠᠨ ᠪᠠᠳᠠᠷᠠᠬᠤ ᠰᠤᠮᠤᠨ ᠤ ᠬᠠᠮᠤᠭ ᠭᠤᠶᠤ ᠪᠠᠭᠤᠳᠠᠯ ᠳᠤ ᠬᠤᠨᠤᠵᠤ ᠪᠤᠢ ᠪᠠᠨ ᠮᠡᠳᠡᠷᠡᠨ᠂ ᠬᠤᠪᠴᠠᠰᠤ ᠬᠤᠨᠠᠷ ᠢᠶᠠᠨ ᠲᠠᠶᠢᠯᠵᠤ ᠤᠨᠳᠠᠬᠤ ᠪᠠᠷ ᠰᠢᠢᠳᠪᠡ᠃           2013 ᠤᠨ ᠤ 11 ᠳ᠋ᠤᠭᠡᠷ ᠰᠠᠷ᠎ᠠ ᠶᠢᠨ 17 ᠤ ᠡᠳᠦᠷ᠃          ᠲᠠᠪᠤᠨ ᠦᠷᠠᠯ ᠵᠢᠦ ᠰᠢᠨ ᠸᠠᠨ ᠢ ᠤᠤᠭᠤᠵᠤ ᠤᠨᠳᠠᠭᠰᠠᠨ ᠠᠴᠠ ᠪᠢᠵᠠ᠂ ᠦᠴᠦᠭᠡᠳᠦᠷ ᠰᠦᠨᠢ ᠰᠠᠶᠢᠬᠠᠨ ᠤᠨᠳᠠᠭᠰᠠᠨ ᠪᠦᠭᠡᠳ ᠦᠷᠯᠦᠭᠡ ᠰᠡᠷᠡᠬᠦ ᠳᠤ ᠵᠢᠷᠦᠭᠡ ᠶᠠᠮᠠᠷ ᠴᠦ ᠭᠡᠮ ᠦᠭᠡᠢ ᠰᠠᠷᠠᠭᠤᠯᠬᠠᠨ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠪᠠ᠃ ᠪᠡᠶ᠎ᠡ ᠰᠠᠶᠢᠨ ᠪᠤᠯᠤᠭᠰᠠᠨ ᠳᠠᠭᠠᠨ ᠪᠢ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ᠂ ᠡᠮᠦᠨ᠎ᠠ ᠰᠦᠨᠢ ᠶᠢᠨ ᠴᠡᠨᠡᠭᠯᠡᠵᠤ ᠲᠠᠯᠪᠢᠭᠰᠠᠨ ᠮᠠᠰᠢᠨ ᠨᠤᠭᠤᠳ ᠤᠨ ᠢᠶᠠᠨ ᠴᠡᠨᠡᠭᠯᠡᠯ ᠢ ᠰᠠᠪᠡᠯᠡᠵᠤ ᠠᠪᠤᠭᠠᠳ ᠰᠠᠶᠢᠬᠠᠨ ᠬᠤᠪᠴᠠᠯᠠᠭᠠᠳ ᠪᠠᠶᠢᠳᠠᠯ᠎ᠠ᠂ ᠭᠠᠷᠪᠤ ᠢᠱᠢ ᠠᠱᠢ ᠭᠡᠵᠤ ᠴᠢᠷᠠᠢ ᠨᠢ ᠤᠯᠠᠶᠢᠴᠢᠬᠠᠭᠰᠠᠨ᠂ ᠭᠤᠳᠤᠯ ᠳᠠᠭᠠᠨ ᠴᠠᠰᠤ ᠨᠠᠭᠠᠯᠳᠤᠭᠤᠯᠤᠨ ᠤᠷᠤᠵᠤ ᠢᠷᠡᠪᠡ᠃         ᠪᠤᠭᠴᠤᠰ ᠢᠶᠠᠨ ᠠᠪᠴᠦ ᠭᠠᠳᠠᠨ᠎ᠠ ᠭᠠᠷᠪᠠᠯ᠂ ᠦᠨᠡᠭᠡᠷ ᠴᠠᠰᠤ ᠤᠨᠠᠭᠰᠠᠨ ᠶᠤᠮ ᠪᠠᠶᠢᠪᠠ᠃ ᠦᠴᠦᠭᠡᠳᠦᠷ ︽ᠮᠠᠷᠭᠠᠰᠢ ᠴᠠᠰᠤ ᠤᠨᠠᠨ᠎ᠠ︾ ᠭᠡᠵᠤ ᠪᠠᠳᠤᠯᠭ᠎ᠠ ᠰᠢᠭ᠋ ᠬᠡᠯᠡᠭᠰᠡᠨ ᠭᠠᠷᠪᠤ ᠶᠢᠨ ᠦᠭᠡ ᠶᠢ ᠰᠠᠨᠠᠭᠠᠨ ᠳᠤ ᠤᠷᠤᠵᠤ᠂ ᠡᠨᠡ ᠬᠦᠮᠦᠨ ᠴᠦ ᠴᠠᠭ ᠠᠭᠤᠷ ᠤᠨ ᠤᠷᠢᠳᠴᠢᠯᠠᠭᠰᠠᠨ ᠮᠡᠳᠡᠭᠡᠯᠡᠯ ᠤᠨ ᠦᠷᠳᠡᠭᠡ ᠪᠠᠶᠢᠨ᠎ᠠ ᠭᠡᠵᠤ ᠪᠤᠳᠤᠪᠠ᠃ ᠲᠡᠷᠠ ᠦᠨᠡᠭᠡᠷ ᠲᠡᠭᠷᠢ ᠭᠠᠵᠠᠷ ᠤᠨ ᠢᠶᠠᠨ ᠵᠠᠩ ᠠᠭᠠᠯᠢ ᠪᠤᠶᠤ ᠨᠤᠳᠤᠭ ᠤᠰᠤᠨ ᠤ ᠪᠠᠨ ᠠᠨᠢᠷ ᠲᠤᠬᠢᠶ᠎ᠠ ᠶᠢ ᠰᠤᠳᠠᠯ ᠢ ᠨᠢ ᠪᠠᠷᠢᠵᠤ ᠪᠠᠶᠢᠬᠤ ᠰᠢᠭ᠋ ᠮᠡᠳᠡᠳᠡᠭ ᠶᠤᠮ ᠪᠠᠶᠢᠪᠠ᠃         2013 ᠤᠨ ᠤ ᠠᠩᠬᠠᠨ ᠤ ᠴᠠᠰᠤ ᠶᠢ ᠪᠢ ᠢᠩᠬᠢᠵᠤ ᠪᠠᠳᠠᠷᠠᠬᠤ ᠳᠤ ᠲᠤᠰᠤᠭᠰᠠᠨ ᠪᠦᠭᠡᠳ ᠲᠡᠬᠦᠨ ᠢ ᠪᠢ ᠲᠡᠭᠷᠢ ᠶᠢᠨ ᠴᠠᠭᠠᠨ ᠭᠡᠰᠢᠭ ᠭᠡᠵᠤ ᠰᠠᠨᠠᠯ᠎ᠠ᠃ ᠦᠴᠦᠭᠡᠳᠦᠷ ᠤᠨ ᠨᠢᠰᠭᠡᠯ ᠲᠡᠭᠡᠷ᠎ᠡ ᠬᠠᠷᠠᠭᠰᠠᠨ ᠵᠤᠵᠠᠭᠠᠨ ᠴᠠᠭᠠᠨ ᠡᠬᠦᠯᠠ ᠨᠠᠮᠠᠢᠢ ᠲᠠᠭᠠᠵᠤ ᠢᠷᠡᠭᠡᠳ ᠠᠳᠡ ᠤᠨᠠᠴᠢᠬᠠᠭᠰᠠᠨ ᠴᠦ ᠶᠤᠮ ᠤᠤ ᠭᠡᠵᠤ ᠰᠠᠨᠠᠭᠳᠠᠭᠤᠯᠤᠮ᠎ᠠ᠃ ᠲᠤᠭᠤᠶᠢᠯᠠᠭᠠᠳ ᠲᠤᠭᠤᠷᠢᠭᠠᠳ ᠰᠤᠮᠤᠨ ᠤ ᠭᠡᠳᠦᠨ ᠭᠡᠷ ᠪᠠᠶᠢᠰᠢᠩ ᠠᠴᠠ ᠭᠠᠷᠪᠠᠯ ᠠᠯᠤᠰ ᠲᠤ ᠴᠠᠰᠤᠳᠤ ᠠᠭᠤᠯᠠ ᠵᠠᠯᠭᠠᠯᠳᠤᠨ᠂ ᠠᠭᠤᠯᠠᠰ ᠤᠨ ᠴᠠᠭᠠᠭᠤᠷ ᠴᠠᠭᠠᠨ ᠲᠡᠭᠷᠢ ᠰᠦᠩᠨᠡᠶᠢᠵᠤ᠂ ᠲᠦᠷᠪᠠᠨ ᠵᠦᠭ ᠨᠢᠭᠡ ᠯᠠ ᠦᠩᠭᠡ ᠲᠠᠢ ᠪᠠᠶᠢᠭᠰᠠᠨ ᠠᠴᠠ᠂ ᠮᠢᠨᠤ ᠲᠡᠷᠢᠬᠢᠨ ᠳᠤ ᠶᠠᠮᠠᠷᠴᠦ ᠵᠦᠭ ᠴᠢᠭ ᠭᠡᠰᠡᠨ ᠶᠠᠭᠤᠮ᠎ᠠ ᠦᠭᠡᠢ ᠪᠤᠯᠪᠠ᠃ ᠬᠠᠷᠠᠩᠭᠤᠢ ᠰᠦᠨᠢ ᠢᠷᠡᠵᠤ ᠴᠠᠭᠠᠨ ᠦᠷᠯᠦᠭᠡ ᠪᠠᠷ ᠬᠠᠷᠠᠭᠰᠠᠨ ᠡᠨᠡᠬᠦ ᠪᠠᠳᠠᠷᠠᠬᠤ ᠪᠠᠯᠭᠠᠰᠦ᠂ ᠶᠢᠷᠳᠢᠨᠴᠦ ᠶᠢᠨ ᠬᠤᠶᠠᠷ ᠲᠦᠢᠯ ᠤᠨ ᠲᠤᠮᠳᠠ ᠵᠡᠷᠭᠡᠯᠡᠭᠡᠨᠳᠦᠭᠰᠡᠨ ᠭᠠᠨᠳᠠᠷᠢᠰᠦᠨ ᠪᠠᠯᠭᠠᠰᠤ ᠯᠠ ᠪᠠᠶᠢᠨ᠎ᠠ᠃ ᠨᠠᠮ᠎ᠠ ᠢᠷᠡᠬᠦ ᠪᠠᠷ ᠨᠢ ᠵᠤᠷᠢᠭᠤᠳᠠ ᠦᠪᠡᠷ ᠢ ᠪᠠᠨ ᠴᠠᠭᠠᠨ  ᠴᠠᠰᠤᠨ ᠤ ᠴᠠᠭᠠᠳᠠᠢ ᠲᠠᠯᠳᠠᠯᠠᠭᠰᠠᠨ ᠶᠤᠮ ᠰᠢᠭ᠋ ᠨᠢᠭᠤᠴᠠᠭᠠᠢ᠃ ᠶᠠᠳᠠᠬᠤ ᠳᠤ ᠵᠦᠭ ᠴᠢᠭ ᠴᠦ ᠢᠯᠭᠠᠭᠳᠠᠬᠤ ᠦᠭᠡᠢ᠃ ᠵᠦᠭ ᠴᠢᠭ ᠦᠭᠡᠢ ᠴᠦ ᠴᠠᠰᠤᠳᠤ ᠴᠠᠭᠠᠨ ᠤᠷᠴᠢᠯᠠᠩ ᠰᠠᠶᠢᠬᠠᠨ ᠯᠠ ᠪᠠᠶᠢᠨ᠎ᠠ᠂ ᠬᠦᠯ ᠢ ᠮᠢᠨᠢ ᠬᠢᠷ ᠬᠢᠷ ᠭᠡᠳᠡᠭᠡᠯᠡᠭᠡᠳ ᠬᠠᠮᠤᠭ ᠪᠡᠶ᠎ᠡ ᠳᠤ ᠬᠠᠶᠢᠷ᠎ᠠ ᠬᠦᠶᠦᠯᠳᠦᠬᠦᠯᠦᠨ᠎ᠠ᠃ ᠦᠴᠦᠭᠡᠳᠦᠷ ᠦᠷᠯᠦᠭᠡ ᠭᠠᠷᠬᠤ ᠳᠠᠭᠠᠨ ᠦᠨᠦᠰᠴᠦ ᠦᠨᠦᠰᠦᠭᠡᠳ ᠶᠠᠪᠤᠭᠰᠠᠨ ᠡᠷᠴᠢ ᠬᠦᠦ ᠶᠢᠨ ᠮᠢᠨᠢ ᠰᠡᠳᠬᠢᠯ ᠰᠢᠭ ᠴᠡᠪᠡᠷ ᠴᠠᠭᠠᠨ ᠪᠠᠶᠢᠭᠠᠯᠢ᠂ ᠦᠪᠡᠷ ᠤᠨ ᠮᠢᠨᠢ ᠲᠤᠳᠤᠭᠤᠷ ᠵᠦᠭᠡᠯᠡᠭᠡᠨ ᠠᠭᠤᠰᠤᠨ᠎ᠠ᠃                    ᠬᠤᠶᠠᠷ᠂ ᠮᠦᠰᠦᠨ ᠰᠢᠬᠢᠷ ᠡᠵᠢ ᠶᠢᠨ ᠦᠯᠢᠭᠡᠷ          ᠭᠠᠷᠪᠤ᠂ ᠪᠢᠳᠠ ᠬᠤᠶᠠᠭᠤᠯᠠ ᠡᠷᠳᠡᠨᠢ ᠰᠢᠰᠢ ᠶᠢᠨ ᠰᠢᠩᠬᠢᠨ ᠪᠤᠳᠠᠭ᠎ᠠ᠂ ᠭᠠᠭ᠋ᠠᠢ ᠶᠢᠨ ᠮᠢᠬ᠎ᠠ ᠶᠢᠨ ᠪᠤᠤᠵᠠ ᠢᠳᠡᠭᠡᠳ᠂ ᠮᠢᠨᠤ ᠡᠨᠡ ᠤᠳᠠᠭ᠎ᠠ ᠶᠢᠨ ᠵᠤᠷᠢᠵᠤ ᠢᠷᠡᠭᠰᠡᠨ ᠭᠤᠤᠯᠴᠢᠯᠠᠨ ᠰᠤᠷᠪᠤᠯᠵᠢᠯᠠᠬᠤ ᠬᠦᠮᠦᠨ ᠲᠠᠢ ᠪᠠᠨ ᠵᠤᠯᠭᠠᠬᠤ ᠪᠠᠷ ᠬᠦᠳᠡᠯᠪᠡ᠃ ᠭᠠᠷᠪᠤ᠂ ᠡᠨᠡ ᠡᠵᠢ ᠶᠢᠨ ᠲᠤᠬᠠᠢ ᠤᠳᠠᠰᠤ ᠪᠠᠷ ᠭᠡᠳᠦ ᠤᠳᠠᠭ᠎ᠠ ᠬᠡᠯᠡᠭᠰᠡᠨ ᠠᠴᠠ ᠪᠢ ᠰᠡᠳᠬᠢᠯ ᠬᠦᠳᠡᠯᠦᠭᠰᠡᠨ ᠶᠤᠮ᠃         ᠲᠡᠷᠡ ᠡᠵᠢ᠂ ᠰᠤᠮᠤᠨ ᠤ ᠲᠤᠭᠤᠷᠢᠭ ᠲᠤ ᠠᠮᠢᠳᠤᠷᠠᠳᠠᠭ ᠠᠴᠠ ᠶᠡᠭᠡ ᠴᠦ ᠲᠦᠬᠦᠮ ᠪᠤᠯᠤᠯ᠎ᠠ᠃ ᠪᠠᠳᠠᠷᠠᠬᠤ ᠰᠤᠮᠤ ᠨᠢ ᠤᠤᠯ  ᠳᠠᠭᠠᠨ ᠪᠠᠳᠠᠷᠠᠬᠤ ᠠᠶᠢᠯ ᠪᠠᠶᠢᠵᠤ᠂ ᠲᠡᠷᠡ ᠨᠠᠰᠤᠳᠠᠨ ᠡᠨᠡ ᠪᠠᠳᠠᠷᠠᠬᠤ ᠠᠶᠢᠯ ᠳᠤ ᠠᠷᠪᠠᠨ ᠲᠠᠪᠤ ᠲᠠᠢ ᠠᠴᠠ ᠪᠠᠨ ᠨᠡᠬᠦᠵᠤ ᠢᠷᠡᠭᠡᠳ ᠬᠦᠳᠡᠯᠦᠭᠰᠡᠨ ᠦᠭᠡᠢ ᠭᠡᠨ᠎ᠠ᠃          ᠨᠠᠪᠳᠠᠭᠠᠷ ᠵᠢᠭᠠᠬᠠᠨ ᠰᠢᠪᠠᠷ ᠭᠡᠷ ᠤᠨ ᠡᠬᠦᠳᠡ ᠬᠦᠷᠦᠭᠡᠳ ᠭᠠᠷᠪᠤ ︽ᠬᠦᠷᠴᠢᠭᠡᠭᠰᠡᠨ︕︾ ᠭᠡᠪᠡ᠃ ᠠᠶᠢᠯ ᠭᠡᠷ ᠤᠨ ᠪᠠᠷ᠎ᠠ ᠴᠦ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠠᠶᠢᠳᠠᠯ᠎ᠠ᠂ ᠶᠠᠭᠤ ᠶᠢ ᠨᠢ ᠬᠦᠷᠴᠢᠭᠡᠭᠰᠡᠨ ᠭᠡᠳ ᠪᠠᠶᠢᠭ᠎ᠠ ᠶᠤᠮ ᠭᠡᠵᠤ ᠭᠠᠶᠢᠬᠠᠭᠰᠠᠨ ᠴᠦ᠂ ᠲᠡᠷᠭᠡ ᠵᠤᠭᠰᠤᠭᠰᠠᠨ ᠪᠦᠭᠡᠳ ᠭᠠᠷᠪᠤ ᠪᠠᠭᠤᠭᠰᠠᠨ ᠶᠤᠮ ᠤᠴᠢᠷ᠂ ᠪᠢ ᠴᠦ ᠮᠠᠰᠢᠨ ᠢᠶᠠᠨ ᠠᠪᠤᠭᠠᠳ ᠲᠠᠭᠠᠵᠤ ᠪᠠᠭᠤᠪᠠ᠃ ᠬᠠᠳᠠ ᠴᠢᠯᠠᠭᠤ ᠪᠠᠷ ᠪᠤᠭᠤᠨᠢᠬᠠᠨ ᠬᠠᠰᠢᠭᠰᠠᠨ ᠬᠦᠷᠢᠶᠡᠨ ᠳᠡᠭᠡᠨ ᠭᠡᠳᠦᠨ ᠲᠤᠮᠤ ᠤᠪᠤᠭ᠎ᠠ ᠶᠢ ᠰᠤᠯᠢᠶᠤᠤ ᠪᠠᠷ ᠪᠦᠳᠡᠭᠡᠭᠰᠡᠨ ᠪᠦᠭᠡᠳ ᠲᠡᠷᠡ ᠪᠦᠳᠡᠭᠡᠯᠭᠡ ᠲᠡᠭᠡᠷᠡᠬᠢ ᠴᠠᠰᠤ ᠶᠢ ᠨᠢ ᠲᠦᠩᠬᠢᠵᠢᠭᠡᠨ ᠱᠦᠬᠦᠷᠳᠦᠭᠰᠡᠨ ᠠᠴᠠ᠂ ᠬᠤᠷᠮᠤᠢ ᠲᠤᠤᠭᠤᠷ ᠨᠢ ᠠᠷᠭᠠᠯ ᠬᠤᠷᠭᠤᠯ ᠪᠤᠯᠳᠠᠯᠵᠠᠨ᠎ᠠ᠃ ᠮᠠᠯ ᠤᠨ ᠬᠦᠷᠢᠶ᠎ᠠ ᠬᠠᠰᠢᠶᠠᠨ ᠤ ᠡᠬᠦᠳᠡ ᠭᠡᠮᠡᠷ ᠵᠢᠭᠠᠬᠠᠨ ᠮᠠᠶᠢᠵᠢᠬᠢ ᠡᠬᠦᠳᠡ ᠶᠢ ᠭᠠᠷᠪᠤ ᠲᠠᠳᠠᠵᠤ ᠨᠡᠭᠡᠭᠡᠳ ᠨᠠᠮᠠᠢᠢ ︽ᠤᠷᠤ︕︾ ᠭᠡᠵᠤ ᠤᠷᠢᠪᠠ᠃ ᠪᠢ ᠰᠠᠶᠢᠳᠤᠷ ᠪᠦᠬᠦᠶᠢᠵᠤ ᠪᠠᠰᠠ ᠬᠢᠴᠢᠶᠡᠰᠬᠢᠵᠤ ᠤᠷᠤᠪᠠ᠃ ᠡᠬᠦᠳᠡ ᠨᠢ ᠲᠠᠩᠴᠤ ᠪᠤᠭᠤᠨᠢ ᠰᠢᠬᠠᠭᠤ ᠪᠦᠭᠡᠳ ᠪᠠᠰᠠ ᠲᠠᠮᠤᠷ ᠬᠠᠪᠳᠠᠰᠤ᠂ ᠬᠠᠳᠠᠭᠠᠰᠤ ᠵᠡᠷᠭᠡ ᠶᠠᠭᠤᠮᠠᠰ ᠠᠳᠡ ᠲᠡᠨᠳᠡ ᠠᠴᠠ ᠰᠡᠷᠡᠶᠢᠵᠤ ᠪᠠᠶᠢᠭᠰᠠᠨ ᠠᠴᠠ᠂ ᠬᠤᠪᠴᠠᠰᠤ ᠪᠠᠨ ᠤᠷᠠᠭᠤᠯᠴᠢᠬᠠᠬᠤ  ᠠᠴᠠ ᠰᠡᠷᠡᠮᠵᠢᠯᠡᠭᠰᠡᠨ ᠮᠢᠨᠢ ᠲᠠᠷᠠ᠃             ᠰᠢᠬᠠᠭᠤ ᠵᠢᠭᠠᠬᠠᠨ ᠦᠷᠦᠭᠡᠨ ᠠᠴᠠ ᠮᠥᠨ ᠯᠠ ᠭᠠᠷᠪᠤ ᠶᠢᠨ ᠲᠡᠷᠭᠡᠨ ᠲᠤᠳᠤᠷ᠎ᠠ ᠠᠴᠠ ᠭᠠᠷᠳᠠᠭ ᠦᠨᠦᠷ ᠰᠡᠩᠬᠢᠰᠭᠡᠪᠡ᠃ ᠪᠢ ᠲᠡᠬᠦᠨ ᠢ ᠪᠠᠳᠠᠷᠠᠬᠤ ᠶᠢᠨ ᠦᠨᠦᠷ ᠶᠤᠮ ᠪᠠᠶᠢᠨ᠎ᠠ ᠭᠡᠵᠤ ᠮᠡᠳᠡᠯ᠎ᠠ᠃ ᠦᠨᠳᠦᠷᠭᠡᠨ ᠪᠡᠶ᠎ᠡ ᠲᠠᠢ ᠤᠯᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠨᠠᠰᠤᠵᠢᠮᠠᠭ ᠪᠦᠰᠡᠬᠦᠢ ᠪᠢᠳᠠᠨ ᠢ ᠬᠠᠷᠠᠭᠠᠳ ᠢᠨᠢᠶᠡᠨ ᠮᠡᠨᠳᠦᠴᠢᠯᠡᠪᠡ᠃ ᠡᠨᠡ ᠪᠤᠯ ᠮᠢᠨᠤ ᠪᠠᠳᠠᠷᠠᠬᠤ ᠳᠤ ᠤᠷᠤᠭᠰᠠᠨ ᠬᠠᠮᠤᠭ ᠠᠩᠬᠠᠨ ᠤ ᠠᠶᠢᠯ ᠪᠤᠯᠬᠤ ᠶᠤᠮ᠃ ᠪᠢ ᠤᠷᠳᠤᠰ ᠶᠤᠰᠤ ᠪᠠᠷ ᠠᠮᠤᠷ ᠮᠡᠨᠳᠦ ᠠᠰᠠᠭᠤᠵᠤ ᠭᠠᠷᠪᠠᠯ ᠭᠠᠷᠪᠤ ︽ᠡᠨᠡ ᠪᠤᠯ ᠪᠢᠳᠠᠨ ᠤ ᠰᠤᠷᠪᠤᠯᠵᠢᠯᠠᠬᠤ ᠭᠡᠵᠤ ᠪᠠᠶᠢᠭ᠎ᠠ ᠨᠠᠰᠤᠳᠠᠨ ᠡᠵᠢ ᠶᠢᠨ ᠦᠬᠢᠨ ᠨᠢ᠂ ᠲᠠᠷᠠ ᠡᠵᠢ ᠬᠦᠴᠤᠨ ᠬᠦᠷᠭᠡᠨ ᠠᠪᠤᠭᠰᠠᠨ  ᠠᠴᠠ᠂ ᠬᠡᠦᠭᠡᠨ ᠬᠦᠷᠭᠡᠨ ᠲᠠᠢ ᠪᠠᠨ ᠬᠠᠮᠳᠤ ᠠᠮᠢᠳᠤᠷᠠᠵᠤ ᠪᠠᠶᠢᠭ᠎ᠠ ᠶᠤᠮ ᠁︾ ᠭᠡᠵᠤ ᠲᠠᠨᠢᠯᠴᠠᠭᠤᠯᠪᠠ᠃ ᠵᠢᠵᠢᠭᠭᠡᠨ ᠭᠡᠷ ᠢ ᠲᠤᠮᠳᠠᠭᠤᠷ ᠨᠢ ᠭᠡᠷᠡᠮ ᠪᠤᠰᠬᠠᠨ ᠬᠤᠶᠠᠷ ᠦᠷᠦᠭᠡ ᠪᠤᠯᠭᠠᠨ ᠠᠩᠬᠢᠯᠠᠭᠰᠠᠨ ᠪᠦᠭᠡᠳ ᠲᠡᠷᠡ ᠭᠡᠷᠡᠮ  ᠨᠢ ᠬᠦᠨᠳᠡᠢ ᠲᠠᠢ ᠪᠠᠶᠢᠵᠤ᠂ ᠲᠤᠳᠤᠷ᠎ᠠ ᠨᠢ ᠭᠠᠯ ᠲᠦᠯᠡᠳᠡᠭ ᠶᠤᠮ ᠪᠠᠶᠢᠪᠠ᠃ ᠲᠡᠭᠡᠭᠰᠡᠨ ᠠᠴᠠ ᠡᠨᠡ ᠭᠡᠷᠡᠮ ᠨᠢ ᠬᠤᠶᠠᠷ ᠦᠶ᠎ᠡ ᠤᠨ ᠬᠦᠮᠦᠨ ᠤ ᠨᠢᠭᠤᠵᠤ ᠬᠠᠭᠠᠬᠤ ᠴᠢᠬᠤᠯᠠᠳᠠᠢ ᠦᠢᠯᠠ ᠶᠢ ᠨᠢ ᠨᠢᠭᠤᠵᠤ ᠬᠠᠭᠠᠳᠠᠭ ᠦᠢᠯᠡᠳᠦᠯ  ᠲᠠᠢ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠬᠤᠶᠠᠷ ᠦᠷᠦᠭᠡ ᠶᠢ ᠪᠦᠷ ᠲᠤᠯᠠᠭᠠᠯᠠᠴᠢᠬᠠᠳᠠᠭ ᠶᠤᠮ ᠪᠠᠶᠢᠪᠠ᠃ ᠭᠡᠷᠡᠮ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠦᠷᠦᠭᠡᠨ ᠳᠤᠨᠢ ᠬᠡᠦᠭᠡᠨ ᠬᠦᠷᠭᠡᠨ ᠨᠢ ᠰᠠᠭᠤᠵᠤ᠂ ᠵᠡᠬᠦᠨ ᠲᠠᠯ᠎ᠠ ᠶᠢᠨ ᠵᠢᠵᠢᠭ ᠦᠷᠦᠭᠡᠨ ᠳᠤᠨᠢ ᠨᠠᠰᠤᠳᠠᠨ ᠬᠤᠨᠤᠳᠠᠭ ᠶᠤᠮ ᠪᠠᠶᠢᠪᠠ᠃ ᠪᠢᠳᠠᠨ ᠢ ᠤᠷᠤᠬᠤ ᠳᠤ ᠨᠠᠰᠤᠳᠠᠨ ᠦᠪᠡᠷ ᠤᠨ ᠭᠠᠭᠴᠠ ᠬᠦᠮᠦᠨ ᠤ ᠤᠷᠤᠨ ᠲᠡᠭᠡᠷ᠎ᠡ ᠪᠠᠨ ᠵᠠᠪᠢᠯᠠᠵᠤ ᠰᠠᠭᠤᠭᠠᠳ ︽ᠮᠠᠨᠢ ᠶᠢᠨ ᠵᠢᠷᠭᠤᠭᠠᠨ ᠦᠰᠦᠭ︾ ᠤᠨ ᠠᠶᠠᠰ ᠢ ᠲᠠᠯᠪᠢᠵᠤ᠂ ᠨᠤᠮ ᠤᠩᠰᠢᠨ ᠮᠦᠷᠬᠦᠯ ᠬᠢᠵᠤ ᠪᠠᠶᠢᠪᠠ᠃         ᠲᠤᠩ ᠴᠠᠭᠠᠨ ᠲᠤᠯᠤᠭᠠᠢ ᠲᠠᠢ ᠲᠡᠷᠠ ᠡᠵᠢ ᠶᠢᠨ᠂ ᠤᠷᠤᠨ ᠤ ᠪᠠᠨ ᠲᠤᠯᠤᠭᠠᠢ ᠲᠡᠭᠡᠷᠡᠬᠢ ᠭᠡᠷᠡᠮ ᠲᠡᠭᠡᠷ᠎ᠡ ᠵᠢᠭᠰᠠᠭᠠᠭᠰᠠᠨ ᠪᠤᠷᠬᠠᠳ ᠦᠭᠡᠳᠡ ᠪᠠᠨ ᠬᠠᠨᠳᠤᠵᠤ ᠨᠠᠮᠠᠨᠴᠢᠯᠡᠬᠤ ᠲᠦᠷᠢ ᠶᠢ ᠬᠠᠷᠠᠬᠤ ᠳᠤ᠂ ᠲᠡᠷᠡ ᠦᠪᠡᠷ ᠢᠶᠠᠨ ᠴᠤᠬᠤᠮ ᠴᠦ ᠨᠢᠭᠡ ᠠᠮᠢᠳᠤ ᠪᠤᠷᠬᠠᠨ ᠪᠠᠶᠢᠨ᠎ᠠ ᠡ ᠭᠡᠵᠤ ᠰᠠᠨᠠᠭᠳᠠᠭᠤᠯᠤᠨ᠎ᠠ᠃ ᠪᠢ᠂ ᠲᠡᠬᠦᠨ ᠳᠤ ᠰᠡᠷᠡᠭᠳᠡᠴᠢᠭᠡᠬᠦ ᠠᠴᠠ ᠰᠡᠷᠡᠮᠵᠢᠯᠡᠵᠤ᠂ ᠰᠡᠪ ᠰᠡᠮᠭᠡᠨ ᠤᠷᠤᠵᠤ ᠵᠢᠷᠤᠭᠯᠠᠪᠠ᠃           ᠨᠠᠮᠤᠭᠤᠬᠠᠨ ᠠᠶᠠᠰ ᠤᠨ ᠲᠤᠮᠳᠠᠭᠤᠷ ᠨᠤᠮ ᠤᠩᠰᠢᠨ ᠲᠠᠭᠠᠳᠬᠠᠯ ᠬᠢᠵᠤ ᠪᠠᠶᠢᠭ᠎ᠠ ᠲᠡᠷᠡ ᠨᠠᠰᠤᠳᠠᠨ ᠤ ᠬᠠᠵᠠᠭᠤ ᠪᠠᠷ ᠭᠡᠳᠦ ᠭᠡᠳᠦᠨ ᠨᠤᠬᠠᠢ᠂ ᠮᠤᠤᠷ ᠤᠳ ᠲᠠᠭᠠᠳᠠᠢ ᠭᠡᠪᠳᠡᠳᠡᠭ ᠨᠢ ᠭᠡᠪᠳᠡᠵᠤ᠂ ᠰᠤᠨᠢᠶᠠᠳᠠᠭ ᠨᠢ ᠰᠤᠨᠢᠶᠠᠨ᠎ᠠ᠃ ᠪᠠᠰᠠ ᠨᠢᠭᠡ ᠡᠭᠡ ᠮᠤᠤᠷ ᠲᠡᠷᠠ ᠡᠵᠢ ᠶᠢᠨ ᠬᠦᠯᠦᠰᠤ ᠲᠠᠭᠠᠭᠠᠪᠤᠷᠢᠯᠠᠭᠰᠠᠨ ᠲᠠᠷᠠᠨ ᠤ ᠬᠠᠵᠠᠭᠤ ᠳᠤ ᠬᠤᠶᠠᠷ ᠵᠤᠯᠵᠠᠭ᠎ᠠ ᠪᠠᠨ ᠲᠠᠰᠤᠷᠠᠯ ᠦᠭᠡᠢ ᠲᠤᠯᠢᠶᠠᠯᠠᠨ ᠬᠠᠶᠢᠷᠠᠯᠠᠵᠤ ᠬᠦᠬᠦᠬᠦᠯᠦᠨ᠎ᠠ᠃ ᠬᠦᠮᠦᠨ ᠠᠮᠢᠳᠠᠨ ᠪᠦᠬᠦᠨ ᠤ ᠬᠠᠮᠤᠭ ᠤᠨ ᠡᠮᠵᠢᠭ ᠮᠡᠳᠡᠷᠡᠮᠵᠢ ᠲᠠᠢ ᠡᠷᠭᠡᠳᠡᠨ ᠪᠤᠯᠬᠤ ᠭᠡᠯᠠᠨ ᠳᠤ ᠤᠬᠢ ᠬᠠᠶᠢᠷ᠎ᠠ ᠶᠢᠨ ᠰᠦᠨ ᠭᠡᠭᠡ ᠲᠤᠶᠠᠭᠠᠷᠠᠵᠤ ᠪᠠᠶᠢᠳᠠᠭ ᠢ ᠪᠢ ᠡᠨᠡ ᠮᠤᠤᠷ ᠢ ᠬᠠᠷᠠᠭᠠᠳ ᠤᠬᠠᠪᠠ᠃ ᠠᠶ᠎ᠠ ᠲᠠᠭᠤᠤ ᠳᠤ᠂ ᠲᠡᠷᠡ ᠮᠦᠷᠳᠡᠯ᠎ᠠ ᠪᠠᠨ ᠪᠤᠷᠬᠠᠨ ᠤ ᠨᠤᠮᠯᠠᠯ ᠤᠨ ᠠᠶ᠎ᠠ ᠲᠠᠭᠤᠤ  ᠳᠤ ᠦᠷ᠎ᠡ ᠪᠠᠨ ᠲᠤᠯᠢᠶᠠᠯᠠᠨ ᠬᠦᠬᠦᠬᠦᠯᠬᠦ ᠲᠡᠷᠡ ᠬᠦᠳᠡᠯᠦᠯ ᠠᠮᠢᠳᠤ ᠬᠤᠷᠸ᠎ᠠ ᠶᠢᠨ ᠬᠠᠮᠤᠭ ᠤᠨ ᠭᠤᠶᠤ ᠦᠵᠡᠮᠤᠷᠢ ᠪᠤᠯᠵᠤ ᠬᠠᠷᠠᠭᠳᠠᠨ᠎ᠠ᠃ ᠡᠮ᠎ᠠ ᠲᠦᠷᠦᠯᠳᠠᠨ ᠪᠦᠬᠦᠨ ᠤ ᠬᠦᠬᠦᠨ ᠤ ᠤᠭ ᠠᠴᠠ ᠰᠦ ᠢᠪᠢᠯᠡᠬᠦᠯᠴᠢᠭᠡᠮᠡᠷ ᠡᠨᠡ ᠵᠢᠭᠠᠬᠠᠨ ᠦᠷᠦᠭᠡᠨ ᠳᠤ ᠪᠢ ᠲᠡᠷᠡ ᠪᠦᠬᠦᠨ ᠢ ᠰᠡᠮᠭᠡᠨ ᠵᠢᠷᠤᠭᠯᠠᠬᠤ ᠳᠤ᠂ ᠵᠢᠷᠦᠭᠡᠨ ᠳᠤ ᠮᠢᠨᠢ ᠶᠠᠮᠠᠷ ᠨᠢᠭᠡᠨ ᠰᠢᠨ᠎ᠠ ᠠᠭᠠᠷ ᠴᠠᠯᠬᠢᠯᠡᠵᠤ᠂ ᠢᠷᠠᠭᠤ ᠡᠭᠡᠰᠢᠭ ᠡᠬᠦᠰᠭᠦ ᠭᠡ ᠰᠢᠭ᠃ ᠲᠡᠷᠡ ᠢᠷᠠᠭᠤ ᠡᠭᠡᠰᠢᠭ ᠨᠠᠮᠠᠢᠢ ᠡᠨᠡ ᠲᠡᠯᠡᠭᠡᠢ ᠶᠢᠨ ᠡᠪᠰᠦᠨ ᠰᠢᠷᠭᠡᠭ ᠨᠢᠭᠡᠪᠦᠷᠢ ᠳᠤ ᠴᠦ ᠰᠡᠳᠬᠢᠯ ᠢᠶᠠᠨ ᠠᠭᠤᠰᠬᠠᠬᠤ ᠶᠢ ᠱᠠᠭᠠᠷᠳᠠᠵᠤ ᠪᠤᠢ ᠮᠡᠳᠡᠭᠳᠡᠨ᠎ᠠ᠃ ᠪᠤᠭᠤᠨᠢᠬᠠᠨ ᠰᠠᠷᠠᠪᠴᠢ ᠲᠠᠢ ᠪᠤᠷᠤᠬᠠᠨ ᠡᠨᠡ ᠵᠢᠭᠠᠬᠠᠨ ᠦᠷᠦᠭᠡ ᠭᠡᠷ ᠬᠠᠷᠢᠨ ᠲᠠᠶᠢᠪᠤᠩ ᠵᠢᠷᠭᠠᠯ ᠤᠨ ᠤᠷᠤᠨ ᠵᠠᠢ ᠪᠠᠶᠢᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠃              ᠪᠢ ᠭᠡᠳᠦᠢ ᠨᠠᠮ ᠵᠦᠭᠡᠯᠡᠨ ᠬᠦᠳᠡᠯᠵᠤ ᠪᠠᠶᠢᠭᠰᠠᠨ ᠴᠦ᠂ ᠲᠡᠷᠡ ᠨᠠᠰᠤᠳᠠᠨ ᠳᠤ ᠮᠡᠳᠡᠭᠳᠡᠴᠢᠭᠡᠪᠡ᠃ ᠠᠯᠠᠭ᠎ᠠ ᠪᠠᠨ ᠬᠠᠪᠰᠤᠷᠤᠨ ᠨᠠᠮᠠᠨᠴᠢᠯᠠᠵᠤ ᠪᠠᠶᠢᠭᠰᠠᠨ ᠲᠡᠷᠡ᠂ ᠨᠢᠳᠤ ᠪᠠᠨ ᠶᠠᠯᠢᠮ ᠦᠭᠡᠶᠢᠭᠡᠨ ᠨᠠᠭᠡᠭᠡᠳ ᠨᠠᠮᠠᠢᠢ ᠨᠢᠭᠡ ᠬᠠᠷᠠᠭᠰᠠᠨ ᠢᠶᠠᠨ ᠦᠷᠬᠦᠯᠵᠢᠯᠡᠨ ᠨᠤᠮ ᠢᠶᠠᠨ ᠤᠩᠰᠢᠵᠤ᠂ ᠮᠦᠷᠬᠦᠯ ᠢᠶᠠᠨ ᠬᠢᠪᠠ᠃         ᠮᠦᠷᠬᠦᠯᠳᠡ ᠲᠠᠭᠤᠰᠴᠦ ᠪᠢᠳᠠᠨ ᠠᠮᠤᠷ ᠮᠠᠨᠳᠤ ᠡᠷᠢᠨ ᠠᠭᠤᠯᠵᠠᠪᠠ᠃         ᠨᠠᠮᠬᠠᠨ ᠬᠠᠳᠠᠩᠬᠢᠷ ᠪᠡᠶ᠎ᠡ ᠲᠠᠢ ᠲᠡᠷᠡ ᠡᠵᠢ ᠶᠢᠨ ᠨᠢᠭᠤᠷ ᠲᠤ ᠤᠯᠠᠭ᠎ᠠ᠂ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠤᠨ ᠭᠡᠭᠡ ᠪᠢᠯᠬᠠᠨ᠂ ᠮᠢᠨᠤ ᠭᠠᠷ ᠢ ᠠᠳᠬᠤᠵᠤ ︽ᠰᠠᠶᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ︖ ᠭᠤᠤᠯ ᠡ︕︾ ᠭᠡᠬᠦ ᠪᠠᠷ ᠰᠠᠶᠢᠬᠠᠨ ᠰᠠᠨᠠᠭᠳᠠᠪᠠ᠃          ᠬᠡᠦᠭᠡᠨ ᠬᠦᠷᠭᠡᠨ ᠤ ᠬᠢᠨ ᠰᠠᠭᠤᠳᠠᠭ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠦᠷᠦᠭᠡ ᠨᠢ ᠠᠷᠠᠢ ᠠᠭᠤᠵᠢᠭᠤ ᠰᠢᠭ᠋ ᠪᠦᠭᠡᠳ ᠬᠠᠨᠵᠤ ᠲᠠᠢ ᠪᠠᠶᠢᠭᠰᠠᠨ ᠠᠴᠠ᠂ ᠪᠢᠳᠠᠨ ᠡᠨᠡ ᠭᠡᠷ ᠲᠤᠨᠢ ᠲᠡᠬᠦᠨ ᠢ ᠰᠤᠷᠪᠤᠯᠵᠢᠯᠠᠪᠠ᠃ ᠬᠤᠸᠠᠷᠳᠠᠢ ᠵᠤᠵᠠᠭᠠᠨ ᠰᠤᠯᠢᠶᠤᠤ ᠲᠠᠪᠢᠰᠦᠭᠰᠡᠨ ᠬᠠᠨᠵᠤᠨ ᠲᠡᠭᠡᠷ᠎ᠡ ᠨᠢ ᠵᠠᠪᠢᠯᠡᠵᠤ ᠰᠠᠭᠤᠭᠠᠳ ᠶᠠᠷᠢᠯᠳᠤᠪᠠᠯ᠂ ᠤᠯᠠᠨ ᠮᠤᠤᠷ ᠤᠳ ᠨᠢ ᠲᠠᠷᠠ ᠡᠵᠢ ᠶᠢ ᠬᠠᠷᠠᠮᠨᠠᠵᠤ ᠪᠠᠶᠢᠨ᠎ᠠ ᠭᠡᠮᠡᠷ ᠮᠢᠨᠤ ᠠᠷᠤ ᠤᠷᠢᠳᠠᠭᠤᠷ ᠬᠤᠮᠤᠷᠠᠯᠳᠤᠨ ᠭᠡᠪᠳᠡᠵᠤ ᠬᠦᠷ ᠬᠠᠷ ᠭᠡᠵᠤ ᠪᠠᠶᠢᠪᠠ᠃          ᠤᠷᠠᠩᠭᠤᠸ᠎ᠠ᠄ ᠡᠵᠢ ᠲᠠᠨ ᠤ ᠤᠪᠤᠭ ᠨᠠᠷ᠎ᠠ︖          ᠨᠠᠰᠤᠳᠠᠨ᠄ ᠤᠪᠤᠭ ᠴᠢᠶᠠᠨ᠂ ᠨᠠᠷ᠎ᠠ ᠪᠢᠩ ᠲᠠᠩ᠂ ᠴᠢᠶᠠᠨ ᠮᠦᠰᠦᠨ ᠰᠢᠬᠢᠷ ᠭᠡᠰᠡᠨ ᠨᠠᠷ᠎ᠠ ᠡ︕           ᠤᠷᠠᠩᠭᠤᠸ᠎ᠠ᠄ ᠬᠦᠶ᠋ᠢ᠂ ᠶᠠᠮᠠᠷ ᠰᠠᠶᠢᠬᠠᠨ ᠠᠮᠳᠠᠳᠠᠢ ᠨᠠᠷ᠎ᠠ ᠶᠤᠮ ᠪᠤᠢ︖ ᠭᠠᠷᠪᠤ ᠠᠬ᠎ᠠ ᠠᠴᠠ ᠰᠤᠨᠤᠰᠬᠤ ᠳᠤ᠂ ᠲᠠᠨ ᠢ ᠤᠯᠠᠨ ᠦᠯᠢᠭᠡᠷ ᠲᠠᠢ ᠶᠠᠪᠤᠭᠰᠠᠨ ᠶᠤᠮ ᠭᠡᠨ᠎ᠠ ᠂ ᠨᠠᠳᠠ ᠶᠠᠷᠢᠬᠤ ᠤᠤ︖           ᠪᠢᠩ ᠲᠠᠩ᠄ ᠪᠤᠯᠤᠨ᠎ᠠ᠂ ᠪᠤᠯᠤᠨ᠎ᠠ᠂ ᠲᠡᠭᠡᠳᠦᠰ ᠤᠨ ᠢᠶᠠᠨ ᠦᠯᠢᠭᠡᠷ ᠢ ᠬᠡᠯᠡᠬᠦ ᠳᠤ ᠰᠤᠨᠤᠰᠤᠭᠰᠠᠨ ᠨᠢ ᠪᠠᠶᠢᠨ᠎ᠠ᠂ ᠡᠪᠦᠭᠡ ᠪᠠ ᠡᠴᠢᠭᠡ ᠶᠢᠨ ᠦᠯᠢᠭᠡᠷ ᠢ ᠬᠡᠯᠡᠬᠦ ᠳᠤ ᠬᠠᠷᠠᠭᠰᠠᠨ ᠨᠢ ᠪᠠᠶᠢᠨ᠎ᠠ ᠂ ᠦᠪᠡᠷ ᠤᠨ ᠢᠶᠠᠨ ᠦᠯᠢᠭᠡᠷ ᠢ ᠬᠡᠯᠡᠬᠦ ᠳᠤ ᠦᠩᠭᠡᠷᠡᠭᠡᠭᠰᠡᠨ ᠨᠢ ᠪᠠᠶᠢᠨ᠎ᠠ᠂ ᠠᠯᠢ ᠶᠢ ᠨᠢ ᠰᠤᠨᠤᠰᠬᠤ ᠶᠤᠮ︖         ᠤᠷᠠᠩᠭᠤᠸ᠎ᠠ᠄ ᠰᠤᠨᠤᠰᠤᠭᠰᠠᠨ᠂ ᠦᠵᠡᠭᠰᠡᠨ᠂ ᠦᠩᠭᠡᠷᠡᠬᠦᠯᠦᠭᠰᠡᠨ ᠢᠶᠠᠨ ᠪᠦᠬᠦᠨ ᠢ ᠬᠠᠷᠠᠮᠨᠠᠬᠤ ᠦᠭᠡᠢ ᠶᠠᠷᠢᠭᠠᠴᠢ ᠳ᠋ᠠ᠂ ᠠᠯᠢ ᠡᠷᠳᠡᠬᠢ ᠶᠢ ᠶᠠᠷᠢᠪᠠᠯ ᠠᠯᠢ ᠰᠠᠶᠢᠨ︕ ᠲᠠᠨ ᠤ ᠨᠠᠰᠤᠨ ᠰᠡᠬᠦᠳᠡᠷ ᠭᠡᠳᠦᠢ ᠪᠢᠯᠠ︖          ᠪᠢᠩ ᠲᠠᠩ᠄ ᠪᠢ ᠦᠨᠤ ᠵᠢᠯ 91 ᠨᠠᠰᠤᠳᠠᠢ᠃          ᠤᠷᠠᠩᠭᠤᠸ᠎ᠠ᠄ ᠶᠠᠮᠠᠷ ᠰᠠᠶᠢᠬᠠᠨ ᠨᠠᠰᠤ ᠪᠠᠶᠢᠨ᠎ᠠ︖ ᠪᠢ ᠴᠦ ᠦᠨᠡᠭᠡᠷ ᠠᠵᠠ ᠲᠠᠢ ᠬᠦᠮᠦᠨ ᠳ᠋ᠠ᠂ ᠡᠶᠢᠮᠤ ᠰᠠᠶᠢᠬᠠᠨ ᠦᠨᠳᠦᠷ ᠨᠠᠰᠤ ᠲᠠᠢ ᠬᠦᠮᠦᠨ ᠲᠠᠢ ᠠᠭᠤᠯᠵᠡᠵᠤ ᠶᠠᠷᠢᠯᠳᠤᠨ ᠰᠠᠭᠤᠨ᠎ᠠ ᠭᠡᠵᠤ ᠦᠨᠡᠭᠡᠷ ᠴᠦ ᠪᠤᠷᠬᠠᠨ ᠳᠤ ᠮᠦᠷᠬᠦᠭᠰᠡᠨ ᠲᠠᠢ ᠠᠳᠠᠯᠢ ᠶᠤᠮ ᠁           ᠪᠢᠩ ᠲᠠᠩ᠄ ᠮᠢᠨᠤ ᠡᠨᠡ ᠶᠢ ᠶᠠᠭᠤᠨᠡᠢ ᠦᠨᠳᠦᠷ ᠨᠠᠰᠤᠨ ᠳᠤ ᠲᠤᠭᠠᠴᠠᠬᠤ ᠶᠤᠮ︖ ᠮᠢᠨᠤ ᠡᠪᠦᠭᠡ 129 ᠨᠠᠰᠤᠯᠠᠭᠰᠠᠨ ᠶᠤᠮ᠂ ᠪᠢ ᠠᠶᠢᠯ ᠳᠤ ᠮᠤᠷᠳᠠᠳᠠᠯ᠎ᠠ ᠪᠠᠨ ᠡᠪᠦᠭᠡ ᠶᠢᠨ ᠢᠶᠠᠨ ᠬᠠᠵᠠᠭᠤ ᠳᠤ ᠤᠨᠳᠠᠵᠤ ᠪᠠᠶᠢᠭᠰᠠᠨ᠃ ᠲᠡᠷᠡ ᠰᠠᠶ᠋ᠢ ᠠᠮᠢᠳᠤ ᠪᠤᠷᠬᠠᠨ ᠶᠤᠮ᠃          ᠤᠷᠠᠩᠭᠤᠸ᠎ᠠ᠄ ᠵᠠ᠂ ᠲᠡᠭᠡᠭᠡᠳ ᠯᠠ ᠲᠡᠷᠡ ᠠᠮᠢᠳᠤ ᠪᠤᠷᠬᠠᠨ ᠤ ᠲᠤᠬᠠᠢ ᠦᠯᠢᠭᠡᠷ ᠡᠬᠢᠯᠠᠨ᠎ᠠ ᠳ᠋ᠠ᠂ ᠤᠳᠤ ᠶᠠᠷᠢᠬᠤ ᠤᠤ︖          ᠪᠢᠩ ᠲᠠᠩ᠄ ᠡᠪᠦᠭᠡ ᠶᠢᠨ ᠮᠢᠨᠢ ᠡᠪᠦᠭᠡ ᠭᠡᠵᠤ ᠨᠢᠭᠡ ᠰᠦᠷᠡᠭᠡᠢ ᠬᠦᠮᠦᠨ ᠪᠠᠶᠢᠭᠰᠠᠨ ᠭᠡᠨ᠎ᠠ ᠰᠢᠦ᠂ ᠲᠡᠬᠦᠨ ᠢ ᠲᠦᠭᠡᠮᠡᠯ ᠭᠡᠳᠡᠭ ᠭᠡᠨ᠎ᠠ᠃ ᠰᠢ ᠠᠨ ᠭᠡᠳᠡᠭ ᠭᠠᠵᠠᠷ  ᠲᠤ ᠴᠡᠷᠢᠭ ᠤᠨ ᠨᠤᠶᠠᠨ ᠪᠤᠯᠵᠤ ᠪᠠᠶᠢᠭᠰᠠᠨ ᠭᠡᠨ᠎ᠠ᠃ ᠭᠡᠬᠦ ᠳᠤ᠂ ᠲᠡᠬᠦᠨ ᠤ ᠲᠡᠭᠡᠷᠡᠬᠢ ᠨᠤᠶᠠᠨ ᠨᠢ ᠴᠡᠷᠢᠭ ᠠᠷᠠᠳ  ᠢ ᠬᠢᠬᠠᠵᠤ᠂ ᠶᠠᠯ᠎ᠠ ᠲᠤᠷᠭᠠᠭᠤᠯᠢ ᠢᠳᠡᠵᠤ᠂ ᠠᠷᠠᠳ ᠲᠦᠮᠡᠨ ᠢ ᠵᠤᠪᠠᠭᠠᠵᠤ᠂ ᠡᠰᠨᠨ ᠪᠤᠰᠤ ᠪᠠᠷ ᠠᠭᠠᠰᠢᠯᠠᠬᠤ ᠳᠤ ︽ᠡᠶᠢᠮᠤ ᠮᠠᠭᠤᠬᠠᠢ ᠠᠮᠢᠳᠠᠨ ᠢ ᠡᠨᠡ ᠶᠢᠷᠳᠢᠨᠴᠦ ᠠᠴᠠ ᠲᠤᠨᠢᠯᠭᠠᠬᠤ ᠦᠭᠡᠢ ᠶᠤᠮ ᠪᠤᠯ᠂ ᠤᠯᠤᠰ ᠠᠷᠠᠳ ᠤᠨ ᠭᠠᠰᠠᠯᠠᠩ ᠵᠤᠪᠠᠯᠠᠩ ᠤᠨ ᠦᠨᠳᠦᠰᠦ ᠪᠠᠶᠢᠨ᠎ᠠ᠂ ᠲᠦᠭᠡᠮᠡᠯ ᠮᠢᠨᠤ ᠭᠠᠭᠴᠠ ᠠᠮᠢ ᠶᠠᠭᠤ ᠯᠠ ᠪᠠᠶᠢᠨ᠎ᠠ︖ ᠲᠦᠮᠡᠨ ᠠᠷᠠᠳ ᠤᠨ ᠲᠡᠭᠰᠢ ᠲᠦᠷᠦ ᠴᠢᠬᠤᠯᠠ ᠪᠠᠶᠢᠨ᠎ᠠ ᠭᠡᠵᠤ︾ ᠭᠡᠵᠤ ᠰᠠᠨᠠᠭᠠᠳ ᠨᠤᠶᠠᠨ ᠢᠶᠠᠨ ᠠᠯᠠᠴᠢᠬᠠᠵᠡᠢ ᠭᠡᠨ᠎ᠠ ᠁         ᠤᠷᠠᠩᠭᠤᠸ᠎ᠠ᠄ ᠡᠴᠢᠭᠡ ᠡ᠂ ᠶᠠᠭᠠᠬᠢᠵᠤ ᠠᠯᠠᠭᠰᠠᠨ ᠶᠤᠮ ᠪᠤᠯ︖ ᠬᠠᠷᠠᠭᠤᠯ ᠮᠠᠨᠠᠭ᠎ᠠ ᠲᠠᠢ ᠲᠡᠶᠢᠮᠤ ᠶᠡᠭᠡ ᠨᠤᠶᠠᠨ ᠢ ᠁         ᠪᠢᠩ ᠲᠠᠩ᠄ ᠪᠢ ᠴᠢᠮ᠎ᠠ ᠳᠤ ᠬᠡᠯᠡᠵᠤ ᠪᠠᠶᠢᠬᠤ ᠦᠭᠡᠢ ᠤᠤ︖ ᠰᠤᠨᠤᠰᠴᠦ ᠪᠠᠢ︕ ᠨᠤᠶᠠᠨ ᠢᠶᠠᠨ ᠠᠯᠠᠬᠤ ᠪᠠᠨ ᠪᠠᠶᠢᠮ᠎ᠠ ᠡᠷᠳᠡ ᠠᠴᠠ ᠪᠦᠷ ᠵᠤᠬᠢᠶᠠᠴᠢᠬᠠᠵᠡᠢ ᠰᠢᠦ᠃ ᠲᠡᠷᠡ ᠦᠪᠡᠷ ᠢᠶᠠᠨ ᠭᠤᠷᠪᠠᠨ ᠬᠦᠦ ᠲᠠᠢ᠃ ᠨᠢᠭᠡᠨ ᠡᠳᠦᠷ ᠭᠤᠷᠪᠠᠨ ᠬᠦᠦ ᠪᠠᠨ ᠲᠠᠭᠤᠳᠠᠵᠤ ᠢᠷᠡᠬᠦᠯᠦᠭᠡᠳ ᠬᠡᠯᠡᠵᠤ ᠭᠡᠨ᠎ᠠ᠃ ᠪᠡᠶ᠎ᠡ ᠪᠦᠳᠦᠭᠰᠡᠨ ︵ᠡᠭᠡᠨᠡᠷ ᠬᠡᠦᠭᠡᠳ ᠠᠪᠴᠦ ᠭᠡᠷ ᠪᠦᠯᠢ ᠪᠤᠯᠤᠭᠰᠠᠨ︶ ᠶᠡᠭᠡ ᠬᠦᠪᠡᠬᠦᠨ ᠳᠡᠭᠡᠨ ︽ᠴᠢ ᠬᠠᠳᠠᠮ ᠤᠨ ᠨᠤᠳᠤᠭ ᠲᠠᠭᠠᠨ ᠤᠴᠢᠵᠤ ᠲᠡᠳᠡᠨ ᠤ ᠤᠪᠤᠭ ᠢ ᠠᠪᠴᠦ ᠠᠮᠢᠳᠤᠷᠠ︕︾ ᠭᠡᠵᠤ ᠵᠠᠬᠢᠭᠠᠳ ᠬᠠᠳᠠᠮ ᠳᠤᠨᠢ ᠶᠠᠪᠤᠭᠤᠯᠵᠡᠢ᠃         ᠤᠷᠠᠩᠭᠤᠸ᠎ᠠ᠄ ᠬᠠᠳᠠᠮ ᠨᠢ ᠶᠠᠮᠠᠷ ᠤᠪᠤᠭᠳᠠᠢ ᠶᠤᠮ ᠪᠤᠯ︖         ᠪᠢᠩ ᠲᠠᠩ᠄  ᠶᠢᠨ ᠤᠪᠤᠭᠳᠠᠢ ᠶᠤᠮ ᠭᠡᠨ᠎ᠡ︕ ᠪᠡᠶ᠎ᠡ ᠪᠦᠳᠦᠭᠡᠳᠦᠢ ᠬᠤᠶᠠᠳᠤᠭᠠᠷ ᠬᠦᠦ ᠪᠠᠨ ︽ᠴᠢ ᠨᠠᠭᠠᠴᠦ ᠶᠢᠨ ᠳᠠᠭᠠᠨ ᠤᠴᠢᠵᠤ ᠲᠡᠳᠡᠨ ᠤ ᠤᠪᠤᠭ ᠢ ᠠᠪᠴᠦ ᠠᠮᠢᠳᠤᠷᠠ︕︾ ᠭᠡᠵᠤ ᠶᠠᠪᠤᠭᠤᠯᠵᠡᠢ᠃ ᠨᠠᠭᠠᠴᠦ ᠨᠢ ᠴᠧᠩ ᠤᠪᠤᠭᠳᠠᠢ ᠶᠤᠮ ᠭᠡᠨ᠎ᠠ᠃ ᠤᠪᠤᠭ ᠬᠠᠯᠡᠵᠤ ᠭᠠᠳᠠᠭᠰᠢ ᠶᠠᠪᠤᠭᠤᠯᠤᠭᠰᠠᠨ ᠬᠤᠶᠠᠷ ᠬᠦᠦ ᠳᠡᠭᠡᠨ ︽ᠲᠠ ᠬᠤᠶᠠᠭᠤᠯᠠ ᠦᠪᠡᠷ ᠦᠪᠡᠷ ᠤᠨ ᠢᠶᠠᠨ ᠤᠪᠤᠭ ᠡᠷᠦᠭᠡ ᠪᠠᠨ ᠬᠦᠭᠡᠭᠡᠵᠤ ᠲᠠᠬᠢᠵᠤ ᠴᠦ ᠪᠤᠤ ᠬᠠᠷᠢᠵᠤ ᠢᠷ᠎ᠡ᠂ ᠭᠡᠨ ᠳᠤ ᠴᠦ ᠴᠢᠶᠠᠨ ᠤᠪᠤᠭᠳᠠᠢ ᠭᠡᠳᠡᠭ ᠢᠶᠠᠨ ᠮᠡᠳᠡᠭᠳᠡᠵᠤ ᠪᠤᠯᠬᠤ ᠦᠭᠡᠢ ᠮᠦᠷᠳᠡᠭᠡᠨ ᠮᠢᠨᠤ ᠬᠦᠦ ᠭᠡᠰᠡᠨ ᠢ ᠨᠡᠩ ᠮᠡᠳᠡᠭᠳᠡᠯ ᠦᠭᠡᠢ ᠠᠮᠤᠷ ᠲᠠᠶᠢᠪᠤᠩ ᠠᠮᠢᠳᠤᠷᠠ ᠁︾ ᠭᠡᠵᠤ ᠨᠠᠶᠢᠳᠠᠭᠰᠠᠨ ᠶᠤᠮ ᠭᠡᠨ᠎ᠠ︕         ᠤᠷᠠᠩᠭᠤᠸ᠎ᠠ᠄ ᠲᠡᠭᠡᠪᠡᠯ ᠲᠡᠷᠡ ᠬᠤᠶᠠᠷ ᠬᠦᠦ ᠨᠢ ᠰᠢ ᠠᠨ ᠤ ᠤᠷᠴᠢᠮ ᠢᠶᠠᠷ ᠠᠮᠢᠳᠤᠷᠠᠵᠤ ᠲᠡᠨᠳᠡ ᠰᠢᠩᠬᠢᠭᠰᠡᠨ ᠤᠤ︖         ᠪᠢᠩ ᠲᠠᠩ᠄ ᠲᠡᠭᠡᠬᠦ ᠦᠭᠡᠢ ᠶᠠᠭᠠᠬᠢᠨ᠎ᠠ᠂ ᠤᠳᠤ ᠪᠦᠷ ᠬᠢᠳᠠᠳ ᠪᠤᠯᠴᠢᠬᠠᠭᠰᠠᠨ ᠪᠡᠶᠢᠯᠬᠦᠢ᠂ ᠭᠡᠨ ᠮᠡᠳᠡᠬᠦ ᠶᠤᠮ︖ ᠬᠠᠷᠢᠨ ᠲᠦᠩᠭᠢᠵᠤ ᠠᠷᠪᠠᠨ ᠬᠤᠶᠠᠷ ᠨᠠᠰᠤ ᠬᠦᠷᠴᠦ ᠪᠠᠶᠢᠭ᠎ᠠ ᠬᠠᠮᠤᠭ ᠪᠠᠭ᠎ᠠ ᠬᠦᠦ ᠪᠠᠨ ᠨᠠᠭᠠᠰᠢ ᠬᠠᠨᠳᠤᠭᠤᠯᠵᠤ᠂ ᠨᠠᠮᠠᠢᠢ ᠡᠨᠡ ᠶᠢᠷᠳᠢᠨᠴᠦ ᠲᠡᠭᠡᠷ᠎ᠠ ᠠᠪᠴᠢᠷᠠᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ︕ ᠪᠢ ᠵᠠᠯᠭᠠᠭᠠᠳ ᠬᠡᠯᠡᠶ᠎ᠡ᠂ ᠴᠢ ᠰᠤᠨᠤᠰᠴᠦ ᠪᠡᠢ ᠠ︕ ᠲᠦᠭᠡᠮᠡᠯ᠂ ᠠᠷᠪᠠᠨ ᠬᠤᠶᠠᠷ ᠨᠠᠰᠤ ᠬᠦᠷᠴᠦ ᠪᠠᠶᠢᠭ᠎ᠠ ᠪᠠᠭ᠎ᠠ ᠬᠦᠦ ᠳᠡᠭᠡᠨ ︽ᠠᠪᠤ ᠨᠢ ᠴᠢᠮ᠎ᠠ ᠳᠤ ᠬᠤᠶᠠᠷ ᠶᠠᠭᠤᠮ᠎ᠠ ᠦᠯᠡᠳᠡᠭᠡᠶ᠎ᠡ᠂ ᠨᠢᠭᠡ ᠨᠢ ᠪᠤᠯ ᠮᠠᠨ ᠤ ᠴᠢᠶᠠᠨ ᠤᠪᠤᠭ᠂ ᠨᠦᠬᠦᠭᠡ ᠨᠢ ᠪᠤᠯ ᠮᠠᠨ ᠤ ᠤᠪᠤᠭ ᠤᠳᠤᠮ ᠤᠨ  ᠬᠢᠨ ᠤ ᠴᠢᠬᠢᠷᠠᠭ ᠵᠠᠩ ᠴᠢᠨᠠᠷ᠃ ᠶᠢᠷᠳᠢᠨᠴᠦ ᠲᠡᠭᠡᠷ᠎ᠡ ᠠᠮᠢ ᠨᠠᠰᠤ ᠭᠡᠵᠤ ᠬᠠᠮᠤᠭ ᠡᠷᠬᠢᠮ ᠶᠠᠭᠤᠮ᠎ᠠ ᠭᠡᠳᠡᠭ ᠢ ᠬᠦᠮᠦᠨ ᠪᠦᠬᠦᠨ ᠮᠡᠳᠡᠨ᠎ᠠ᠃ ᠭᠡᠬᠦ ᠳᠤ ᠠᠮᠢ ᠨᠠᠰᠤᠨ ᠠᠴᠠ ᠴᠦ ᠨᠢᠭᠡ ᠡᠷᠬᠢᠮ ᠶᠠᠭᠤᠮ᠎ᠠ ᠪᠤᠯ ᠰᠢᠳᠤᠷᠭᠤ ᠶᠤᠰᠤᠨ ᠢ ᠪᠠᠷᠢᠮᠳᠠᠯᠠᠬᠤ ᠴᠢᠩᠭ᠎ᠠ ᠴᠢᠬᠢᠷᠠᠭ ᠵᠤᠷᠢᠭ ᠰᠢᠨᠳᠠᠰᠤ ᠪᠤᠢ᠃ ᠴᠢᠶᠠᠨ ᠤᠪᠤᠭᠳᠠᠨ ᠤ ᠡᠷ᠎ᠡ ᠬᠦᠮᠦᠰ ᠭᠡᠵᠤ ᠡᠶᠢᠮᠤ ᠡᠷᠬᠢᠮ ᠶᠠᠭᠤᠮᠠᠨ ᠤ ᠲᠦᠯᠦᠭᠡ ᠠᠮᠢᠳᠤᠷᠠᠵᠤ᠂ ᠮᠥᠨ ᠡᠶᠢᠮᠤ ᠡᠷᠬᠢᠮ ᠶᠠᠭᠤᠮᠠᠨ ᠤ ᠲᠦᠯᠦᠭᠡ ᠦᠬᠦᠳᠡᠭ᠃ ᠴᠢ ᠴᠢᠶᠠᠨ ᠤᠪᠤᠭᠳᠠᠨ ᠤ ᠡᠨᠡ ᠵᠤᠷᠢᠭ ᠰᠢᠨᠳᠠᠰᠤ ᠶᠢ ᠠᠪᠴᠦ ᠲᠡᠯᠡᠭᠡᠢ ᠶᠢ ᠲᠤᠭᠤᠷᠢᠨ ᠠᠮᠢ ᠪᠠᠨ ᠲᠡᠵᠢᠭᠡᠵᠤ ᠶᠠᠪᠤᠭᠳᠤᠨ ᠁︾ ᠭᠡᠳ ᠬᠦᠭᠡᠭᠡᠴᠢᠭᠡᠵᠤ ᠭᠡᠨ᠎ᠠ᠃ ᠭᠤᠷᠪᠠᠨ ᠬᠡᠦᠭᠡᠳ ᠢᠶᠠᠨ ᠪᠦᠷ ᠵᠦᠭ ᠵᠦᠭ ᠲᠤᠨᠢ ᠲᠠᠷᠬᠠᠭᠠᠳ ᠴᠡᠷᠢᠭ ᠤᠨ ᠠᠯᠪᠠᠨ ᠲᠡᠭᠡᠷ᠎ᠡ ᠪᠠᠨ ᠪᠤᠴᠡᠵᠡᠢ᠃         ᠤᠷᠠᠩᠭᠤᠸ᠎ᠠ᠄ ᠲᠦᠭᠡᠮᠡᠯ ᠲᠡᠭᠡᠭᠡᠳ ᠭᠤᠷᠪᠠᠨ ᠬᠡᠦᠭᠡᠳ ᠲᠠᠢ ᠪᠠᠨ ᠡᠬᠦᠷᠢᠳᠡ ᠰᠠᠯᠤᠭᠰᠠᠨ ᠨᠢ ᠡ︖          ᠪᠢᠩ ᠲᠠᠩ᠄ ᠠᠨ᠎ᠠ᠂ ᠠᠨ᠎ᠠ ︵ᠲᠡᠶᠢᠮᠤ᠂ ᠶᠠᠭ ᠲᠡᠶᠢᠮᠤ᠂ ᠡᠩ ᠲᠡᠭᠡᠷ᠎ᠡ ᠨᠠ ᠶᠢ ᠲᠠᠭᠠᠭᠤᠯᠬᠤ ᠳᠠᠭᠠᠨ ᠢᠩᠬᠢᠵᠤ ᠬᠡᠯᠡᠭᠰᠡᠨ ᠴᠦ ᠶᠤᠮ ᠤᠤ ᠭᠡᠵᠤ ᠪᠢ ᠪᠤᠳᠤᠪᠠ᠃ ᠤᠴᠢᠷ ᠨᠢ ᠲᠡᠳᠡ ᠵᠠᠷᠢᠮ ᠳᠠᠭᠠᠨ ᠡᠨ᠎ᠠ ᠭᠡᠵᠤ ᠴᠦ ᠬᠡᠯᠡᠬᠦ ᠨᠢ ᠪᠤᠢ︶︕ ᠴᠡᠷᠢᠭ ᠲᠡᠭᠡᠷ᠎ᠠ ᠪᠠᠨ ᠬᠦᠷᠦᠭᠰᠡᠨ ᠤ ᠲᠠᠷᠠᠭ᠎ᠠ᠂ ᠨᠦᠬᠦᠭᠡ ᠶᠠᠯ᠎ᠠ ᠢᠳᠡᠳᠡᠭ ᠲᠠᠷᠤᠭ᠎ᠠ ᠨᠤᠶᠠᠨ ᠨᠢ ᠦᠵᠡᠬᠦᠯᠡᠩᠳᠦ ᠰᠠᠶᠢᠬᠠᠨ ᠠᠭᠤᠯᠠ ᠤᠰᠤᠨ ᠳᠤ ᠵᠤᠭᠠᠴᠠᠬᠤ ᠪᠠᠷ ᠤᠯᠠᠨ ᠤᠨᠤᠭ᠎ᠠ ᠮᠤᠷᠢ᠂ ᠲᠠᠭᠠᠭᠤᠯ ᠮᠠᠨᠠᠭᠤᠯ ᠲᠠᠢ ᠭᠠᠷᠴᠦ ᠭᠡᠨ᠎ᠠ᠃ ᠰᠦᠨᠢ ᠨᠢ ᠲᠠᠶᠠᠭᠠᠷ ᠤᠨᠳᠠᠵᠤ ᠨᠠᠮᠳᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠲᠦᠭᠡᠮᠡᠯ ᠲᠡᠷᠭᠡᠨ ᠳᠤ ᠭᠠᠯ ᠲᠠᠯᠪᠢᠵᠤ ᠤᠯᠠᠨ ᠬᠠᠷᠠᠭᠤᠯ ᠮᠠᠨᠠᠭᠠᠨ ᠤ ᠬᠦᠮᠦᠰ  ᠢ ᠦᠢᠮᠡᠬᠦᠯᠦᠭᠡᠳ᠂ ᠦᠪᠡᠷ ᠢᠶᠠᠨ ᠨᠤᠶᠠᠨ ᠤ ᠪᠠᠨ ᠤᠷᠳᠤᠨ ᠳᠤ ᠬᠦᠶᠦᠵᠤ ᠤᠷᠤᠨ᠂ ᠫᠤᠤᠳᠠᠵᠤ ᠠᠯᠠᠭᠰᠠᠨ ᠶᠤᠮ ᠭᠡᠨ᠎ᠡ᠃ ᠲᠡᠭᠡᠴᠢᠭᠡᠭᠡᠳ ᠦᠪᠡᠷ ᠢ ᠪᠠᠨ ᠲᠤᠰᠢᠶᠠᠭᠰᠠᠨ ᠪᠦᠭᠡᠳ ᠰᠢᠳᠭᠡᠯ ᠤᠯᠵᠤ ᠠᠯᠠᠭᠳᠠᠭᠰᠠᠨ ᠶᠤᠮ ᠭᠡᠳᠡᠭ ᠡ ᠁          ᠤᠷᠠᠩᠭᠤᠸ᠎ᠠ᠄ ᠲᠦᠭᠡᠮᠡᠯ ᠤᠨ ᠦᠯᠢᠭᠡᠷ ᠢᠩᠬᠢᠵᠤ ᠲᠠᠭᠤᠰᠤᠭᠠᠳ᠂ ᠦᠨᠦ ᠠᠷᠪᠠᠨ ᠬᠤᠶᠠᠷ ᠨᠠᠰᠤ ᠲᠠᠢ ᠬᠦᠦ ᠶᠢᠨ ᠬᠢᠨᠢ ᠦᠯᠢᠭᠡᠷ ᠡᠬᠢᠯᠡᠭᠰᠡᠨ ᠶᠤᠮ ᠪᠢᠵᠠ︖         ᠪᠢᠩ ᠲᠠᠩ᠄ ᠡᠨ᠎ᠠ᠂ ᠡᠨ᠎ᠠ᠂ ᠲᠠᠷᠠ ᠠᠷᠪᠠᠨ ᠬᠤᠶᠠᠷ ᠲᠠᠢ ᠬᠦᠦ ᠨᠢ ᠴᠢᠶᠠᠨ ᠤᠪᠤᠭ ᠪᠠ ᠵᠦᠪ ᠶᠤᠰᠤᠨ ᠢ ᠪᠠᠷᠢᠮᠳᠠᠯᠠᠬᠤ ᠴᠢᠩᠭ᠎ᠠ ᠭᠡᠷᠢᠶᠠᠰ ᠢ ᠠᠪᠴᠦ ᠶᠠᠪᠤᠭᠰᠠᠭᠠᠷ ᠪᠠᠶᠢᠵᠤ᠂ ᠰᠡᠬᠦᠯᠡᠷ ᠨᠢ ᠨᠠᠳᠠ ᠦᠭᠬᠦᠭᠰᠡᠨ ᠳ᠋ᠠ᠃         ᠤᠷᠠᠩᠭᠤᠸ᠎ᠠ᠄ ᠡᠨᠡ ᠬᠤᠶᠠᠷ ᠡᠷᠬᠢᠮ ᠶᠠᠭᠤᠮ᠎ᠠ ᠲᠠᠨ ᠤ ᠪᠡᠶ᠎ᠡ ᠲᠡᠭᠡᠷ᠎ᠡ ᠢᠷᠡᠳᠡᠯ᠎ᠠ ᠪᠠᠨ ᠭᠡᠳᠦᠢ ᠴᠦ ᠦᠯᠢᠭᠡᠷ ᠢ ᠦᠩᠭᠡᠷᠡᠭᠡᠭᠰᠡᠨ ᠪᠤᠯ ᠳ᠋ᠠ︖ ᠲᠡᠷᠠ ᠠᠷᠪᠠᠨ ᠬᠤᠶᠠᠷ ᠲᠠᠢ ᠬᠦᠦ ᠨᠢ ᠶᠠᠮᠠᠷ ᠨᠠᠷ᠎ᠠ ᠲᠠᠢ ᠪᠠᠶᠢᠪᠠ︖         ᠪᠢᠩ ᠲᠠᠩ᠄ ᠠᠮᠤᠭᠤᠯᠠᠩ ᠭᠡᠰᠡᠨ ᠨᠠᠷ᠎ᠠ  ᠲᠠᠢ᠃ ᠠᠷᠪᠠᠨ ᠬᠤᠶᠠᠷ ᠲᠠᠢ ᠠᠮᠤᠭᠤᠯᠠᠩ᠂ ᠲᠡᠭᠡᠭᠡᠳ ᠯᠠ ᠡᠴᠢᠭᠡ ᠶᠢᠨ ᠢᠶᠠᠨ ᠬᠤᠴᠤᠷᠭᠠᠭᠰᠠᠨ ᠬᠤᠶᠠᠷ ᠭᠡᠷᠢᠶᠡᠰ  ᠢ ᠠᠮᠢ ᠲᠠᠢ ᠪᠠᠨ ᠬᠠᠮᠳᠤ ᠠᠪᠴᠦ᠂ ᠲᠡᠯᠡᠭᠡᠢ ᠶᠢ ᠲᠤᠭᠤᠷᠢᠨ ᠲᠡᠨᠦᠬᠦᠴᠢᠯᠡᠵᠤ ᠶᠠᠪᠤᠭᠰᠠᠭᠠᠷ ᠱᠠᠨᠳᠦ᠋ᠩ ᠬᠦᠷᠴᠡᠢ᠃ ᠭᠡᠬᠦ ᠳᠤ᠂ ᠶᠠᠭᠠᠬᠢᠭᠠᠳ ᠴᠦ ᠮᠤᠩᠭᠤᠯ ᠨᠤᠳᠤᠭ ᠲᠠᠭᠠᠨ ᠤᠴᠢᠵᠤ ᠠᠮᠢᠳᠤᠷᠠᠶ᠎ᠠ ᠭᠡᠵᠤ ᠰᠠᠨᠠᠨ᠂ ᠱᠠᠨᠳᠦ᠋ᠩ ᠠᠴᠠ ᠬᠠᠷᠠᠴᠢᠨ ᠳᠤ ᠤᠷᠤᠵᠤ ᠢᠷᠡᠭᠡᠳ ᠪᠡᠶ᠎ᠡ ᠪᠦᠳᠤᠵᠤ ᠲᠠᠪᠤᠨ ᠬᠦᠦ ᠲᠦᠷᠦᠵᠡᠢ᠃ ᠲᠡᠷᠡ ᠲᠠᠪᠤᠨ ᠬᠦᠦ ᠶᠢ ᠨᠢ ᠴᠢᠶᠠᠨ ᠠᠨ ᠫᠢᠩ᠂ ᠴᠢᠶᠠᠨ‌‍ᠲ᠋ᠠᠢ ᠫᠢᠩ᠂ ᠴᠢᠶᠠᠨ ᠬᠠᠢ ᠱᠠᠨ᠂ ᠴᠢᠶᠠᠨ ᠳ᠋ᠦᠩ ᠱᠠᠨ ︵ᠳ᠋ᠦᠩ ᠱᠠᠨ ᠭᠡ ᠭᠡ ᠭᠡᠰᠡᠨ ᠲᠠᠭᠤᠤ ᠪᠠᠶᠢᠬᠤ ᠦᠭᠡᠢ ᠤᠤ᠂ ᠲᠡᠷᠡ ᠴᠢᠨᠢ ᠮᠢᠨᠤ ᠡᠨᠡ ᠡᠪᠦᠭᠡ ᠶᠤᠮ ᠰᠢᠦ᠂ ᠡᠨᠡ ᠡᠪᠦᠭᠡ ᠶᠢᠨ ᠢᠶᠠᠨ ᠦᠯᠢᠭᠡᠷ ᠲᠠᠭᠤᠤ ᠶᠢ ᠪᠢ ᠲᠠᠷᠠᠭ᠎ᠠ ᠨᠢ ᠬᠡᠯᠡᠶ᠎ᠡ︶᠂ ᠴᠢᠶᠠᠨ ᠡᠦ ᠶᠢᠨ ᠳ᠋ᠧ ᠭᠡᠳᠡᠭ᠃ ᠡᠨᠡ ᠴᠢᠶᠠᠨ ᠡᠦ ᠶᠢᠨ ᠳ᠋ᠧ ᠨᠢ ᠲᠠᠷᠤᠢ ᠮᠢᠨᠤ ᠡᠪᠦᠭᠡ᠃ ᠡᠪᠦᠭᠡ ᠮᠢᠨᠢ129 ᠨᠠᠰᠤᠯᠠᠭᠰᠠᠨ ᠪᠦᠭᠡᠳ ᠬᠠᠮᠤᠭ ᠦᠯᠢᠭᠡᠷ ᠤᠯᠠᠨ ᠲᠠᠢ ᠬᠦᠮᠦᠨ ᠶᠤᠮ᠃ ᠪᠢ ᠠᠶᠢᠯ ᠤᠨ ᠪᠡᠷᠢ ᠪᠤᠯᠳᠠᠯ᠎ᠠ ᠪᠠᠨ ᠡᠪᠦᠭᠡ ᠲᠠᠢ ᠬᠠᠮᠳᠤ ᠪᠠᠶᠢᠭᠰᠠᠨ ᠲᠤᠯᠠ ᠲᠡᠬᠦᠨ ᠤ ᠦᠯᠢᠭᠡᠷ ᠢ ᠬᠠᠮᠤᠭ ᠤᠯᠠᠨ ᠰᠤᠨᠤᠰᠤᠭᠰᠠᠨ ᠶᠤᠮ᠃          ᠤᠷᠠᠩᠭᠤᠸ᠎ᠠ᠄ ᠠᠮᠤᠭᠤᠯᠠᠩ ᠤᠨ ᠦᠯᠢᠭᠡᠷ ᠲᠠᠭᠤᠰᠴᠢᠬᠠᠯ᠎ᠠ ᠤᠤ︖         ᠪᠢᠩ ᠲᠠᠩ᠄ ᠠᠷᠪᠠᠨ ᠬᠤᠶᠠᠷᠬᠠᠨ ᠨᠠᠰᠤᠳᠠᠢ ᠠᠴᠠ ᠪᠠᠨ ᠲᠡᠨᠦᠬᠦᠴᠢᠯᠡᠵᠤ ᠭᠤᠶᠢᠷᠠᠨᠴᠢᠯᠡᠵᠤ ᠶᠠᠪᠤᠭᠰᠠᠨ‌ᠠᠮᠭᠤᠯᠠᠩ ᠪᠠᠷᠤᠭ ᠲᠡᠮᠡᠢ ᠤᠯᠠᠨ ᠦᠯᠢᠭᠡᠷ ᠬᠢᠭᠰᠡᠨ ᠦᠭᠡᠢ ᠶᠤᠮ ᠪᠠᠶᠢᠬ᠎ᠠ᠃ ᠡᠪᠦᠭᠡ ᠨᠠᠳᠠ ᠲᠡᠮᠡᠢ ᠬᠡᠯᠡᠭᠡ ᠦᠭᠡᠢ᠃ ᠭᠡᠬᠦ ᠳᠤ ᠂ ᠡᠴᠢᠭᠡ ᠶᠢᠨ ᠢᠶᠠᠨ ᠦᠯᠡᠳᠡᠭᠡᠭᠰᠡᠨ ᠬᠤᠶᠠᠷ ᠡᠷᠬᠢᠮ ᠢ ᠯᠠ ᠬᠤᠶᠢᠴᠢᠰ ᠲᠠᠭᠠᠨ ᠯᠤᠤ ᠯᠤᠤ ᠳ᠋ᠢ ︵ᠨᠤᠳᠠᠳᠠᠢ︶ ᠲᠤᠰᠢᠶᠠᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠂ ᠡᠬᠦᠨ ᠢ ᠴᠢ ᠰᠤᠨᠤᠰᠴᠦ ᠪᠠᠢ᠂ ᠤᠳᠤ ᠪᠤᠯ ᠮᠢᠨᠤ ᠡᠪᠦᠭᠡ ᠶᠢᠨ ᠦᠯᠢᠭᠡᠷ ᠡᠬᠢᠯᠡᠨ᠎ᠡ ᠭᠡᠵᠤ ᠪᠠᠶᠢᠨ᠎ᠠ ᠰᠢᠦ︕ ᠮᠢᠨᠤ ᠡᠪᠦᠭᠡ ᠠᠬ᠎ᠠ ᠲᠡᠬᠦᠦ ᠲᠡᠪᠤᠭᠤᠯᠠ ᠶᠢᠨ ᠦᠶ᠎ᠡ ᠲᠡᠭᠡᠷ᠎ᠡ ᠢᠷᠡᠬᠦ ᠳᠤ᠂ ᠬᠠᠷᠠᠴᠢᠨ ᠨᠤᠳᠤᠭ ᠲᠤ ︽ᠲᠡᠭᠡᠳᠦᠰ ᠤᠨ ᠬᠢᠨᠢ ᠨᠤᠳᠤᠭ ᠨᠢ ᠲᠤᠰ ᠭᠠᠵᠠᠷ ᠤᠷᠤᠨ ᠤ ᠪᠢᠰᠢ ᠬᠦᠮᠦᠨ ᠢ ᠪᠤᠭᠤᠯ ᠪᠤᠯᠭᠠᠨ᠎ᠠ︕︾ ᠭᠡᠰᠡᠨ ᠭᠡᠨ᠎ᠠ᠃ ᠲᠡᠷᠡ ᠲᠠᠪᠤᠨ ᠡᠪᠦᠭᠡ ᠮᠢᠨᠢ ᠪᠤᠭᠤᠯ ᠪᠤᠯᠬᠤ ᠲᠤᠷ᠎ᠠ ᠪᠠᠶᠢᠬᠤ ᠤᠤ ᠳ᠋ᠠ︖ ︽ᠪᠤᠭᠤᠯ ᠪᠤᠯᠬᠤ ᠦᠭᠡᠢ᠂ ᠲᠤᠳᠠᠭᠠᠶ᠎ᠡ︕︾ ᠭᠡᠵᠤ ᠭᠡᠳᠦᠬᠦᠯᠡ ᠪᠠᠨ ᠬᠡᠯᠡᠯᠴᠡᠵᠤ ᠲᠤᠬᠢᠷᠠᠭᠠᠳ ᠵᠠᠯᠠᠶᠢᠳ ᠲᠤ ᠤᠷᠤᠵᠤ ᠢᠷᠡᠭᠰᠡᠨ ᠶᠤᠮ ᠪᠠᠶᠢᠪᠠ᠃ ᠡᠪᠦᠭᠡ ︵ᠴᠢᠶᠠᠨ ᠡᠦ ᠶᠢᠨ ᠳ᠋ᠧ︶ ᠮᠢᠨᠢ ᠲᠤᠳᠠᠭᠠᠭᠰᠠᠭᠠᠷ ᠪᠠᠶᠢᠵᠤ ᠵᠠᠯᠠᠶᠢᠳ ᠤᠨ ᠴᠢᠨ᠋ᠸ᠎ᠠ ᠶᠢᠨ ᠭᠡᠷ ᠭᠡᠰᠡᠨ ᠭᠠᠵᠠᠷ ︵ᠤᠳᠤ ᠶᠢᠨ ᠲᠠᠶᠢᠯᠠᠢ ᠰᠢᠶᠠᠨ ᠳᠤ ᠪᠠᠭᠳᠠᠵᠤ ᠪᠤᠢ︶ ᠲᠤᠳᠠᠭᠠᠵᠤ ᠢᠷᠡᠵᠡᠢ᠃ ᠡᠴᠢᠭᠡ ᠠᠮᠭᠤᠯᠠᠩ ᠤᠨ ᠢᠶᠠᠨ ᠲᠡᠨᠦᠬᠦᠯᠴᠢ ᠠᠮᠢᠳᠤᠷᠠᠯ ᠢ ᠪᠠᠰᠠ ᠯᠠ ᠦᠷᠬᠦᠯᠵᠢᠯᠡᠬᠦᠯᠵᠤ᠂ ᠵᠠᠯᠠᠶᠢᠳ ᠤᠨ ᠠᠶᠢᠯ ᠤᠳ ᠢᠶᠠᠷ ᠬᠦᠴᠦ ᠶᠠᠪᠤᠵᠤ ᠪᠠᠶᠢᠳᠠᠯ᠎ᠠ᠂ ᠪᠡᠭᠡᠵᠢᠩ ᠠᠴᠠ ᠪᠠᠭᠤᠵᠤ ᠢᠷᠡᠭᠰᠡᠨ ᠲᠡᠭᠡᠰᠦᠨ ᠤ ᠨᠤᠶᠠᠨ ᠲᠠᠢ ᠲᠠᠭᠠᠷᠠᠵᠤ ᠭᠡᠨ᠎ᠠ᠃         ᠤᠷᠠᠩᠭᠤᠸ᠎ᠠ᠄ ᠲᠡᠭᠡᠰᠦᠨ ᠤ ᠨᠤᠶᠠᠨ ᠭᠡᠭᠴᠢ ᠶᠠᠭᠤ ᠬᠢᠳᠡᠭ ᠶᠤᠮ︖            
 
ᠢᠷᠡᠯᠲᠡ᠄ ᠤᠷᠠᠩᠭᠤᠸ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠡᠰᠢᠭᠲᠡᠨ ᠬᠤᠰᠢᠭᠤᠨ ᠤ ᠵᠠᠬ᠎ᠠ ᠳᠡᠯᠭᠡᠭᠦᠷ ᠤᠨ ᠬᠢᠨᠠᠯᠲᠠ ᠬᠠᠮᠢᠶᠠᠷᠤᠯᠲᠠ ᠶᠢᠨ ᠲᠣᠪᠴᠢᠶ᠎ᠠ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠁
ᠡᠭᠡᠰᠢᠭ ᠳᠣᠯᠣᠭᠠᠨ ᠦᠩᠭᠡ
ᠴᠠᠭᠠᠨ ᠮᠦᠷᠠᠨ ᠮᠢᠨᠢ
ᠬᠠᠳᠤᠨ ᠰᠦᠨᠡᠰᠦ ᠂ ᠭᠤᠷᠪᠠᠳᠤᠭᠠᠷ ᠪᠦᠯᠦᠭ᠂ ᠁
ᠴᠡᠴᠡᠭ ᠤᠨ ᠵᠦᠬᠡᠯᠡᠨ ᠪᠤᠷᠤᠭ᠎ᠠ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备07002090号