ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠡᠨᠡᠷᠢᠯ ᠤᠨ ᠲᠡᠭᠷᠢ ᠡᠵᠢ ᠮᠢᠨᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020-07-16
  ᠡᠨᠡᠷᠢᠯ ᠤᠨ ᠲᠡᠭᠷᠢ ᠡᠵᠢ ᠮᠢᠨᠢ                                                          ᠳ᠋ᠦᠩ ᠤᠷᠳᠤ                             ᠡᠷᠢᠯ ᠬᠦᠰᠡᠯ ᠳᠤ ᠲᠡᠮᠡᠦᠯᠡᠬᠦ ᠳᠤ ᠰᠠᠴᠤᠯᠢ ᠡᠷᠭᠦᠵᠦ ᠵᠠᠯᠪᠠᠷᠢᠳᠠᠭ ᠲᠠ ᠮᠢᠨᠢ                            ᠠᠳᠡᠵᠦ ᠨᠢᠭᠡ ᠪᠦᠳᠦᠷᠢᠬᠦ ᠳᠤ ᠡᠷᠭᠦᠵᠦ ᠰᠠᠨᠠᠭᠤᠯᠵᠤ ᠵᠠᠬᠢᠳᠠᠭ ᠲᠠ ᠮᠢᠨᠢ                            ᠡᠭᠡᠯ ᠪᠤᠷᠤᠭᠵᠢᠭᠤᠨ ᠠᠮᠢᠳᠤᠷᠠᠯ ᠢ ᠠᠮᠢᠯᠠᠭᠤᠯᠵᠤ ᠪᠤᠰᠬᠠᠳᠠᠭ ᠲᠠ ᠮᠢᠨᠢ                            ᠡᠯᠢᠭᠡᠰᠡᠭ ᠲᠤᠳᠤᠨᠤ ᠬᠦᠮᠦᠰ ᠲᠠᠢ ᠪᠠᠨ ᠡᠶᠡᠯᠳᠦᠵᠦ ᠶᠠᠪᠤᠳᠠᠭ ᠲᠠ ᠮᠢᠨᠢ                   ᠬᠠᠯᠠᠭᠤᠨ ᠲᠠᠢ ᠬᠦᠢᠳᠡᠨ ᠲᠠᠢ ᠬᠠᠨᠠᠭᠠᠷ ᠬᠤᠷᠸ᠎ᠠ ᠶᠢᠨ ᠠᠰᠬ᠎ᠠ ᠦᠨᠳᠦᠷ ᠬᠠᠳᠠ᠂ ᠡᠩᠭᠡᠷ ᠪᠤᠰᠤᠭ᠎ᠠ ᠠᠭᠤᠯᠠᠰ ᠢᠶᠠᠨ ᠬᠡᠮᠡᠷ ᠦᠮᠦᠭ ᠲᠦᠰᠢᠭ ᠮᠢᠨᠢ ᠪᠤᠯᠵᠤ ᠶᠠᠪᠤᠭ᠎ᠠ ᠬᠠᠶᠢᠷᠠᠳᠤ ᠪᠤᠭᠤᠷᠤᠯ ᠠᠪᠤ ᠡᠵᠢ ᠲᠠᠢ  ᠪᠠᠨ ᠦᠷᠯᠦᠭᠡ ᠪᠤᠯᠭᠠᠨ ᠤᠷᠭᠤᠬᠤ ᠨᠠᠷᠠᠨ ᠢᠶᠠᠨ ᠤᠭᠳᠤᠵᠤ᠂ ᠡᠳᠦᠷ ᠪᠤᠯᠭᠠᠨ  ᠦᠯᠵᠡᠢ ᠮᠦᠷ ᠲᠠᠢ  ᠶᠠᠪᠤᠭ᠎ᠠ  ᠳᠠᠭᠠᠨ ᠪᠢ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠠᠵᠠ ᠲᠠᠢ ᠬᠦᠮᠦᠨ ᠭᠡᠵᠦ ᠪᠤᠳᠤᠨ ᠪᠠᠶᠠᠰᠴᠤ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ᠃                 ᠠᠵᠠᠢ ᠪᠤᠭᠤᠷᠤᠯ ᠠᠮᠢᠳᠤ ᠪᠤᠷᠬᠠᠨ ᠡᠵᠢ ᠮᠢᠨᠢ ᠨᠠᠶᠠᠨ ᠤ ᠲᠠᠪᠠᠭ᠎ᠠ ᠶᠢ ᠠᠷᠠᠢ ᠲᠦᠩᠭᠡᠵᠢ ᠲᠠᠪᠠᠨ ᠬᠤᠶᠠᠷ ᠬᠠᠪᠤᠷ ᠨᠠᠮᠤᠷ ᠢ ᠡᠪᠬᠡᠵᠦ ᠶᠠᠪᠤᠭ᠎ᠠ ᠬᠦᠮᠦᠨ ᠰᠠᠨ᠃                    ᠡᠵᠢ ᠵᠢᠨ‌ᠮᠢᠨᠢ ᠲᠠᠭᠤᠳᠠᠬᠤ ᠠᠯᠳᠠᠷ ᠲᠠᠭᠤᠷᠢᠰᠬᠤ ᠨᠡᠷ᠎ᠡ ᠨᠢ ᠪᠤᠷᠵᠢᠭᠢᠨ ᠪᠠᠳᠮ᠎ᠠ ᠭᠡᠳᠡᠭ᠂ ᠠᠩᠬ᠎ᠠ ᠲᠤᠮᠳᠠᠳᠤ ᠶᠢᠨ ᠰᠤᠶᠤᠯ ᠤᠨ ᠬᠢᠷᠢ ᠬᠡᠮᠵᠢᠶ᠎ᠡ ᠲᠠᠢ᠂ ᠲᠤᠮᠳᠠ ᠶᠢᠨ ᠲᠡᠭᠰᠢᠬᠡᠨ ᠪᠡᠶ᠎ᠡ ᠲᠠᠢ᠂ ᠦᠭᠡ ᠶᠠᠷᠢᠶ᠎ᠠ ᠴᠦᠬᠡᠪᠳᠦᠷ ᠡᠶᠡᠯᠳᠡᠭ ᠵᠦᠭᠡᠯᠡᠨ ᠵᠠᠩ ᠠᠭᠠᠯᠢ ᠲᠠᠢ ᠪᠠᠶᠢᠵᠤ ᠤᠣᠯ ᠤᠨ ᠨᠤᠨ ᠠᠷᠪᠠᠨ ᠬᠤᠰᠢᠭᠤᠨ ᠤ ᠨᠢᠭᠡ ᠪᠤᠯᠤᠭᠰᠠᠨ ᠲᠦᠰᠢᠶᠡᠳᠦ ᠬᠤᠰᠢᠭᠤᠨ ᠤ ᠭᠡᠭᠡᠨ ᠤᠷᠳᠤᠨ ᠤ ᠰᠦᠮ᠎ᠡ ᠶᠢᠨ ᠬᠠᠶᠢᠶᠠᠩ ᠬᠤᠪᠢᠯᠭᠠᠨ ᠭᠡᠭᠡᠨ ᠤ ᠭᠤᠳᠠᠭᠠᠷ ᠦᠬᠢᠨ ᠲᠡᠭᠦᠤ ᠨᠢ ᠪᠤᠯᠵᠤ ᠵᠠᠶᠠᠭᠠᠵᠠᠢ᠃᠃                   ᠬᠦᠭᠡᠷᠦᠬᠦᠢ᠂ ᠡᠵᠢ ᠮᠢᠨᠢ ᠨᠠᠰᠤᠨ ᠲᠤᠷᠰᠢᠳᠠ ᠰᠠᠨᠠᠭ᠎ᠠ ᠰᠠᠶᠢᠨ ᠪᠤᠳᠤᠯ ᠠᠷᠢᠭᠤᠨ ᠶᠠᠪᠤᠭᠰᠠᠨ ᠪᠤᠯᠬᠤᠷ ᠢᠶᠠᠨ ᠬᠦᠮᠦᠨ ᠵᠤᠨ ᠤ ᠪᠠᠨ  ᠬᠦᠷᠢᠶᠡᠯᠡᠯ ᠲᠠᠭᠠᠰᠢᠶᠠᠯ ᠢ ᠶᠡᠭᠡᠳᠡ ᠬᠦᠷᠳᠡᠵᠦ᠂ ᠨᠠᠰᠤᠨ ᠬᠤᠳᠤᠭ ᠢ ᠮᠠᠰᠢ ᠦᠨᠳᠦᠷ ᠬᠤᠷᠢᠶᠠᠵᠤ᠂ ᠠᠪᠤ ᠲᠠᠢ ᠮᠢᠨᠢ ᠬᠤᠶᠠᠭᠤᠯᠠ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠳᠡᠭᠡᠨ ᠬᠠᠨᠢ ᠢᠵᠢᠯᠢ ᠪᠤᠯᠵᠤ᠂ ᠪᠠᠶ᠎ᠠ ᠡᠷᠡᠭᠦᠯ ᠰᠠᠨᠠᠭ᠎ᠠ ᠰᠠᠷᠠᠭᠤᠯ ᠶᠠᠪᠤᠵᠤ ᠪᠠᠶᠢᠭ᠎ᠠ   ᠨᠢ ᠡᠨᠡ ᠪᠢᠯᠡ᠃                   ᠡᠵᠢ ᠮᠢᠨᠢ ᠵᠠᠯᠠᠭᠤ ᠽᠠᠨᠳᠠᠨ ᠨᠠᠰᠤᠨ ᠳᠠᠭᠠᠨ ᠭᠤᠶᠤ ᠰᠠᠶᠢᠬᠠᠨ ᠦᠩᠭᠡ ᠲᠦᠷᠭᠦ ᠲᠠᠢ᠂ ᠠᠵᠢᠯᠴᠢ ᠪᠤᠷᠤᠭᠵᠢᠭᠤᠨ ᠬᠦᠮᠦᠨ ᠪᠠᠶᠢᠭᠰᠠᠨ ᠰᠠᠨ᠃ ︿ ︿ ᠬᠠᠨ ᠠᠭᠤᠯᠠ ᠶᠢ ᠴᠠᠰᠤ ᠲᠠᠷᠤᠵᠤ᠂ ᠬᠠᠶᠢᠷᠠᠨ ᠪᠠᠶ᠎ᠠ  ᠶᠢ ᠨᠠᠰᠤ ᠲᠠᠷᠤᠵᠠᠢ﹀﹀ ᠭᠡᠵᠦ ᠦᠨᠡᠨ ᠵᠦᠪ ᠰᠠᠨ᠃ ᠨᠠᠮᠤᠷ ᠡᠪᠦᠯ ᠤᠨ ᠡᠭᠡᠯᠵᠢᠯᠡᠯᠳᠡ᠂ ᠨᠠᠰᠤ ᠵᠢᠯ ᠤᠨ ᠨᠡᠮᠡᠭᠳᠡᠯ  ᠢ ᠨᠢ ᠲᠠᠭᠠᠯᠳᠤᠵᠤ᠂ ᠬᠦᠭᠡᠷᠦᠬᠦᠢ ᠡᠵᠢ ᠶᠢᠨ ᠮᠢᠨᠢ ᠲᠡᠷᠡᠬᠦ ᠭᠤᠶᠤ ᠭᠡᠭᠡᠨᠴᠡᠷ ᠵᠢᠰᠤ ᠴᠢᠷᠠᠢ᠂ ᠭᠠᠯᠪᠢᠷ ᠰᠠᠶᠢᠬᠠᠨ ᠲᠦᠷᠭᠦ ᠪᠦᠬᠦᠨ ᠨᠢ ᠵᠠᠯᠠᠭᠤ ᠽᠠᠨᠳᠠᠨ ᠨᠠᠰᠤ ᠲᠠᠢ ᠪᠠᠨ ᠴᠤᠭᠭᠠᠷ ᠲᠡᠷᠡ ᠨᠤᠭᠤᠷᠡᠯ ᠪᠦᠳᠦᠷᠢᠯ ᠲᠤ ᠠᠮᠢᠳᠤᠷᠠᠯ ᠤᠨ ᠬᠤᠯᠠ ᠠᠶᠠᠨ ᠢ ᠲᠤᠭᠤᠯᠵᠤ ᠢᠷᠡᠭᠰᠡᠨ ︿︿ᠦᠷᠳᠡᠭᠡ﹀﹀ ᠳᠤ ᠲᠤᠷᠠᠳᠬᠠᠯ  ᠪᠤᠯᠭᠠᠨ‌ᠬᠤᠴᠤᠷᠴᠤ᠂ ᠬᠠᠯᠢᠨ ᠲᠡᠭᠦᠯᠢᠬᠦ ᠰᠢᠪᠠᠭᠤᠨ ᠤ ᠰᠡᠭᠦᠳᠡᠷ ᠰᠢᠭ ᠠᠭᠤᠯᠠ ᠬᠠᠳᠠ᠂ ᠨᠠᠭᠤᠷ ᠭᠤᠣᠯ ᠤᠳ ᠤᠨ ᠢᠶᠠᠨ ᠲᠡᠷᠳᠡᠭᠡ ᠡᠩᠭᠡᠷ ᠡᠷᠬᠢ  ᠪᠠᠷ ᠵᠠᠮᠬᠠᠷᠠᠵᠤ ᠤᠳᠴᠠᠢ᠃                      ᠮᠢᠨᠦ ᠡᠵᠢ ᠠᠶᠢᠯ ᠭᠡᠷ ᠢᠶᠠᠨ ᠦᠭᠡᠳᠡ ᠲᠠᠳᠠᠵᠤ᠂ ᠠᠯᠠᠭ ᠦᠷᠡᠰ ᠢᠶᠠᠨ ᠬᠦᠮᠦᠨ ᠰᠠᠴᠠᠭᠤ ᠶᠠᠪᠤᠭᠤᠯᠬᠤ ᠶᠢᠨ ᠲᠤᠰᠠᠳᠠ ᠦᠪᠡᠷ ᠤᠨ ᠤᠶᠤᠨ ᠤᠬᠠᠭᠠᠨ ᠪᠤᠯᠤᠨ ᠠᠵᠢᠯᠴᠢ ᠬᠦᠳᠡᠯᠮᠦᠷᠢᠴᠢ ᠬᠦᠴᠦᠨ  ᠳᠡᠭᠡᠨ ᠲᠦᠰᠢᠭᠯᠡᠵᠦ᠂ ᠠᠷᠤ ᠭᠡᠷ ᠠᠮᠢᠳᠤᠷᠠᠯ ᠤᠶᠢᠯᠡᠰ ᠢᠶᠠᠨ ᠲᠤᠬᠢᠳᠠᠢ ᠰᠠᠶᠢᠬᠠᠨ ᠲᠤᠳᠤᠮᠳᠠᠵᠤ ᠬᠠᠬᠢᠷ ᠡᠪᠦᠯ ᠤᠨ ᠬᠦᠢᠳᠡᠨ ᠰᠢᠭᠤᠷᠭ᠎ᠠ᠂ ᠬᠠᠯᠠᠭᠤᠨ ᠵᠤᠨ ᠤ ᠪᠦᠭᠴᠢᠮ᠎ᠡ ᠨᠠᠷᠠᠨ ᠳᠤ ᠰᠢᠷᠠᠭᠳᠠᠵᠤ᠂ ᠬᠠᠶᠠ ᠪᠠᠰᠠ ᠬᠠᠳᠠ ᠮᠦᠷᠭᠦᠵᠦ᠂ ᠬᠠᠮᠠᠷ ᠲᠠᠭᠠᠨ ᠤᠳᠤᠭ᠎ᠠ ᠤᠷᠤᠭᠤᠯᠵᠤ᠂ ᠬᠠᠪᠤᠷ᠂ ᠨᠠᠮᠤᠷ  ᠂ ᠡᠪᠦᠯ  ᠂ ᠵᠤᠨ ᠢ ᠡᠭᠡᠯᠵᠢᠯᠡᠨ ᠲᠤᠭᠤᠯᠵᠤ ᠤᠯᠠᠷᠢᠨ ᠬᠤᠪᠢᠷᠠᠬᠤ ᠰᠠᠷ᠎ᠠ ᠡᠳᠦᠷ ᠪᠤᠯᠤᠨ ᠴᠠᠭ ᠬᠤᠭᠤᠴᠠᠭ᠎ᠠ ᠶᠢᠨ ᠬᠠᠳᠠᠭᠤ ᠴᠢᠩᠭ᠎ᠠ ᠰᠢᠯᠭᠠᠷᠠᠭᠤᠯᠤᠯᠳᠠ ᠶᠢ ᠲᠤᠭ᠎ᠠ ᠲᠤᠮᠰᠢ ᠦᠭᠡᠢ ᠢᠯᠠᠨ ᠲᠠᠪᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃                             ᠪᠢᠳᠡ ᠡᠵᠢ ᠠᠴᠠ ᠪᠠᠨ ᠠᠬ᠎ᠠ ᠦᠬᠢᠨ ᠲᠡᠭᠦᠤ ᠪᠤᠯᠤᠨ ᠲᠡᠭᠦᠤ ᠲᠠᠢ ᠪᠠᠨ ᠲᠦᠷᠪᠡᠭᠦᠯᠡ ᠶᠤᠮ᠃ ᠪᠢ ᠲᠦᠷᠪᠡᠨ ᠬᠡᠦᠬᠡᠳ ᠤᠨ ᠬᠢᠨ ᠲᠤᠮᠳᠠ ᠤᠣᠭᠠᠨ ᠨᠢ ᠮᠢᠨᠦ ᠲᠤᠣᠷ᠎ᠠ ᠬᠤᠶᠠᠷ ᠬᠡᠦᠬᠡᠨ ᠲᠡᠭᠦᠤ ᠨᠢᠭᠡ ᠲᠡᠭᠦᠤ ᠲᠠᠢ ᠪᠠᠶᠢᠵᠠᠢ᠃                        ᠨᠠᠳᠠ ᠶᠢ ᠠᠷᠠᠢ ᠯᠠ ᠭᠡᠵᠦ ᠤᠬᠠᠭᠠᠨ ᠲᠦᠬᠦᠭᠡ ᠤᠷᠤᠬᠤ ᠳᠤ ᠬᠦᠭᠡᠷᠦᠬᠦᠢ ᠠᠬ᠎ᠠ ᠨᠠᠳᠠ ᠲᠠᠢ ᠪᠠᠨ ᠰᠢᠪᠠᠭᠤ ᠰᠢᠬ ᠱᠤᠯᠤᠭᠠᠨᠠᠨ᠂ ᠡᠷᠪᠡᠬᠡᠢ ᠰᠢᠭ ᠲᠡᠷᠪᠡᠵᠦ  ᠨᠠᠭᠠᠳᠤᠨ ᠲᠤᠭᠯᠠᠵᠤ ᠪᠠᠶᠢᠭᠰᠠᠨ ᠬᠦᠭᠡᠷᠦᠬᠦᠢ ᠲᠡᠭᠦᠤ᠄ ︿︿ᠴᠠᠩ ᠹᠦ᠋﹀﹀ ᠮᠢᠨᠢ ᠭᠡᠨᠡᠳᠳᠡ ᠪᠦᠬᠦ ᠪᠡᠶ᠎ᠡ ᠨᠢ ᠬᠠᠯᠠᠭᠤᠷᠠᠭᠠᠳ ᠬᠦᠨᠳᠦ ᠪᠠᠷ ᠡᠪᠡᠳᠴᠢᠯᠡᠵᠡᠢ᠃                           ᠡᠭᠦᠨ ᠳᠤ ᠠᠪᠤ ᠡᠵᠢ ᠬᠤᠶᠠᠭᠤᠯᠠ ᠠᠶᠤᠨ ᠰᠠᠨᠳᠤᠷᠴᠤ ᠲᠡᠭᠦᠤ ᠶᠢ ᠠᠪᠴᠤ ᠠᠶᠢᠯ ᠠᠴᠠ ᠪᠠᠨ ᠲᠠᠯᠠ ᠭᠠᠷᠤᠢ ᠭᠠᠵᠠᠷ ᠵᠠᠶᠢᠳᠠᠭᠤ  ᠱᠧᠪᠡᠷᠳᠦ ᠪᠠᠯᠭᠠᠰᠤᠨ ᠳᠤ ᠬᠦᠷᠴᠦ᠂ ᠨᠡᠷ᠎ᠡ ᠲᠦᠷᠦ ᠲᠠᠢ ᠰᠠᠶᠢᠨ ᠡᠮᠴᠢ ᠶᠢ ᠡᠷᠢᠵᠦ᠂ ᠬᠦᠭᠡᠷᠦᠬᠦᠢ ᠲᠡᠭᠦᠤ ᠳᠤ  ᠡᠮᠴᠢᠯᠡᠭᠡ ᠬᠢᠯᠭᠡᠭᠰᠡᠨ ᠴᠦ ᠢᠯᠡᠷᠢ ᠪᠤᠯᠵᠤ ᠲᠡᠶᠢᠯᠦᠭᠰᠡᠨ ᠦᠭᠡᠢ ᠬᠦᠭᠡᠷᠦᠬᠦᠢ  ᠲᠡᠭᠦᠤ ᠮᠢᠨᠢ ᠢᠩᠭᠢᠭᠡᠳ ᠠᠷᠠᠢ ᠯᠠ ᠲᠦᠷᠪᠡᠬᠡᠨ ᠨᠠᠰᠤᠳᠠᠢ ᠳᠠᠭᠠᠨ ᠠᠪᠤ ᠡᠵᠢ ᠠᠬ᠎ᠠ ᠲᠡᠭᠦᠤ ᠰᠠᠳᠤᠨ ᠲᠦᠷᠦᠯ ᠠᠴᠠ ᠪᠠᠨ ᠦᠨᠢᠳᠡ  ᠠᠩᠭᠢᠵᠢᠷᠠᠵᠤ ᠠᠨᠢᠷ ᠬᠤᠯᠠ ᠲᠡᠷᠳᠡᠭᠡ ᠶᠢᠷᠳᠢᠨᠴᠤ ᠳᠤ ᠠᠶᠠᠷᠯᠠᠨ ᠤᠳᠴᠠᠢ ᠃                          ᠬᠡᠵᠢᠶ᠎ᠡ ᠬᠤᠵᠢᠮ ᠨᠢ ᠨᠤᠳᠤᠭ ᠤᠰᠤᠨ ᠳᠠᠭᠠᠨ  ᠦᠨᠳᠦᠷ ᠡᠮᠴᠢᠯᠡᠭᠡ ᠶᠢᠨ ᠮᠡᠷᠭᠡᠵᠢᠯ ᠲᠠᠢ ᠨᠤᠳᠤᠭ ᠤᠨ ᠡᠮᠴᠢ  ᠮᠢᠨᠦ ᠲᠡᠭᠦᠤ  ᠵᠢᠨ‌ᠤᠯᠠᠭᠠᠨ ᠨᠤᠳ ᠭᠡᠳᠡᠭ ᠡᠪᠡᠳᠴᠢᠨ ᠳᠤ ᠨᠡᠷᠪᠡᠭᠳᠡᠭᠡᠳ ᠪᠠᠶᠢᠭᠰᠠᠨ ᠢ ᠲᠠᠷᠢᠬᠢᠨ ᠤ ᠪᠦᠷᠬᠦᠪᠴᠢ ᠶᠢᠨ ᠦᠷᠪᠢᠰᠦᠯ ᠭᠡᠵᠦ ᠪᠤᠷᠤᠭᠤ ᠤᠨᠤᠰᠢᠯᠠᠵᠤ᠂ ᠪᠤᠷᠤᠭᠤ ᠵᠠᠰᠠᠯᠭ᠎ᠠ ᠬᠢᠭᠰᠡᠨ  ᠠᠴᠠ ᠪᠤᠯᠵᠤ᠂ ᠬᠦᠭᠡᠷᠦᠬᠦᠢ ᠲᠡᠭᠦᠤ ᠶᠢ ᠮᠢᠨᠢ ᠨᠢᠯᠬ᠎ᠠ ᠶᠢᠨ ᠰᠠᠶᠢᠬᠠᠨ ᠨᠠᠰᠤᠨ ᠳᠤ ᠨᠢ ᠨᠠᠨᠳᠢᠨ ᠬᠤᠷᠸ᠎ᠠ ᠠᠴᠠ ᠠᠩᠭᠢᠵᠢᠷᠠᠭᠰᠠᠨ ᠭᠡᠳᠡᠭ ᠢ ᠮᠡᠳᠡᠵᠡᠢ᠃ ᠭᠡᠪᠡᠴᠦ ᠲᠤᠬᠠᠢ ᠶᠢᠨ ᠦᠶᠡᠰ ᠲᠡᠭᠦᠤ ᠮᠢᠨᠢ ᠨᠢᠭᠡᠨᠳᠡ ᠪᠤᠯᠬᠤ ᠦᠭᠡᠢ ᠪᠤᠯᠵᠤ ᠠᠯᠢᠪᠠ ᠪᠤᠯᠭᠤᠮᠵᠢ ᠪᠦᠬᠦᠨ ᠠᠯᠠᠭ᠎ᠠ ᠪᠤᠯᠵᠤ ᠵᠦᠪᠬᠡᠨ ᠬᠠᠷᠠᠮᠰᠠᠯ ᠭᠤᠮᠤᠳᠠᠯ ᠲᠡᠳᠦᠢ ᠪᠤᠯᠵᠤ ᠬᠤᠴᠤᠷᠤᠭᠰᠠᠨ ᠪᠠᠶᠢᠨ᠎ᠠ᠃                           ᠲᠡᠭᠦᠨ ᠠᠴᠠ ᠡᠬᠢᠯᠡᠵᠦ ᠪᠢ ᠠᠪᠤ ᠡᠵᠢ ᠶᠢᠨ ᠢᠶᠠᠨ ᠲᠡᠷᠭᠡᠳᠡ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠲᠤᠯᠭᠤᠷ ᠰᠢᠬ ᠬᠤᠶᠠᠷ ᠬᠡᠦᠬᠡᠨ ᠲᠡᠭᠦᠤ ᠲᠠᠢ ᠪᠠᠨ ᠭᠤᠷᠪᠠᠭᠤᠯᠠ ᠪᠠᠨ ᠪᠤᠯᠵᠤ ᠬᠤᠴᠤᠷᠤᠭᠰᠠᠨ ᠪᠢᠯᠡ᠃                         ᠭᠡᠶ᠎ᠡ᠂ ᠦᠷ᠎ᠡ ᠪᠠᠨ ᠠᠯᠳᠠᠭᠰᠠᠨ ᠡᠬᠡ ᠬᠦᠮᠦᠨ ᠤ ᠪᠡᠶ᠎ᠡ ᠰᠡᠳᠭᠢᠯ ᠤᠨ ᠲᠠᠷᠤᠭᠠᠰᠤ ᠭᠡᠭᠴᠢ ᠬᠡᠴᠢᠨᠡᠨ ᠶᠡᠭᠡ ᠬᠦᠨᠳᠦ ᠬᠡᠴᠡᠭᠦᠤ ᠪᠠᠶᠢᠳᠠᠭ ᠢ ᠬᠡᠨ ᠴᠦ ᠤᠶᠢᠯᠠᠭᠠᠵᠤ ᠮᠡᠳᠡᠬᠦ ᠠᠵᠠᠢ᠃                          ᠡᠵᠢ ᠮᠢᠨᠢ ᠲᠡᠭᠦᠤ ᠶᠢ ᠠᠯᠳᠠᠭᠰᠠᠨ ᠤ ᠬᠢᠨᠢ ᠲᠡᠷᠡᠬᠦ ᠵᠢᠯ ᠤᠨ ᠨᠠᠮᠤᠷ ᠲᠤᠩ ᠶᠡᠭᠡ ᠪᠡᠶ᠎ᠡ ᠰᠡᠳᠭᠢᠯ ᠤᠨ ᠬᠦᠨᠳᠦ ᠡᠪᠡᠳᠴᠢᠨ ᠳᠤ ᠨᠡᠷᠪᠡᠭᠳᠡᠵᠡᠢ᠃ ᠨᠢᠭᠡᠨ ᠡᠳᠦᠷ ᠡᠵᠢ ᠮᠢᠨᠢ ᠬᠤᠪᠴᠠᠰᠤ ᠲᠡᠪᠡᠯ ᠡᠰᠭᠡᠵᠦ ᠤᠶᠢᠯᠡ ᠤᠳᠠᠰᠤᠨ ᠤ ᠠᠵᠢᠯ ᠡᠭᠦᠰᠭᠡᠵᠦ ᠪᠠᠶᠢᠬᠤ ᠲᠤᠮᠳᠠ ᠮᠦᠨ ᠯᠠ ᠲᠡᠭᠦᠤ ᠶᠢ ᠮᠢᠨᠢ ᠰᠠᠨᠠᠵᠤ ᠪᠤᠳᠠᠯᠭ᠎ᠠ ᠪᠤᠯᠵᠤ ᠪᠠᠶᠢᠬᠤ ᠳᠠᠭᠠᠨ ᠦᠪᠡᠷ ᠤᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠪᠠᠶᠢᠭᠰᠠᠨ ᠤᠶᠤᠳᠠᠯ ᠤᠨ ᠵᠡᠭᠦᠤ ᠶᠢ ᠮᠠᠷᠳᠠᠵᠤ  ᠰᠢᠭᠤᠳ ᠬᠤᠭᠤᠯᠠᠢ ᠳᠠᠭᠠᠨ ᠵᠠᠯᠬᠢᠵᠤ ᠤᠷᠤᠭᠤᠯᠵᠠᠢ᠃ ᠲᠡᠭᠡᠭᠡᠳ ᠠᠶᠢᠯ ᠠᠶᠢᠮᠠᠭ ᠤᠨ ᠬᠢᠨ ᠰᠠᠨᠠᠭ᠎ᠠ ᠰᠠᠶᠢᠳᠠᠢ ᠬᠦᠮᠦᠰ ᠬᠦᠷᠦᠯᠴᠡᠨ ᠢᠷᠡᠵᠦ᠂ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠠᠪᠤᠭᠰᠠᠨ ᠤ ᠰᠠᠶᠢᠨ ᠢᠶᠠᠷ ᠡᠵᠢ ᠶᠢᠨ ᠮᠢᠨᠢ ᠬᠤᠭᠤᠯᠠᠢ   ᠳᠤ ᠬᠠᠳᠬᠤᠵᠤ ᠤᠷᠤᠭᠰᠠᠨ ᠤᠶᠤᠳᠠᠯ ᠤᠨ ᠵᠡᠭᠦᠤ ᠶᠢ ᠠᠪᠴᠤ ᠭᠠᠷᠭᠠᠵᠠᠢ᠃                           ᠲᠤᠬᠠᠢ ᠶᠢᠨ ᠦᠶᠡᠰ ᠪᠢ ᠨᠠᠰᠤ  ᠪᠠᠭ᠎ᠠ ᠴᠢᠰᠤ ᠰᠢᠩᠭᠡᠨ ᠪᠠᠶᠢᠭᠰᠠᠨ ᠪᠤᠯᠬᠤᠷ  ᠢᠶᠠᠨ ᠨᠠᠷᠢᠨ ᠶᠠᠪᠤᠴᠠ ᠶᠢ ᠲᠤᠳᠤᠷᠬᠠᠢ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ ᠲᠡᠷᠡᠬᠦ ᠵᠡᠬᠦᠤ ᠶᠢ ᠡᠵᠢ ᠶᠢᠨ ᠮᠢᠨᠢ ᠬᠤᠭᠤᠯᠠᠢ ᠠᠴᠠ ᠨᠢ ᠠᠪᠬᠤ ᠦᠶᠡᠰ ᠲᠤ ᠬᠦᠭᠡᠷᠦᠬᠦᠢ ᠡᠵᠢ ᠶᠢᠨ ᠮᠢᠨᠢ ᠬᠤᠭᠤᠯᠠᠢ ᠠᠴᠠ ᠲᠤᠩ ᠶᠡᠭᠡ ᠴᠢᠰᠤ ᠭᠠᠷᠴᠤ ᠡᠵᠢ ᠶᠢᠨ ᠪᠠᠶ᠎ᠠ ᠰᠦᠷᠡᠬᠡᠢ ᠶᠡᠭᠡ ᠵᠤᠪᠠᠵᠤ ᠪᠠᠶᠢᠭᠰᠠᠨ ᠪᠠᠶᠢᠳᠠᠯ ᠢ ᠤᠳᠤ ᠳᠤ ᠲᠤᠯᠳᠠᠯ᠎ᠠ ᠲᠤᠪ ᠲᠤᠳᠤᠷᠬᠠᠢ ᠴᠡᠭᠡᠵᠢᠯᠡᠭᠰᠡᠭᠡᠷ ᠪᠠᠶᠢᠭ᠎ᠠ ᠶᠤᠮ᠃                          ᠦᠨᠦ ᠪᠢ ᠪᠤᠭᠤᠷᠤᠯ ᠡᠵᠢ ᠶᠢᠨ ᠢᠶᠠᠨ ᠲᠡᠳᠡᠭᠡᠷ ᠤᠯᠠᠨ ᠭᠠᠰᠢᠭᠤᠨ ᠭᠤᠰᠢᠭᠤᠨ ᠠᠮᠢᠳᠤᠷᠠᠯ ᠤᠶᠢᠯᠡᠰ ᠤᠨ ᠰᠠᠭᠠᠳ ᠬᠠᠷᠰᠢ ᠶᠢ ᠲᠤᠭᠤᠯᠵᠤ ᠶᠠᠪᠤᠭᠰᠠᠨ ᠦᠩᠭᠡᠷᠡᠯᠳᠡ ᠶᠢ ᠨᠢ ᠨᠢᠭᠡᠳ ᠨᠢᠭᠡ ᠪᠠᠷ ᠡᠷᠭᠢᠴᠡᠭᠦᠯᠦᠨ ᠪᠤᠳᠤᠬᠤ ᠪᠦᠷᠢ ᠦᠪᠡᠷ ᠤᠨ ᠡᠷᠬᠡ ᠦᠭᠡᠢ ᠰᠡᠳᠭᠢᠯ ᠡᠪᠬᠡᠷᠡᠵᠦ ᠵᠢᠷᠦᠬᠡ ᠰᠢᠮᠰᠢᠷᠡᠵᠦ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠮᠢᠨᠢ ᠬᠤᠷ᠎ᠠ ᠲᠠᠢ ᠵᠢᠯ ᠤᠨ ᠭᠤᠷᠤᠬ᠎ᠠ ᠰᠢᠬ ᠬᠠᠮᠠᠷ ᠢ ᠬᠠᠪᠴᠢᠨ ᠪᠦᠮᠪᠦᠷᠢᠭᠡᠳ ᠪᠠᠶᠢᠳᠠᠭ ᠪᠢᠯᠡ᠃                                ᠠᠢ᠂ ᠬᠦᠭᠡᠷᠦᠬᠦᠢ᠂᠂᠂᠂                               ᠬᠦᠮᠦᠨ ᠤ ᠨᠢᠭᠡ ᠨᠠᠰᠤᠨ ᠳᠤ ᠶᠠᠮᠠᠷ ᠤᠴᠢᠷ ᠶᠠᠪᠤᠳᠠᠯ ᠲᠤᠬᠢᠶᠠᠯᠳᠤᠵᠤ᠂ ᠬᠡᠵᠢᠶ᠎ᠡ ᠠᠯᠢ ᠨᠢᠭᠡᠨ ᠡᠳᠦᠷ᠂ ᠬᠡᠨ ᠨᠢ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠶᠢ ᠬᠡᠨ ᠴᠦ ᠪᠤᠳᠤᠵᠤ ᠮᠡᠳᠡᠬᠦ ᠦᠭᠡᠢ ᠠᠵᠠᠢ᠃                            ᠬᠦᠮᠦᠨ ᠤ ᠠᠮᠢᠳᠤᠷᠠᠯ ᠭᠡᠵᠦ ᠶᠠᠭ ᠲᠡᠷᠡᠬᠦ ᠲᠤᠪᠤ ᠲᠤᠯᠤᠭᠠᠳ ᠤᠨ ᠢᠶᠠᠨ ᠡᠩᠭᠡᠷ ᠪᠡᠯ ᠢᠶᠠᠷ ᠮᠤᠷᠤᠶᠢᠯᠵᠠᠨ ᠰᠤᠨᠤᠯᠵᠠᠬᠤ ᠴᠤᠪᠤᠭ᠎ᠠ ᠵᠦᠷᠢᠭ ᠲᠠᠢ ᠪᠠᠨ ᠠᠳᠠᠯᠢᠬᠠᠨ ᠢᠶᠠᠷ ᠦᠭᠰᠦᠨ ᠤᠷᠤᠭᠤᠳᠠᠵᠤ᠂ ᠲᠡᠷᠭᠡᠨ ᠤ ᠬᠦᠷᠳᠦ ᠰᠢᠭ ᠲᠡᠭᠡᠷ᠎ᠡ ᠲᠤᠣᠷ᠎ᠠ ᠤᠷᠤᠨ᠎ᠠ ᠭᠡᠳᠡᠭ ᠨᠢ ᠡᠭᠦᠨ ᠢ ᠯᠠ ᠬᠡᠯᠡᠳᠡᠭ ᠪᠠᠶᠢᠬ᠎ᠠ⁈                             ᠡᠵᠢ ᠮᠢᠨᠢ ᠦᠷ᠎ᠡ ᠪᠠᠨ ᠭᠡᠪᠡᠯ ᠦᠨᠦᠴᠢᠨ ᠡᠯᠢᠭᠡ ᠨᠢ ᠦᠨᠳᠡᠯᠵᠡᠭᠡᠳ ᠢᠷᠡᠳᠡᠭ ᠦᠷᠦᠪᠴᠢ ᠰᠡᠳᠭᠢᠯ ᠲᠠᠢ ᠬᠦᠮᠦᠨ ᠶᠤᠮ᠃ ᠮᠠᠨᠤᠰ ᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠡᠵᠢ ᠮᠢᠨᠢ ᠦᠪᠡᠷ ᠢᠶᠠᠨ  ᠪᠤᠳᠠᠳᠤ ᠠᠮᠢᠳᠤᠷᠠᠯ ᠠᠴᠠ ᠪᠠᠨ ᠰᠡᠳᠦᠪᠴᠢᠯᠡᠵᠦ ᠮᠠᠨᠤᠰ ᠲᠤ ᠤᠯᠠᠨ ᠠᠷᠪᠢᠨ ᠠᠮᠢᠳᠤᠷᠠᠬᠤᠢ ᠶᠢᠨ ᠤᠴᠢᠷ ᠶᠤᠰᠤ ᠶᠢ ᠲᠠᠨᠢᠭᠤᠯᠵᠤ ᠬᠦᠮᠦᠨ ᠠᠮᠢᠳᠤᠷᠠᠯ ᠤᠨ ᠬᠠᠷᠭᠤᠢ ᠳᠤ ᠬᠦᠯ ᠤᠨ ᠤᠯᠠ ᠲᠠᠮᠠᠭᠠᠯᠠᠨ ᠶᠠᠪᠤᠬᠤ ᠳᠤ ᠮᠢᠨᠢ ᠵᠦᠭᠯᠡᠭᠦᠷ ᠴᠢᠭᠯᠡᠯ ᠪᠤᠯᠵᠤ ᠪᠠᠶᠢᠵᠠᠢ᠃                              ᠠᠶᠢᠯ ᠬᠤᠳᠠᠨ ᠳᠤ ᠭᠡᠶᠢᠴᠢᠨ ᠵᠤᠴᠢᠨ ᠮᠤᠷᠢᠯᠠᠵᠤ ᠪᠠᠭᠤᠪᠠᠯ᠄  ︿︿ᠰᠠᠶᠢᠨ ᠦᠦ  ︕ ᠮᠡᠨᠳᠦ  ᠦᠦ︕  ﹀﹀ ᠭᠡᠵᠦ ᠠᠰᠠᠭᠤᠨ ᠵᠤᠯᠭᠠᠵᠤ᠂ ᠭᠡᠷ ᠵᠠᠭᠤᠷ᠎ᠠ ᠶᠢᠨ ᠠᠷᠰᠠᠷ ᠠᠵᠢᠯ ᠢ ᠬᠢᠬᠦ᠂ ᠠᠬᠠᠮᠠᠳ ᠲᠤᠮᠤᠭᠠᠳᠠᠳ ᠢᠶᠠᠨ ᠬᠤᠭᠤᠯᠠ ᠶᠢᠨ ᠰᠢᠷᠡᠭᠡᠨ ᠳᠤ ᠤᠷᠢᠳᠴᠢᠯᠠᠨ ᠵᠠᠯᠠᠵᠤ᠂ ᠬᠤᠭᠤᠯᠠ ᠤᠮᠳᠠᠭᠠᠨ ᠢ ᠨᠢ ᠤᠶᠢᠷᠠᠳᠤᠭᠤᠯᠵᠤ ᠦᠭᠬᠦ᠂ ᠬᠤᠭᠤᠯᠠ ᠶᠢᠨ ᠰᠢᠷᠡᠭᠡᠨ ᠳᠤ ᠰᠠᠭᠤᠬᠤ ᠳᠤ  ᠨᠠᠮ ᠵᠢᠮ ᠪᠠᠶᠢᠵᠤ᠂ ᠬᠦᠯ ᠭᠠᠷ ᠢᠶᠠᠨ ᠰᠠᠵᠢᠯᠠᠵᠤ ᠰᠠᠪᠠᠯᠠᠬᠤ ᠦᠭᠡᠢ᠂ ᠰᠠᠨᠠᠭ᠎ᠠ ᠰᠡᠭᠦᠷᠡᠰᠦ ᠠᠯᠳᠠᠬᠤ ᠦᠭᠡᠢ᠂ ᠲᠠᠭᠤᠣ ᠲᠠᠭᠤᠯᠠᠬᠤ ᠪᠤᠶᠤ ᠭᠡᠮᠬᠡᠷᠡᠵᠦ ᠭᠡᠩᠰᠢᠬᠦ ᠦᠭᠡᠢ᠂ ᠪᠤᠳᠠᠭ᠎ᠠ ᠨᠤᠭᠤᠭ᠎ᠠ ᠶᠢ ᠡᠷᠦᠢ ᠬᠤᠷᠤᠢ ᠦᠭᠡᠢ ᠤᠷᠭᠢᠭᠳᠠᠭᠤᠯᠵᠤ ᠪᠤᠯᠬᠤ ᠦᠭᠡᠢ᠂ ᠪᠤᠰᠤᠳ ᠲᠠᠢ ᠬᠠᠷᠢᠯᠴᠠᠬᠤ ᠳᠠᠭᠠᠨ ᠯᠡᠪᠳᠡᠭᠤᠨ ᠲᠤᠭᠳᠠᠭᠤᠨ ᠶᠠᠭᠠᠷᠠᠵᠤ ᠰᠠᠨᠳᠤᠷᠬᠤ ᠦᠭᠡᠢ ᠪᠠᠶᠢᠵᠤ᠂ ᠪᠤᠰᠤᠳ ᠲᠤ ᠶᠤᠰᠤᠷᠬᠠᠭ  ᠢᠶᠠᠷ ᠬᠠᠨᠳᠤᠵᠤ ᠬᠦᠮᠦᠰ ᠤᠨ ᠦᠭᠡᠳᠡ ᠠᠴᠠ ᠲᠡᠭᠰᠢᠬᠡᠨ ᠬᠠᠷᠠᠵᠤ᠂ ᠤᠴᠢᠷ ᠶᠠᠪᠤᠳᠠᠯ ᠢᠶᠠᠨ ᠲᠤᠳᠤ ᠤᠶᠢᠯᠠᠭᠠᠮᠵᠢᠳᠠᠢ ᠢᠯᠡᠳᠭᠡᠬᠦ ᠪᠡᠶ᠎ᠡ ᠳᠡᠭᠡᠨ ᠢᠳᠡᠭᠡᠯ ᠲᠠᠢ᠂ ᠪᠤᠰᠤᠳ ᠲᠤ ᠢᠳᠡᠭᠡᠮᠵᠢᠳᠡᠢ ᠶᠠᠪᠤᠬᠤ ᠮᠡᠳᠦ ᠶᠢᠨ ᠠᠮᠢᠳᠤᠷᠠᠯ ᠤᠶᠢᠯᠡᠰ ᠤᠨ ᠲᠤᠮᠳᠠᠬᠢ ᠡᠩ ᠵᠢᠷ ᠤᠨ ᠤᠴᠢᠷ ᠶᠠᠪᠤᠳᠠᠯ ᠢ ᠬᠦᠢᠴᠡᠳᠭᠡᠵᠦ ᠬᠢᠬᠦ ᠠᠴᠠ ᠡᠬᠢᠯᠡᠵᠦ᠂ ᠮᠠᠨᠤᠰ ᠲᠤ ᠨᠠᠷᠢᠨ ᠬᠢᠨᠠᠮᠠᠭᠠᠢ ᠵᠢᠭᠠᠨ ᠰᠤᠷᠭᠠᠵᠤ᠂ ᠦᠷ᠎ᠡ ᠬᠡᠦᠬᠡᠳ ᠮᠠᠨᠤᠰ ᠢ   ᠪᠠᠨ ᠪᠤᠯᠪᠠᠰᠤᠨ ᠰᠠᠶᠢᠬᠠᠨ ᠬᠡᠪ ᠰᠤᠷᠳᠠᠯ ᠲᠠᠢ᠂ ᠶᠤᠰᠤ ᠭᠤᠷᠢᠮ ᠲᠠᠢ ᠬᠦᠮᠦᠨ  ᠪᠤᠯᠭᠠᠬᠤ ᠪᠠᠷ ᠵᠢᠭᠠᠵᠤ ᠰᠤᠷᠭᠠᠳᠠᠭ ᠪᠠᠶᠢᠭᠰᠠᠨ᠃                                 ᠡᠵᠢ ᠮᠢᠨᠢ ᠰᠤᠶᠤᠯ ᠮᠡᠳᠡᠯᠭᠡ ᠶᠢ ᠬᠠᠮᠤᠭ ᠠᠴᠠ ᠢᠯᠡᠭᠦᠤ ᠡᠷᠬᠢᠮᠯᠡᠳᠡᠭ ᠬᠠᠷᠠᠯᠳᠠ ᠵᠤᠷᠢᠯᠳᠠ ᠲᠠᠢ ᠬᠦᠮᠦᠨ ᠪᠠᠶᠢᠵᠠᠢ᠃                             ᠪᠢ ᠠᠷᠠᠳ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠠᠯᠳᠠᠨ ᠪᠤᠱᠤᠭ᠎ᠠ ᠶᠢ ᠠᠩᠬ᠎ᠠ ᠠᠯᠬᠤᠨ ᠤᠷᠤᠭᠰᠠᠨ ᠠᠩᠬᠠᠨ ᠤ ᠡᠳᠦᠷ ᠠᠴᠠ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠢ ᠬᠦᠷᠳᠡᠬᠦ ᠠᠴᠠ ᠭᠠᠳᠠᠭᠤᠷ ᠪᠠᠰᠠ ᠤᠯᠠᠨ ᠰᠠᠶᠢᠬᠠᠨ ᠵᠢᠷᠤᠭᠳᠤ ᠦᠯᠢᠭᠡᠷ ᠤᠨ ᠨᠤᠮ ᠦᠵᠡᠵᠦ ᠰᠤᠨᠢᠷᠬᠠᠬᠤ ᠪᠤᠶᠤ ᠤᠩᠰᠢᠬᠤ ᠲᠤᠷ᠎ᠠ ᠪᠠᠬ᠎ᠠ ᠲᠠᠢ ᠪᠠᠶᠢᠳᠠᠭ ᠶᠤᠮ᠃  ᠮᠢᠨᠦ ᠡᠵᠢ ᠬᠠᠷᠮᠠᠨ ᠳᠠᠬᠢ ᠲᠤᠭ᠎ᠠ ᠲᠠᠢ ᠬᠡᠳᠦᠨ ᠵᠤᠭᠤᠰ  ᠵᠤᠭ᠎ᠠ ᠪᠠᠨ ᠨᠠᠳᠠᠳᠤ ᠳᠤ ᠭᠠᠷᠳᠠᠭᠤᠯᠬᠤ ᠳᠤ ᠨᠢ ᠪᠢ ᠦᠷᠭᠦᠯᠵᠢ ᠤᠶᠢᠷ᠎ᠠ ᠤᠷᠴᠢᠮ ᠤᠨ ᠬᠤᠷᠰᠢᠶ᠎ᠠ ᠲᠡᠯᠭᠡᠭᠦᠷ ᠲᠤ ᠬᠦᠶᠦᠨ ᠬᠦᠷᠴᠤ ᠦᠪᠡᠷ ᠤᠨ ᠬᠠᠮᠤᠭ ᠲᠤᠷ᠎ᠠ ᠰᠤᠨᠢᠷᠬᠠᠯ ᠲᠠᠢ ᠵᠢᠷᠤᠭᠳᠤ ᠦᠯᠢᠭᠡᠷ ᠤᠨ ᠨᠤᠮ ᠤᠳ ᠢ ᠠᠪᠴᠤ ᠨᠢᠭᠡᠳ ᠨᠢᠭᠡ   ᠪᠠᠷ ᠠᠮᠳᠠᠷᠬᠠᠨ ᠤᠩᠰᠢᠳᠠᠭ ᠪᠠᠶᠢᠵᠠᠢ᠃                                     ᠲᠤᠬᠠᠢ ᠶᠢᠨ ᠦᠶᠡᠰ ᠲᠤ ᠪᠢ ᠬᠦᠭᠡᠷᠦᠬᠦᠢ  ᠡᠵᠢ ᠶᠢᠨ ᠠᠴᠢ ᠪᠠᠷ ᠪᠤᠰᠤᠳ ᠠᠶᠢᠯ ᠤᠨ ᠬᠡᠦᠬᠡᠳ ᠤᠳ ᠤᠯᠵᠤ ᠤᠩᠰᠢᠬᠤ ᠪᠠᠶᠢᠳᠤᠭᠠᠢ ᠤᠯᠵᠤ ᠦᠵᠡᠭᠡ ᠦᠭᠡᠢ᠂ ︿︿ ᠳ᠋ᠦᠩ ᠭᠦᠸᠧ ᠰᠢᠶᠠᠨᠱᠧᠩ﹀﹀᠂ ︿︿ᠡᠮᠦᠨᠡᠰᠢ ᠪᠠᠶᠢᠯᠳᠤᠨ ᠤᠮᠠᠷᠠᠰᠢ ᠲᠠᠶᠢᠯᠠᠭᠰᠠᠨ ᠨᠢ﹀﹀᠂ ︿︿ᠨᠠᠷᠠ ᠲᠤᠯᠠᠶᠢᠭᠰᠠᠨ ᠡᠳᠦᠷ﹀﹀᠂ ︿︿ᠪᠢᠴᠢᠬᠠᠨ ᠴᠡᠷᠢᠭ ᠵᠠᠩᠭ᠎ᠠ﹀﹀᠂ ︿︿ᠦᠳᠦᠳᠦ ᠵᠠᠬᠢᠳᠠᠯ﹀﹀ ᠭᠡᠬᠦ ᠮᠡᠳᠦ ᠶᠢᠨ ᠠᠯᠢ ᠤᠯᠠᠨ ᠰᠤᠨᠢᠷᠬᠠᠯᠳᠠᠢ ᠵᠢᠷᠤᠭᠳᠤ ᠦᠯᠢᠭᠡᠷ ᠤᠨ ᠨᠤᠮ ᠤᠳ ᠢ ᠤᠪᠤᠭ᠎ᠠ ᠲᠤᠪᠤᠭ᠎ᠠ ᠪᠠᠷ ᠠᠪᠴᠤ ᠤᠩᠰᠢᠵᠤ ᠪᠠᠶᠢᠭᠰᠠᠨ ᠶᠤᠮ ᠃                        ᠡᠵᠢ ᠮᠢᠨᠢ ᠬᠠᠶᠠ ᠪᠠᠰᠠ ᠮᠠᠨᠤᠰ ᠢ ᠠᠩᠭᠠᠬᠠᠢ ᠲᠡᠭᠳᠡᠭᠡᠭᠡᠢ ᠰᠢᠭ ᠪᠡᠶ᠎ᠡ ᠪᠠᠨ ᠲᠤᠭᠤᠷᠢᠭᠤᠯᠤᠨ ᠰᠠᠭᠤᠯᠭᠠᠵᠤ᠄ ︿︿᠂᠂᠂᠂ ᠬᠡᠴᠢᠨᠡᠨ ᠵᠢᠯ ᠤᠨ ᠲᠠᠷᠠᠭ᠎ᠠ ᠲᠤᠬᠤᠢ ᠢ ᠴᠢᠨᠡᠭᠡ ᠬᠦᠮᠦᠨ᠂ ᠲᠠᠦᠯᠠᠢ  ᠶᠢᠨ ᠴᠢᠨᠡᠬᠡᠨ ᠮᠤᠷᠢ ᠶᠢᠷᠳᠢᠨᠴᠤ ᠲᠡᠯᠡᠬᠡᠢ ᠳᠤ ᠪᠤᠢ ᠪᠤᠯᠤᠨ᠎ᠠ᠂᠂᠂᠂﹀﹀᠂ ︿︿᠂᠂᠂᠂ ᠤᠯᠠᠭᠠᠨ ᠨᠤᠭᠤᠭᠠᠨ ᠪᠤᠳᠤᠭ ᠢᠶᠠᠷ ᠦᠰᠦ ᠲᠤᠯᠤᠭᠠᠢ ᠪᠠᠨ ᠪᠤᠳᠤᠵᠤ᠂ ᠦᠷᠪᠦᠶᠢᠵᠦ ᠰᠡᠭᠰᠡᠶᠢᠭᠰᠡᠨ ᠭᠡᠵᠢᠭᠡ ᠦᠰᠦ ᠲᠠᠢ ᠬᠡᠦᠬᠡᠨᠴᠤᠳ᠂᠂ ᠂᠂﹀﹀᠂ ︿︿᠂᠂᠂᠂ ᠬᠤᠵᠢᠮ ᠤᠨ ᠡᠳᠦᠷ ᠴᠠᠬᠢᠯᠭᠠᠨ ᠤᠳᠠᠰᠤ ᠠᠭᠠᠯᠵᠢᠨ ᠲᠤᠣᠷ ᠰᠢᠬ ᠲᠡᠯᠡᠬᠡᠢ ᠶᠢ ᠪᠦᠷᠭᠦᠭᠦ ᠴᠠᠭ ᠭᠠᠷᠤᠨ᠎ᠠ᠂᠂᠂᠂᠂᠂﹀﹀ ᠭᠡᠬᠦ ᠮᠡᠳᠦ ᠶᠢᠨ ᠮᠠᠰᠢ ᠤᠯᠠᠨ ᠰᠤᠨᠢᠨ ᠰᠡᠪᠡᠭᠦᠨ ᠦᠯᠢᠭᠡᠷ ᠲᠤᠮᠤᠭ ᠤᠳ ᠢ ᠠᠮᠢᠳᠤᠯᠢᠭ ᠰᠠᠶᠢᠬᠠᠨ ᠶᠠᠷᠢᠵᠤ ᠦᠭᠳᠡᠭ ᠰᠠᠨ᠃                       ᠤᠳᠤ ᠪᠤᠳᠤᠪᠠᠯ᠂ ᠡᠵᠢ ᠶᠢᠨ ᠮᠢᠨᠢ ᠮᠠᠨᠤᠰ ᠲᠤ ᠶᠠᠷᠢᠵᠤ ᠦᠩᠭᠡᠷᠡᠭᠰᠡᠨ ᠲᠡᠳᠡᠭᠡᠷ ᠦᠯᠢᠭᠡᠷ ᠲᠤᠮᠤᠭ ᠤᠳ ᠨᠢ᠂ ᠬᠡᠳᠦᠶᠢᠪᠡᠷ ᠬᠡᠳᠦᠨ ᠠᠷᠪᠠᠨ ᠵᠢᠯ ‍ᠣᠨ‌ᠡᠮᠦᠨᠡᠬᠢ ᠦᠩᠭᠡᠷᠡᠭᠡᠵᠦ ᠤᠳᠤᠭᠰᠠᠨ ᠶᠠᠪᠤᠳᠠᠯ ᠲᠡᠳᠦᠢ ᠪᠤᠯᠪᠠᠴᠤ᠂ ᠲᠡᠳᠡᠭᠡᠷ ᠦᠯᠢᠭᠡᠷ ᠲᠤᠮᠤᠭ ᠲᠤ ᠭᠠᠷᠳᠠᠭ ᠬᠠᠴᠢᠨ ᠰᠤᠨᠢᠷᠬᠠᠯᠳᠠᠢ ᠦᠵᠡᠭᠳᠯ ᠪᠤᠯᠤᠨ ᠰᠤᠨᠢᠨ ᠰᠡᠪᠡᠭᠦᠨ ᠶᠠᠪᠤᠳᠠᠯ   ᠤᠳ ᠨᠢ ᠨᠢᠭᠡᠳ ᠨᠢᠬᠡ ᠪᠠᠷ ᠢᠶᠠᠨ ᠨᠢᠳᠦᠨ ᠳᠤ ᠦᠵᠡᠭᠳᠡᠮ᠎ᠡ᠂ ᠭᠠᠷ ᠲᠤ ᠪᠠᠷᠢᠭᠳᠠᠮ᠎ᠠ ᠤᠳᠤ ᠦᠶ᠎ᠡ ᠶᠢᠨ ᠠᠮᠢᠳᠤᠷᠠᠯ ᠠᠬᠤᠢ ᠶᠢᠨ ᠪᠤᠳᠠᠳᠤ ᠵᠢᠷᠤᠭ ᠲᠦᠷᠰᠦᠯᠡᠯ ᠪᠤᠯᠬᠤ ᠠᠵᠠᠢ᠃                     ᠡᠵᠢ ᠮᠢᠨᠢ ᠮᠠᠨᠤᠰ ᠢ ᠬᠤᠯᠠ ᠭᠠᠵᠠᠷ ᠢᠶᠠᠷ ᠪᠢᠴᠢᠭ ᠰᠤᠶᠤᠯ ᠰᠤᠷᠤᠯᠴᠠᠵᠤ ᠶᠠᠪᠤᠭ᠎ᠠ ᠦᠶᠡᠰ ᠡᠪᠦᠯ ᠵᠤᠨ ᠤ ᠠᠮᠠᠷᠠᠯᠳᠠ ᠶᠢᠨ  ᠬᠤᠭᠤᠴᠠᠭ᠎ᠠ ᠪᠤᠯᠬᠤ ᠲᠦᠬᠦᠭᠰᠡᠭᠡᠷ ᠯᠠ ᠮᠠᠨᠤᠰ ᠠᠴᠠ ᠢᠯᠡᠭᠦᠤ ᠬᠦᠭᠰᠡᠵᠦ ᠬᠦᠯ ᠨᠢ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠪᠠᠶᠠᠷᠯᠠᠵᠤ ᠭᠠᠷᠳᠠᠭ ᠰᠠᠨ᠃                         ᠮᠠᠨᠤᠰ ᠢ ᠲᠦᠩᠭᠡᠵᠢ ᠯᠠ ᠡᠪᠦᠯ ᠵᠤᠨ ᠤ ᠠᠮᠠᠷᠠᠯᠳᠠ ᠶᠢᠨ ᠴᠢᠯᠦᠭᠡ ᠲᠠᠯᠪᠢᠵᠤ ᠭᠡᠷ  ᠲᠡᠭᠡᠨ ᠬᠠᠷᠢᠬᠤᠯᠠᠷ ᠡᠵᠢ ᠮᠢᠨᠢ ᠬᠡᠳᠦᠶᠢᠨ  ᠠᠯᠤᠰ ᠬᠤᠯᠠ ᠠᠴᠠ ᠲᠤᠰᠤᠨ ᠠᠪᠴᠤ ᠮᠠᠩᠨᠠᠢ ᠲᠡᠭᠡᠷ᠎ᠡ ᠦᠨᠦᠰᠴᠤ ᠲᠠᠭᠠᠯᠠᠵᠤ ᠭᠠᠷᠳᠠᠭ ᠰᠠᠨ᠃ ᠲᠡᠭᠡᠭᠡᠳ ᠲᠦᠩᠭᠡᠵᠢ ᠯᠠ ᠡᠷᠦᠬᠡ ᠭᠡᠷ ᠤᠨ ᠢᠶᠠᠨ  ᠡᠭᠦᠳᠡᠨ ᠪᠤᠱᠤᠭ᠎ᠠ ᠶᠢ ᠠᠯᠬᠤᠨ ᠤᠷᠤᠬᠤ ᠲᠠᠢ ᠵᠡᠷᠭᠡ ᠬᠤᠨᠢ ᠦᠬᠡᠷ ᠤᠨ ᠮᠢᠬ᠎ᠠ᠂ ᠬᠤᠷᠤᠳ᠂ ᠰᠢᠷ᠎ᠠ ᠲᠤᠰᠤ᠂᠂᠂᠂ ᠵᠡᠷᠭᠡ ᠠᠮᠳᠠᠳᠤ ᠢᠳᠡᠭᠡᠨ ᠢ ᠲᠦᠭᠦᠷᠡᠩ ᠦᠷᠦᠵᠦ ᠦᠳᠭᠡᠨ ᠰᠠᠶᠢᠬᠠᠨ ᠦᠨᠦᠷ ᠠᠮᠳᠠ ᠨᠢ ᠬᠠᠩᠬᠤᠯᠤᠭᠰᠠ ᠰᠦ ᠲᠠᠢ ᠴᠠᠢ ᠪᠠᠨ ᠠᠶᠠᠭᠠᠯᠠᠨ ᠦᠭᠴᠦ ᠦᠷ᠎ᠡ ᠬᠡᠦᠬᠡᠳ ᠮᠠᠨᠤᠰ ᠢ ᠪᠠᠨ ᠬᠦᠯᠦᠷᠡᠳᠡᠯ᠎ᠡ   ᠪᠠᠨ ᠤᠣᠭᠤᠯᠭᠠᠨ᠂ ᠬᠤᠳᠤᠭᠤᠳᠤ ᠭᠡᠳᠡᠰᠦ ᠶᠢ ᠮᠢᠨᠢ ᠲᠠᠨᠡᠶᠢᠳᠡᠯ᠎ᠡ ᠪᠠᠨ ᠴᠠᠳᠬᠠᠵᠤ᠂ ᠤᠳᠠᠭᠠᠨ ᠡᠳᠦᠷ ᠵᠤᠵᠠᠭᠠᠨ ᠬᠤᠨᠤᠭ ᠢᠶᠠᠷ ᠬᠦᠮᠦᠨ ᠤ ᠭᠠᠵᠠᠷ ᠬᠦᠨᠳᠡᠯᠡᠨ ᠨᠤᠳᠤᠭ  ᠢᠶᠠᠷ ᠶᠠᠪᠤᠭᠰᠠᠨ ᠬᠡᠳᠡᠰᠦᠨ ᠤ ᠮᠢᠨᠢ ᠬᠤᠷᠤᠬᠠᠢ ᠶᠢ ᠬᠠᠭ᠎ᠠ ᠲᠡᠯᠪᠡ ᠪᠠᠶᠠᠷᠯᠠᠭᠤᠯᠵᠤ ᠭᠠᠷᠳᠠᠭ ᠪᠠᠶᠢᠵᠠᠢ᠃                            ᠲᠡᠷᠡᠬᠦ ᠦᠶ᠎ᠡ ᠠᠴᠠ ᠡᠬᠢᠯᠡᠵᠦ  ᠪᠢ ᠡᠵᠢ ᠶᠢᠨ ᠢᠶᠠᠨ ᠴᠢᠨᠠᠭᠰᠠᠨ ᠴᠠᠢ᠂ ᠬᠤᠭᠤᠯᠠ ᠤᠮᠳᠠ ᠶᠢ ᠶᠢᠷᠳᠢᠨᠴᠤ ᠲᠡᠭᠡᠷ᠎ᠡ ᠬᠠᠮᠤᠭ ᠤᠨ ᠠᠮᠳᠠᠳᠠᠢ ᠬᠤᠭᠤᠯᠠ ᠭᠡᠵᠦ ᠮᠡᠳᠡᠷᠡᠵᠦ ᠨᠡᠩ ᠴᠢᠨᠠᠭᠰᠢᠯᠠᠨ ︿︿ᠮᠠᠭᠤ ᠪᠤᠯᠪᠠᠴᠤ ᠭᠡᠷ ᠲᠠᠢ ᠰᠠᠶᠢᠬᠠᠨ᠂ ᠮᠠᠶᠢᠵᠢᠭ ᠪᠤᠯᠪᠠᠴᠤ ᠡᠵᠢ ᠲᠠᠢ ᠰᠠᠶᠢᠬᠠᠨ﹀﹀ ᠭᠡᠳᠡᠭ ᠦᠭᠡ ᠶᠢᠨ ᠬᠦᠨ ᠲᠠᠯᠳᠠ ᠤᠳᠬ᠎ᠠ ᠶᠢ ᠦᠨᠡᠨᠬᠦ ᠤᠶᠢᠯᠠᠭᠠᠵᠤ  ᠮᠡᠳᠡᠭᠰᠡᠨ ᠰᠠᠨ᠃                            ᠮᠢᠨᠦ ᠡᠵᠢ ᠪᠤᠯ ᠪᠤᠷᠬᠠᠨ ᠰᠡᠳᠭᠢᠯ ᠲᠠᠢ  ᠬᠦᠮᠦᠨ ᠶᠤᠮ᠂ ᠲᠡᠷᠡ ᠠᠶᠢᠯ ᠰᠠᠭᠠᠬᠠᠯᠳᠠ ᠶᠢᠨ ᠬᠢ ᠳᠠᠭᠠᠨ ᠶᠠᠪᠤᠳᠠᠯ ᠤᠴᠢᠷ ᠲᠤᠬᠢᠶᠠᠯᠳᠤᠬᠤ ᠪᠦᠷᠢ ᠶᠡᠷᠦ ᠬᠤᠴᠤᠷᠳᠠᠭ ᠦᠭᠡᠢ ᠭᠠᠷ ᠰᠤᠩᠭᠠᠨ  ᠲᠡᠮᠵᠢᠵᠦ ᠲᠤᠰᠠᠯᠠᠳᠠᠭ ᠪᠠᠶᠢᠭᠰᠠᠨ ᠰᠠᠨ᠃                             ᠬᠦᠭᠡᠷᠦᠬᠦᠢ ᠡᠵᠢ ᠮᠢᠨᠢ ᠨᠦᠬᠦᠷ ᠪᠢᠳᠡ ᠬᠤᠶᠠᠷ ᠤᠨ ᠠᠵᠤ ᠠᠮᠢᠳᠤᠷᠠᠯ ᠤᠨ ᠶᠠᠭᠠᠷᠡᠦ ᠪᠠᠶᠢᠳᠠᠯ ᠳᠤ ᠬᠤᠶᠠᠷ ᠬᠡᠦᠬᠡᠳ ᠢ ᠬᠠᠷᠠᠭᠠᠯᠵᠠᠨ ᠬᠠᠯᠠᠭᠤᠨ ᠬᠦᠢᠳᠡᠨ ᠢ ᠨᠢ ᠲᠡᠭᠰᠢᠯᠡᠨ᠂ ᠢᠳᠡᠵᠦ ᠡᠮᠦᠰᠬᠦ  ᠶᠢ ᠨᠢ ᠲᠤᠬᠢᠷᠠᠭᠤᠯᠵᠦ ᠶᠠᠪᠤᠭᠰᠠᠨ᠂ ᠡᠳᠦᠭᠡ ᠬᠤᠶᠠᠷ ᠬᠦᠤ ᠮᠢᠨᠢ︕ ᠨᠢᠳᠦ ᠢᠷᠮᠡᠬᠦ ᠶᠢᠨ ᠵᠠᠭᠤᠷ᠎ᠠ ᠬᠤᠩᠬᠤᠨ  ᠳᠠᠭᠠᠨ ᠲᠤᠯᠵᠤ ᠡᠭᠦᠳᠡ ᠡᠷᠦᠭᠡ ᠪᠠᠶᠢᠭᠤᠯᠵᠤ ᠬᠡᠶᠢᠮᠤᠷᠢ ᠲᠠᠢ ᠶᠠᠪᠤᠭ᠎ᠠ ᠪᠢᠯᠡ᠃                              ᠡᠵᠢ ᠡ᠂ ᠲᠠ ᠪᠤᠯ ᠦᠷ᠎ᠡ ᠬᠡᠦᠬᠡᠳ ᠮᠠᠨᠤᠰ ᠤᠨ ᠢᠶᠠᠨ ᠦᠯᠢᠭᠡᠷ ᠵᠢᠱᠢᠶ᠎ᠡ ᠬᠡᠪ ᠲᠠᠭᠤᠷᠢᠶᠠᠯ᠂ ᠡᠨᠡᠷᠢᠯ ᠬᠠᠶᠢᠷ᠎ᠠ ᠶᠢᠨ ᠮᠢᠨᠢ ᠰᠢᠳᠦᠬᠡᠨ ᠶᠤᠮ᠂ ᠬᠦᠤ ᠴᠢᠨᠢ ᠲᠠᠨ ᠳᠠᠭᠠᠨ ᠬᠢᠵᠠᠭᠠᠷ ᠦᠭᠡᠢ ᠶᠡᠭᠡ ᠬᠠᠶᠢᠷᠠᠳᠠᠢ ᠰᠢᠦ᠃ ᠦᠷ᠎ᠡ ᠬᠤᠶᠢᠴᠢᠰ ᠴᠢᠨᠢ ᠬᠡᠵᠢᠶ᠎ᠡ ᠡᠭᠦᠷᠢᠳᠡ ᠲᠠᠨ ᠢ ᠪᠠᠨ ᠬᠠᠶᠢᠷᠠᠯᠠᠵᠤ ᠶᠠᠪᠤᠨ᠎ᠠ ᠰᠢᠦ ᠳ᠋ᠠ᠂᠂᠂᠂ ᠬᠦᠭᠡᠷᠦᠬᠦᠢ ᠮᠢᠨᠦ ᠡᠵᠢ ᠮᠢᠨᠢ ᠤᠷᠳᠤ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭᠠᠬᠤ ᠪᠤᠯᠤᠭᠠᠰᠠᠢ᠂᠂᠂᠂ ᠬᠠᠶ᠋ᠢᠭ᠄ ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠤᠨ ᠤᠯᠠᠭᠠᠢ ᠬᠠᠮᠢᠶᠠᠷᠤᠯᠳᠠ ᠶᠢᠨ ᠪᠠᠶᠠᠨᠬᠤᠰᠢᠭᠤ ᠪᠠᠯᠭᠠᠰᠤ᠃ ᠭᠠᠷ ᠤᠳᠠᠰᠤ :13947971006
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠵᠢ ᠮᠢᠨᠢ
ᠠᠰᠢᠲᠠ ᠶᠢᠨ ᠦᠨᠳᠦᠷ ᠠᠭᠤᠯᠠᠰ
ᠨᠡᠭᠦᠳᠡᠯ ᠰᠤᠶᠤᠯ  ᠤᠨ ᠬᠦᠷᠦᠨᠢᠯ
ᠰᠦᠨ ᠲᠠᠯᠠᠢ ᠡᠵᠢ ᠮᠢᠨᠢ
ᠪᠦᠰᠡᠭᠦᠢ ᠬᠦᠮᠦᠨ ᠭᠡᠵᠦ …
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备07002090号