ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ ᠲᠤᠰᠠᠯᠠᠮᠵᠢ
ᠰᠣᠶᠣᠯ ᠡᠷᠳᠡᠨᠢ
ᠰᠦᠯᠵᠢᠶᠡᠨ ᠤ ᠲᠤᠬᠠᠢ
ᠰᠠᠬᠠᠯᠳᠦ ᠡᠪᠦᠭᠡ （1）
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/11/10
 ︵ᠨᠠᠶᠢᠷᠠᠭᠤᠯᠤᠯ︶                        ᠪ᠊᠂ ᠪᠢᠯᠢᠭ        ᠮᠠᠨ ᠤ ᠬᠢᠨ ᠲᠠᠢ ᠬᠤᠭᠤᠷᠤᠨᠳᠤ ᠪᠠᠨ ᠡᠪᠦᠳᠦᠭ ᠴᠢᠨᠡᠭᠡ ᠬᠠᠪᠲᠠᠰᠤᠨ ᠰᠢᠪᠡᠭᠡ ᠪᠠᠷ ᠵᠠᠭᠠᠭᠯᠠᠨ ᠰᠠᠭᠤᠳᠠᠭ ᠨᠢᠭᠡ ᠭᠠᠭᠴᠠ ᠪᠡᠶ᠎ᠡ ᠡᠪᠦᠭᠡᠨ ᠪᠠᠶᠢᠪᠠ᠃ ᠪᠡᠶ᠎ᠡ ᠨᠢ ᠲᠡᠳᠦᠢ ᠦᠨᠳᠦᠷ ᠪᠢᠰᠢ ᠪᠤᠯᠪᠠᠴᠤ ᠮᠦᠷᠦ ᠨᠢ ᠢᠯᠡᠳᠲᠡ ᠥᠷᠭᠡᠨ ᠪᠣᠯᠬᠤᠷ ᠡᠷ᠎ᠡ ᠪᠠᠷ᠎ᠠ ᠭᠤᠶᠢᠳᠠ ᠲᠠᠭᠰᠢᠨ ᠬᠠᠷᠠᠭᠳᠠᠨ᠎ᠠ᠃ ᠡᠪᠦᠭᠡᠨ ᠬᠦᠮᠦᠨ ᠲᠠᠢ ᠦᠭᠡ ᠶᠠᠷᠢᠬᠤ ᠳᠠᠭᠠᠨ ᠵᠡᠭᠦᠨ ᠭᠠᠷ ᠢᠶᠠᠷ ᠢᠶᠠᠨ ᠴᠢᠬᠢ ᠪᠠᠨ ᠬᠤᠮᠤᠶᠢᠯᠭᠠᠨ ᠰᠤᠨᠤᠰᠳᠠᠭ ᠪᠦᠭᠡᠳ ᠬᠡᠵᠢᠶᠡᠳᠡ ᠦᠰᠦ ᠪᠠᠨ ᠬᠢᠯᠠᠶᠢᠲᠠᠯ᠎ᠠ ᠬᠤᠰᠤᠳᠠᠭ ᠪᠠᠶᠢᠭᠠᠳ ᠰᠠᠬᠠᠯ ᠢᠶᠠᠨ ᠬᠠᠷᠢᠨ ᠴᠡᠭᠡᠵᠢᠨ ᠳᠡᠭᠡᠨ ᠲᠤᠯᠲᠠᠯ᠎ᠠ ᠤᠷᠳᠤ ᠲᠠᠯᠪᠢᠵᠤ ᠦᠷᠭᠦᠯᠵᠢ ᠪᠠᠷᠠᠭᠤᠨ ᠭᠠᠷ ᠎ ᠢᠶᠠᠷ ᠢᠶᠠᠨ ᠬᠤᠮᠢᠵᠤ ᠠᠪᠤᠭᠠᠳ ᠠᠶᠠᠷᠬᠠᠨ ᠰᠢᠪᠲᠤᠷᠴᠦ ᠶᠠᠪᠤᠳᠠᠭ ᠪᠤᠯᠬᠤᠷ ᠠᠶᠢᠯ ᠤᠰᠤᠨ ᠤ ᠬᠢᠨ ᠠᠯᠢ ᠬᠡᠳᠦᠶᠢᠨ ᠨᠡᠷ᠎ᠡ ᠵᠢᠯ ᠢ ᠨᠢ ᠮᠠᠷᠳᠠᠭᠰᠠᠨ ᠪᠤᠯᠵᠣ ᠪᠦᠷ ᠯᠡ ᠰᠠᠬᠠᠯᠳᠤ ᠡᠪᠦᠭᠡ ᠬᠡᠮᠡᠨ ᠳᠠᠭᠤᠳᠠᠵᠠᠭᠠᠳᠠᠭ᠃     ᠨᠠᠮᠠᠶᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠲᠡᠷᠡ ᠦᠷᠭᠦᠯᠵᠢ ᠮᠠᠨ ᠤ ᠬᠢᠨ ᠳᠤ ᠢᠷᠡᠵᠦ ᠬᠠᠩᠭᠠᠢ ᠪᠦᠳᠦᠭᠦᠨ ᠲᠠᠭᠤᠨ ᠢᠶᠠᠷ ᠮᠢᠨᠦ ᠡᠪᠦᠭᠡ ᠲᠠᠢ ᠬᠤᠶᠠᠭᠤᠯᠠ ᠬᠠᠯᠠᠭᠤᠨ ᠵᠤᠭᠤᠭ ᠲᠠᠭᠠᠷᠠᠵᠤ ᠰᠠᠭᠤᠳᠠᠭ᠃ ᠵᠠᠷᠢᠮ ᠳᠠᠭᠠᠨ ᠡᠪᠦᠷ ᠠᠴᠠ ᠪᠠᠨ ᠰᠢᠷᠠᠪᠳᠤᠷ ᠪᠤᠭᠤᠳᠠᠯ ᠤᠨ ᠴᠠᠭᠠᠰᠤᠨ ᠳᠤ ᠪᠠᠭᠯᠠᠭᠰᠠᠨ ᠭᠡᠰᠡᠭ ᠲᠠᠢ ᠰᠢᠬᠢᠷ ᠭᠠᠷᠭᠠᠵᠤ ᠦᠭᠳᠡᠭ ᠲᠤᠯᠠ ᠪᠢ ᠰᠠᠬᠠᠯᠳᠦ ᠡᠪᠦᠭᠡ ᠶᠢᠨ ᠢᠷᠡᠬᠦ ᠶᠢ ᠲᠡᠰᠴᠦ ᠶᠠᠳᠠᠨ ᠬᠦᠯᠢᠶᠡᠳᠡᠭ ᠪᠠᠶᠢᠯ᠎ᠠ᠃ ᠭᠡᠪᠡᠴᠦ ᠵᠠᠷᠢᠮ ᠳᠠᠭᠠᠨ ᠶᠠᠭᠤ ᠴᠦ ᠦᠭᠡᠢ ᠬᠤᠪ ᠬᠤᠭᠤᠰᠤᠨ ᠢᠷᠡᠴᠢᠭᠡᠭᠡᠳ ᠪᠠᠰᠠ ︿︿ᠮᠢᠨᠦ ᠤᠮᠪᠤᠯ ᠨᠠᠰᠢ ᠪᠠᠨ ᠢᠷ᠎ᠡ᠂ ᠡᠪᠦᠭᠡ ᠨᠢ ᠥᠨᠥᠬᠢ ᠪᠤᠭᠤᠨ ᠰᠣᠶᠤᠭ᠎ᠠ ᠶᠢ ᠴᠢᠨᠢ ᠨᠢᠭᠡ ᠠᠮᠲᠠᠯᠠᠵᠣ ᠦᠵᠡᠶ᠎ᠡ᠂ ᠣᠳᠣ ᠪᠠᠷᠤᠭ ᠯᠡ ᠯᠠᠪ ᠬᠠᠯᠠᠭᠤᠨ ᠤᠷᠤᠭᠰᠠᠨ ᠪᠠᠶᠢᠯᠭᠤᠢ﹀﹀ ᠭᠡᠵᠦ ᠪᠠᠶᠢᠩᠭᠤ ᠠᠶᠤᠯᠭᠠᠳᠠᠭ ᠤᠳᠠᠭ᠎ᠠ ᠲᠠᠢ᠃ ᠲᠡᠭᠡᠵᠦ ᠨᠠᠳᠠ ᠶᠢ ᠪᠠᠭ᠎ᠠ ᠶᠠᠭᠤᠮ᠎ᠠ ᠮᠡᠳᠡᠬᠦ ᠪᠣᠯᠬᠤ ᠎ ᠳᠤ ᠯᠡ ᠰᠠᠬᠠᠯᠳᠤ ᠡᠪᠦᠭᠡ ᠮᠠᠨᠢ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ  ᠭᠠᠪ ᠰᠢᠷ᠎ᠠ ᠭᠠᠣᠯᠢᠨ ᠳᠡᠭᠦᠵᠢᠩ ᠲᠠᠢ ᠬᠠᠶᠢᠯᠠᠰᠣᠨ ᠪᠢᠯᠠᠭᠤ ᠪᠠᠷᠢᠭᠰᠠᠭᠠᠷ ᠪᠠᠷᠢᠭᠠᠳᠠ ᠶᠢᠨ ᠦᠬᠡᠷ ᠢ ᠬᠠᠷᠢᠭᠤᠯᠵᠤ ᠶᠠᠪᠤᠳᠠᠭ ᠪᠠᠶᠢᠪᠠ᠃     ᠵᠢᠯ ᠤᠨ ᠲᠦᠯ ᠰᠢᠪᠲᠤᠷᠴᠦ ᠡᠳᠦᠷ ᠵᠦᠭᠡᠯᠡᠷᠡᠬᠦ ᠦᠶᠡᠰ ᠢᠶᠠᠷ ᠲᠠᠯ᠎ᠠ ᠬᠦᠳᠡᠭᠡ ᠮᠠᠨᠢ ᠲᠤᠯᠠᠭᠠᠨ ᠴᠢᠭᠢᠭ ᠲᠠᠲᠠᠭᠤᠯᠤᠨ ᠲᠡᠨᠵᠢ ᠶᠢᠨ ᠡᠩᠭᠡᠷ ᠤᠨ ᠬᠦᠬᠡ ᠨᠤᠭᠤᠭ᠎ᠠ ᠭᠤᠷᠤᠶᠢᠨ ᠤᠷᠭᠤᠵᠤ ᠨᠠᠭᠤᠷ ᠪᠦᠷᠢᠳᠦ ᠠᠷᠯᠠᠨ ᠲᠤᠨᠤᠯᠵᠠᠭᠰᠠᠭᠠᠷ ᠭᠠᠯᠠᠭᠤ ᠰᠢᠪᠠᠭᠤᠳ ᠨᠦᠷᠭᠢᠯᠳᠦᠵᠦ ᠡᠬᠢᠯᠡᠳᠡᠭ᠃ ᠰᠠᠬᠠᠯᠳᠦ ᠡᠪᠦᠭᠡ ᠮᠠᠨᠢ ᠨᠢᠭᠡᠨ ᠨᠠᠷᠠ ᠰᠠᠯᠬᠢ ᠤᠶᠠᠬᠠᠨ ᠴᠡᠯᠮᠡᠭ ᠡᠳᠦᠷ ᠢ ᠰᠤᠩᠭᠤᠵᠤ ᠰᠦᠷᠦᠭ ᠤᠨ ᠢᠶᠠᠨ ᠬᠡᠶᠢᠮᠦᠷᠢ ᠶᠢ ᠲᠠᠯᠠᠯᠯᠠᠬᠤ ᠶᠤᠮ ᠭᠡᠭᠰᠡᠭᠡᠷ ᠦᠬᠡᠷ ᠤᠨ ᠬᠠᠰᠢᠶᠠᠨ ᠤ ᠪᠠᠨ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠨᠠᠮᠬᠠᠨ ᠳᠤᠪᠤ ᠲᠡᠭᠡᠷ᠎ᠡ ᠬᠠᠷ᠎ᠠ ᠠᠷᠭᠠᠯ ᠬᠦᠭᠵᠢᠭᠡᠨ ᠪᠠᠭᠴᠠ ᠬᠦᠵᠢ ᠠᠰᠠᠭᠠᠵᠤ ᠲᠠᠯᠪᠢᠭᠠᠳ ᠰᠦᠷᠦᠭ ᠤᠨ ᠲᠦᠷᠦᠬᠦᠦ ᠬᠠᠯᠵᠠᠨ ᠪᠤᠬ᠎ᠠ ᠶᠢᠨ ᠢᠶᠠᠨ ᠤᠷᠤᠭᠤᠯ ᠳᠤ ᠰᠢᠨ᠎ᠡ ᠰᠦ ᠳᠤᠰᠤᠭᠠᠵᠤ ᠬᠠᠭᠤᠷᠤᠭᠰᠠᠨ ᠠᠮᠤ ᠡᠮᠬᠦᠭᠦᠯᠦᠭᠡᠳ ᠰᠢᠷ᠎ᠠ ᠲᠣᠰᠤ ᠪᠠᠷ ᠭᠠᠯ ᠮᠠᠩᠨᠠᠢ ᠲᠡᠭᠡᠷ᠎ᠡ ᠨᠢ ᠮᠢᠯᠢᠶᠠᠵᠤ ᠭᠠᠷᠳᠠᠭ ᠪᠠ ᠴᠠᠰᠢ ᠬᠦᠵᠦᠭᠦᠦ ᠰᠡᠭᠡᠷ ᠢ ᠨᠢ ᠮᠠᠭᠠᠵᠢᠵᠤ ᠮᠠᠯᠲᠠᠭᠰᠠᠭᠠᠷ ᠦᠰᠦ ᠬᠢᠯᠭᠠᠰᠣᠨ ᠠᠴᠠ ᠨᠢ ᠨᠢᠭᠡ ᠠᠳᠬᠤ ᠪᠦᠮᠪᠦᠷᠢᠭᠦᠯᠦᠨ ᠠᠪᠳᠠᠭ᠃ ᠠᠪᠤᠭᠰᠠᠨ ᠲᠡᠷᠡᠬᠦ ᠪᠦᠭᠡᠮ ᠦᠰᠦ ᠪᠠᠨ ᠠᠰᠠᠵᠤ ᠵᠠᠪᠳᠠᠭᠰᠠᠨ ᠬᠦᠵᠢᠰ ᠢᠶᠠᠷ ᠠᠷᠢᠭᠤᠳᠬᠠᠯ ᠬᠢᠵᠦ ︿︿ᠬᠤᠷᠤᠢ᠂ ᠬᠤᠷᠤᠢ᠂ ᠬᠤᠷᠤᠢ︕ ᠦᠷ᠎ᠡ ᠮᠠᠯ ᠤᠨ ᠮᠠᠨᠢ ᠦᠶᠦᠭ ᠬᠡᠰᠢᠭ ᠲᠠᠨᠢ ᠦᠩ ᠲᠦᠭᠦᠷᠡᠩ ᠪᠤᠯᠣᠭᠠᠰᠠᠢ﹀﹀ ᠭᠡᠵᠦ ᠰᠠᠷᠭᠢᠶ᠎ᠠ ᠰᠦᠬᠡᠩᠬᠢ ᠲᠠᠭᠤᠨ ᠢᠶᠠᠷ ᠬᠤᠷᠤᠶᠢᠯᠠᠨ ᠳᠠᠯᠠᠯᠤᠩᠬᠠᠨ ᠬᠠᠰᠢᠶ᠎ᠠ ᠪᠠᠨ ᠨᠠᠷᠠᠨ ᠵᠦᠪ ᠭᠤᠷᠪᠠ ᠲᠣᠭᠤᠷᠢᠭᠠᠳ ᠰᠢᠪᠡᠭᠡᠨ ᠵᠠᠪᠰᠠᠷ ᠬᠠᠪᠴᠢᠭᠤᠯᠵᠤ ᠲᠠᠯᠪᠢᠭᠰᠠᠨ ᠢᠶᠠᠨ ᠰᠠᠨᠠᠭ᠎ᠠ ᠤᠨᠤᠭ᠎ᠠ ᠭᠦᠢᠴᠡᠵᠦ ᠦᠬᠡᠷ ᠢᠶᠠᠨ ᠲᠠᠭᠤᠨ ᠬᠠᠪᠤᠷᠵᠢᠶᠠᠨ ᠳᠤ ᠭᠠᠷᠴᠤ ᠶᠠᠪᠤᠳᠠᠭ᠃       ᠰᠠᠬᠠᠯᠳᠦ ᠡᠪᠦᠭᠡ ᠶᠢᠨ ᠤᠲᠤᠷ ᠠᠶᠢᠯ ᠠᠴᠠ ᠵᠠᠭᠤᠭᠠᠳ ᠭᠠᠵᠠᠷ ᠤᠨ ᠦᠵᠦᠬᠦᠷ ᠲᠤ ᠤᠯᠠᠭᠠᠨ ᠪᠤᠷᠭᠠᠰᠤᠳᠠᠢ ᠶᠢᠨ ᠬᠦᠨᠳᠡᠢ ᠭᠡᠳᠡᠭ ᠨᠠᠮᠬᠠᠨ ᠰᠢᠯᠢ ᠳᠤ ᠪᠠᠶᠢᠳᠠᠭ᠃ ᠠᠯᠤᠰ ᠵᠠᠶᠢᠳᠠᠭᠤ ᠠᠮᠢᠲᠤᠷᠠᠯ ᠤᠨᠳᠤᠷᠤᠯᠭ᠎ᠠ ᠎ ᠲᠠᠢ ᠪᠠᠨ ᠶᠠᠪᠤᠬᠤ ᠪᠤᠯᠬᠤᠷ ᠬᠦᠨᠡᠰᠦ ᠬᠤᠰᠢ᠂ ᠤᠰᠤ ᠣᠮᠲᠠ ᠭᠡᠳ ᠨᠢᠭᠡ ᠤᠯᠠᠨ ᠶᠠᠭᠤᠮ᠎ᠠ ᠪᠠᠨ ᠨᠤᠮᠤᠬᠠᠨ ᠵᠡᠭᠡᠷᠳᠡ ᠳᠡᠭᠡᠨ ᠠᠴᠢᠵᠤ ᠬᠦᠳᠦᠯᠦᠭᠰᠡᠭᠡᠷ ᠪᠡᠯᠴᠢᠭᠡᠷ ᠤᠷᠣᠨ᠎ᠠ᠃       ᠤᠲᠤᠷ ᠭᠠᠷᠬᠤ ᠠᠴᠠ ᠨᠢ ᠡᠮᠦᠨ᠎ᠡ ᠡᠳᠦᠷ ᠡᠵᠢ ᠮᠢᠨᠢ ᠠᠬ᠎ᠠ ᠶᠢ ᠲᠠᠭᠠᠭᠤᠯᠤᠨ ᠠᠮᠤ ᠬᠦᠨᠡᠰᠦ ᠪᠠ ᠡᠭᠡᠯᠵᠢᠯᠡᠵᠦ ᠡᠮᠦᠰᠬᠦ ᠨᠢᠮᠭᠡᠨ ᠵᠤᠵᠠᠭᠠᠨ ᠬᠤᠪᠴᠠᠰᠤ ᠬᠤᠨᠠᠷ ᠶᠢ ᠨᠢ ᠠᠪᠠᠴᠢᠵᠤ ᠦᠭᠭᠦ  ᠶᠢᠨ ᠲᠠᠭᠤ ᠥᠨᠥᠬᠢ ᠰᠢᠯᠦᠰᠦ ᠭᠤᠭᠤᠵᠢᠭᠤᠯᠤᠮ᠎ᠠ ᠲᠤᠷᠠᠳᠠᠢ ᠬᠠᠷ᠎ᠠ ᠠᠷᠢᠬᠢ ᠭᠡᠳᠡᠭ ᠭᠤᠱᠤᠭᠤᠨ ᠤᠰᠤ ᠶᠢ ᠨᠢ ᠪᠦᠳᠦᠬᠦᠨ ᠰᠢᠯ ᠯᠤᠩᠬᠤᠨ ᠳᠤ ᠲᠦᠭᠦᠷᠭᠡᠵᠦ ᠦᠭᠭᠦᠭᠡᠳ ᠮᠤᠷᠳᠠᠭᠤᠯᠬᠤ ᠳᠤ ᠰᠠᠬᠠᠯᠳᠦ ᠡᠪᠦᠭᠡ ᠮᠠᠨᠢ ᠦᠪᠡᠷ ᠤᠨ ᠭᠡᠷ ᠤᠨ ᠢᠶᠠᠨ ᠲᠥᠪᠡᠳ ᠤᠨᠢᠰᠦᠨ ᠲᠦᠯᠬᠢᠬᠦᠷ ᠢ ᠦᠯᠡᠳᠡᠭᠡᠵᠦ ᠦᠭᠳᠡᠭ᠃ ᠰᠠᠬᠠᠯᠳᠦ ᠡᠪᠦᠭᠡ ᠶᠠᠪᠤᠭᠰᠠᠨ ᠬᠤᠶᠢᠨ᠎ᠠ ᠮᠠᠨ ᠤ ᠬᠢᠨ ᠨᠢᠭᠡᠯ᠎ᠡ ᠬᠤᠪ ᠬᠤᠭᠤᠰᠤᠨ ᠪᠤᠯᠵᠤ ᠰᠠᠨᠠᠭᠳᠠᠳᠠᠭ ᠪᠠᠶᠢᠭᠰᠠᠨ ᠪᠠ ᠵᠠᠷᠢᠮ ᠳᠠᠭᠠᠨ ᠪᠢ ᠲᠡᠭᠦᠨ ᠢ ᠰᠠᠨᠠᠭᠠᠳ ᠲᠡᠰᠬᠦ ᠦᠭᠡᠢ ᠤᠬᠢᠯᠠᠵᠤ ᠭᠠᠷᠳᠠᠭ ᠴᠤ ᠪᠠᠶᠢᠪᠠ᠃      ᠪᠠᠷᠢᠭᠠᠳᠠ ᠶᠢᠨ ᠵᠢᠯ ᠤᠨ ᠲᠤᠭᠠᠴᠠᠭ᠎ᠠ ᠶᠡᠷᠦᠳᠡᠭᠡᠨ ᠡᠪᠦᠯ ᠤᠷᠤᠭᠠᠳ ᠰᠠᠶ᠋ᠢ ᠦᠷ᠎ᠡ ᠳ᠋ᠦᠩ ᠭᠠᠷᠳᠠᠭ ᠦᠶ᠎ᠡ ᠪᠠᠷ ᠰᠠᠬᠠᠯᠳᠦ ᠡᠪᠦᠭᠡ ᠦᠬᠡᠷ ᠢᠶᠠᠨ ᠬᠦᠭᠡᠭᠡᠭᠰᠡᠭᠡᠷ ᠬᠠᠷᠢᠵᠤ ᠢᠷᠡᠨ᠎ᠡ᠃ ᠲᠡᠷᠡ ᠬᠡᠭᠡᠷ᠎ᠡ ᠤᠨ ᠤᠲᠤᠷ ᠪᠠᠷᠤᠭ ᠵᠢᠯ ᠰᠢᠬᠠᠮ ᠰᠠᠭᠤᠳᠠᠭ ᠪᠤᠯᠬᠤᠷ ᠭᠠᠷ ᠬᠤᠭᠤᠰᠤᠨ ᠬᠠᠷᠢᠵᠤ ᠢᠷᠡᠳᠡᠭ ᠦᠭᠡᠢ᠂ ᠡᠵᠢ ᠳᠤ ᠭᠡᠵᠦ ᠲᠠᠯ᠎ᠠ ᠶᠢᠨ ᠲᠡᠯᠲᠠᠤ ︵ᠴᠠᠭᠠᠨ ᠮᠦᠬᠦ︶᠂ ᠬᠠᠲᠠᠭᠠᠭᠰᠠᠨ ᠰᠢᠷ᠎ᠠ ᠴᠡᠴᠡᠭ ᠠᠪᠴᠢᠷᠠᠵᠤ ᠦᠭᠳᠡᠭ ᠪᠠ ᠡᠪᠦᠭᠡ ᠳᠤ ᠪᠠᠰᠠ ᠦᠶ᠎ᠡ ᠭᠡᠰᠢᠭᠦᠨ ᠤ ᠠᠷᠬᠠᠭ ᠭᠡᠮ ᠳᠤ ᠲᠤᠰᠠᠳᠠᠢ ᠶᠤᠮ ᠭᠡᠵᠦ ᠪᠣᠷᠴᠠᠯᠠᠭᠰᠠᠨ ᠮᠢᠩᠬᠢᠰᠦᠨ ᠮᠢᠬ᠎ᠠ᠂ ᠵᠠᠷᠠᠭᠠᠨ ᠲᠣᠰᠣ ᠠᠪᠴᠢᠷᠠᠵᠤ ᠦᠭᠳᠡᠭ᠃ ᠲᠡᠳᠡᠭᠡᠷ ᠡᠷᠬᠢᠮ ᠪᠡᠯᠡᠭ ᠤᠳ ᠤᠨ ᠲᠤᠮᠲᠠ ᠪᠠᠨ ᠨᠠᠳᠠ ᠶᠢ ᠶᠠᠭᠠᠬᠢᠭᠰᠠᠨ ᠴᠦ ᠮᠠᠷᠳᠠᠳᠠᠭ ᠦᠭᠡᠢ ᠨᠢ ᠪᠠᠳᠤᠳᠠᠢ ᠪᠠᠶᠢᠵᠤ ᠬᠡᠵᠢᠶᠡᠳᠡ ᠨᠢᠭᠡ ᠦᠨᠵᠢᠭᠡᠯ ᠪᠣᠷᠤ ᠲᠠᠤᠯᠠᠢ ᠪᠠᠷᠢᠵᠤ ᠠᠪᠴᠢᠷᠠᠳᠠᠭ᠃ ᠪᠢ ᠲᠡᠭᠦᠨ ᠶᠢ ᠎ ᠨᠢ ᠨᠠᠷᠢᠨ ᠬᠢᠯᠭᠠᠰᠤᠨ ᠲᠡᠭᠡᠰᠦ ᠪᠠᠷ ᠠᠷᠭᠠᠮᠵᠢᠵᠤ ᠠᠪᠤᠭᠠᠳ ᠡᠪᠡᠰᠦ ᠵᠦᠯᠭᠡᠨ ᠲᠤᠲᠤᠷ᠎ᠠ ᠲᠠᠭᠤᠵᠤ ᠨᠠᠭᠠᠳᠤᠭᠰᠠᠭᠠᠷ ᠲᠣᠷ᠎ᠠ ᠰᠢᠩᠭᠡᠷᠡᠬᠦ ᠦᠶᠡᠰ ᠰᠠᠬᠠᠯᠳᠦ ᠡᠪᠦᠭᠡ ᠭᠠᠷ ᠤᠷᠤᠵᠤ ᠪᠣᠭᠳᠠ ᠶᠢᠨ ᠪᠣᠷᠣ ᠱᠦᠯᠦ ᠭᠠᠷᠭᠠᠨ ᠬᠤᠶᠢᠳᠦ ᠬᠤᠶᠠᠷ ᠭᠤᠶ᠎ᠠ ᠶᠢ ᠨᠢ ᠠᠬ᠎ᠠ ᠪᠢᠳᠡ ᠬᠤᠶᠠᠷ ᠲᠤ ᠥᠭᠭᠦᠭᠡᠳ ᠡᠪᠦᠭᠡ ᠲᠠᠢ ᠬᠤᠶᠠᠭᠤᠯᠠ ᠰᠢᠷᠡᠭᠡ ᠬᠠᠪᠴᠢᠨ ᠠᠮᠲᠠᠷᠬᠠᠵᠤ ᠰᠠᠭᠤᠨ᠎ᠠ᠃ ᠮᠢᠨᠦ ᠡᠪᠦᠭᠡ ᠤᠳᠠᠭᠠᠨ ᠴᠢᠨᠠᠷᠳᠠᠢ ᠦᠶ᠎ᠡ ᠭᠡᠰᠢᠭᠦᠨ ᠤ ᠠᠷᠬᠠᠭ ᠶᠢᠨ ᠲᠡᠭᠡᠷ᠎ᠡ ᠵᠢᠷᠦᠭᠡᠨ ᠬᠠᠳᠬᠤᠭ᠎ᠠ ᠎ ᠲᠠᠢ ᠪᠣᠯᠬᠤᠷ ᠶᠡᠷᠦ ᠠᠴᠠ ᠠᠷᠢᠬᠢᠨ ᠳᠤ ᠠᠮᠠ ᠬᠦᠷᠳᠡᠭ ᠦᠭᠡᠢ ᠪᠠᠶᠢᠵᠤ ᠰᠠᠬᠠᠯᠳᠦ ᠡᠪᠦᠭᠡ ᠯᠡ ᠭᠠᠭᠴᠠᠭᠠᠷ ᠢᠶᠠᠷ ᠢᠶᠠᠨ ᠬᠡᠮᠵᠢᠶᠡᠨ ᠠᠴᠠ ᠪᠠᠨ ᠪᠠᠭ᠎ᠠ ᠲᠦᠯᠬᠢᠭᠦᠦ ᠲᠠᠲᠠᠴᠢᠬᠠᠭᠠᠳ ᠴᠢᠷᠠᠢ ᠪᠠᠨ ᠤᠯᠠᠶᠢᠯᠭᠠᠨ ᠭᠢᠯᠠᠩ ᠲᠤᠯᠤᠭᠠᠢ ᠪᠠᠨ ᠢᠯᠪᠢᠵᠦ ᠭᠢᠯᠦᠭᠡᠨ ᠴᠠᠭᠠᠨ ᠰᠠᠬᠠᠯ ᠢᠶᠠᠨ ᠪᠠᠶᠢᠨ ᠲᠠᠬᠢᠨ ᠰᠢᠪᠲᠣᠷᠣᠭᠰᠠᠭᠠᠷ ᠢᠨᠢᠶᠡᠬᠦ ᠳᠡᠭᠡᠨ ᠢᠷᠠᠯᠵᠠᠲᠠᠯ᠎ᠠ ᠢᠨᠢᠶᠡᠵᠦ᠂ ᠬᠦᠭᠡᠷᠬᠦ ᠳᠡᠭᠡᠨ ᠲᠤᠨᠤᠯᠵᠠᠲᠠᠯ᠎ᠠ ᠪᠠᠶᠠᠰᠴᠤ ᠭᠠᠷᠤᠨ᠎ᠠ᠃      ᠠᠷᠢᠬᠢ ᠪᠠᠨ ᠤᠤᠭᠤᠵᠤ ᠪᠠᠷᠠᠭᠠᠳ ᠭᠡᠷ ᠲᠡᠭᠡᠨ ᠪᠤᠴᠠᠬᠤ ᠦᠶᠡᠰ ᠡᠵᠢ ᠵᠦᠭ ᠬᠠᠨᠳᠤᠨ ︿︿ᠵᠠ︕ ᠬᠡᠦᠬᠡ ᠡ᠂ ᠠᠪᠠᠭ᠎ᠠ ᠨᠢ ᠣᠳᠣ ᠯᠡ ᠪᠠᠰᠠ ᠠᠪᠤ ᠢ ᠴᠢᠨᠢ ᠵᠢᠭᠡᠯᠡᠬᠦ ᠴᠠᠭ ᠪᠤᠯᠤᠭᠰᠠᠨ ᠰᠢᠦ᠃ ᠮᠠᠷᠭᠠᠰᠢ ᠲᠤᠰᠬᠤ ᠪᠠᠷ ᠢᠷᠡᠨ᠎ᠡ ᠳ᠋ᠡ︕﹀﹀ ᠭᠡᠵᠦ ᠬᠡᠯᠡᠭᠡᠳ ᠲᠡᠨᠳᠦᠷ ᠮᠡᠨᠳᠦᠷ ᠪᠤᠯᠵᠤ ᠪᠤᠰᠬᠤ ᠪᠠᠷ ᠡᠵᠢ ᠠᠬ᠎ᠠ ᠪᠢᠳᠠ ᠬᠤᠶᠠᠭᠤᠯᠠ ᠶᠢ ᠲᠠᠭᠤᠳᠠᠵᠤ ᠰᠠᠬᠠᠯᠳᠦ ᠡᠪᠦᠭᠡ ᠶᠢ ᠲᠦᠰᠢᠵᠦ ᠬᠦᠷᠭᠡᠯᠭᠡᠳᠡᠭ᠃ ᠦᠨᠡᠨ ᠶᠢ ᠬᠡᠯᠡᠪᠡᠯ ᠮᠠᠨ ᠤ ᠬᠤᠶᠠᠷ ᠭᠡᠷ ᠤᠨ ᠬᠢᠨ ᠭᠡᠵᠦ ᠬᠡᠨ ᠨᠢᠭᠡᠨ ᠢᠶᠠᠨ ᠬᠠᠷᠢᠯᠴᠢᠨ ᠬᠦᠷᠭᠡᠬᠦ ᠬᠡᠷᠡᠭ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠨᠣᠳᠤᠭ ᠤᠨ ᠬᠢᠨ ᠤ ᠬᠡᠯᠡᠬᠦ ᠪᠠᠷ ᠠᠶᠢᠯ ᠨᠢ ᠤᠨᠳᠤᠤ ᠪᠤᠯᠪᠠᠴᠤ ᠠᠮᠢᠲᠤᠷᠠᠯ ᠤᠨᠳᠤᠷᠤᠯᠭ᠎ᠠ ᠨᠢᠭᠡᠯᠬᠡᠨ ᠪᠠᠶᠢᠵᠤ ᠯᠡ ᠳ᠋ᠠ᠃ ᠭᠡᠪᠡᠴᠦ ᠡᠵᠢ ᠮᠢᠨᠢ ᠶᠠᠭᠤ ᠰᠠᠨᠠᠳᠠᠭ ᠢ ᠨᠢ ᠮᠡᠳᠡᠳᠡᠭ ᠦᠭᠡᠢ᠂ ᠤᠳᠠᠭ᠎ᠠ ᠪᠤᠯᠭᠠᠨ ᠵᠠᠪᠠᠯ ᠲᠡᠭᠡᠵᠦ ᠬᠦᠷᠭᠡᠵᠦ ᠦᠭᠳᠡᠭ᠃ ᠨᠢᠭᠡ ᠡᠳᠦᠷ ᠪᠢ ᠡᠪᠦᠭᠡ ᠠᠴᠠ ᠰᠠᠬᠠᠯᠳᠦ ᠡᠪᠦᠭᠡ ᠶᠢᠨ ᠲᠤᠬᠠᠢ ᠰᠤᠷᠠᠭ ᠬᠠᠶᠠᠵᠤ ᠦᠵᠡᠪᠡ᠃
  
ᠢᠷᠡᠯᠲᠡ᠄ ᠪ᠊᠂ ᠪᠢᠯᠢᠭ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠨᠢᠭᠡ ᠬᠤᠨᠳᠠᠭ᠎ᠠ ᠠᠷᠢᠬᠢ
ᠡᠪᠦᠯ
ᠡᠷᠪᠡᠬᠡᠯᠵᠢ ᠡᠪᠡᠷ ᠲᠠᠢ ᠤᠬᠤᠨ᠎ᠠ
ᠰᠠᠬᠠᠯᠳᠦ ᠡᠪᠦᠭᠡ （3）
ᠰᠠᠬᠠᠯᠳᠦ ᠡᠪᠦᠭᠡ
2014-2015 © ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备07002090号